Gikan sa Among mga Magbabasa
Gikan sa Among mga Magbabasa
Pag-alagad Diin Mas Dako ang Panginahanglan Ang artikulong “Kon Nahibalo Lang Unta Niini ang mga Tawo!” (Enero 8, 2005) mao gayoy akong gikinahanglan! Diha sa katilingban diin ang mga batan-on gipit-os sa pagpangagpas ug materyal nga bahandi, ang usa dali rang malinga gikan sa pag-una kang Jehova. Ang kalamposan ni Davey sa pag-alagad diin mas dako ang panginahanglan nakapalihok kanako sa pag-alagad usab sa susamang paagi sa kataposan niining tuiga.
C. G., Tinipong Bansa
Ako mouyon gayod sa gisulti ni Davey nga “wala nay mas maayo pa kay sa pag-alagad kang Jehova sa atong bug-os nga maarangan.” Pagkaanugon nga dili tanang batan-on ang mibati ug ingon niini! Wala ako magbasol sa akong desisyon sa paggamit sa mga tuig sa akong pagkabatan-on diha sa pag-alagad kang Jehova, ug buot kong magmadasigon hangtod sa kataposan sama ni Davey!
A. P., Rusya
Kita man bata o tigulang, ang panig-ingnan ni Davey sa pagkamadasigon motukmod sa matag usa kanato sa pagpalandong kon sa unsang paagi atong gamiton ang atong kinabuhi. Nakadayeg gayod ako sa mga ginikanan ni Davey, kinsa mahigugmaong nagmatuto sa ilang anak. Ikapasigarbo gayod nila siya!
L. C., Italya
Ako 17 anyos, ug sa pagkakaron ako nagkuhag bokasyonal nga kurso. Daghan pa akog mahimo sa akong kinabuhi. Ang panig-ingnan ni Davey nakadasig kanako sa paghatag sa akong kinamaayohan ngadto kang Jehova ug sa pag-alagad ingong bug-os-panahong magwawali sa umaabot. Sama ni Davey, gusto usab nako nga moalagad diin mas dako ang panginahanglan alang sa mga alagad ni Jehova. Nasayod ako nga kini ang kinamaayohang paagi nga magamit nako ang akong kinabuhi.
R. I., Pinlandia
Sa dapit nga akong gipuy-an ang mga batan-on kasagaran mokuhag karera o gusto nga maglipaylipay lang. Ako nagtuo nga ang panig-ingnan ni Davey modasig sa mas daghan pang batan-on sa pagpalandong sa ilang paagi sa paggamit sa ilang kinabuhi ug sa kahinungdanon sa pagtuman sa ilang pagpahinungod kang Jehova.
J. O., Sweden
Kini nga artikulo nakaaghat kanako sa pagsusi sa akong espirituwal nga mga tumong. Ako nalimot niini sa makadiyot. Apan tungod sa eksperyensiya ni Davey, ako namalandong kon unsa kahay ikasulti sa mga tawo bahin kanako kon ako mamatay. Gipakita usab niini kanako nga angay nakong susihon pag-ayo ang akong pag-alagad. Padayona ang pagsulat ug makapadasig nga mga artikulo nga sama niini.
S. K., Alemanya
Ang pagkinabuhi diha sa materyalistikong katilingban nagkinahanglan ug kalig-on sa pagsukol sa hakog nga mga tinguha. Dili nako malimtan ang maayong panig-ingnan ni Davey, ug ako maningkamot gayod nga makapuyo sa umaabot nga bag-ong kalibotan aron pasalamatan siya sa pagtudlo kanako sa bililhong leksiyon nga “wala nay mas maayo pa kay sa pag-alagad kang Jehova sa atong bug-os nga maarangan.”
O. G., Pransiya
Ako diyes anyos. Gibati usab nako ang gibati ni Davey tungod kay ako nagpayunir uban sa akong mga ginikanan sa Taiwan. Kini nga artikulo nakadasig kanako. Makapalipay ang pagkasayod nga dunay mga batan-on nga nag-alagad diin mas dako ang panginahanglan. Mouyon ako kang Davey nga kini makahatag gayod ug kalipay!
J. R., Taiwan
Mga Harp Seal Salamat sa artikulong “Mga Itoy sa Niyebe sa Magdalen Islands.” (Enero 8, 2005) Ako naguol pag-ayo tungod kay ako masakiton. Apan makapalipay ang pagkakita niining himos nga mga linalang. Tungod sa pagkahibalo bahin kanila, ako mapasalamaton ug nakadayeg gayod sa kalalangan ni Jehova. Akong nahanduraw nga morag mahikap nako sila! Nagpasalamat ako kang Jehova nga dunay usa pa ka butang nga akong paaboton diha sa iyang matarong nga bag-ong kalibotan.
Y. M., Japan