Mga Balay nga Shuba ug Matang sa Pinising
Mga Balay nga Shuba ug Matang sa Pinising
Tinampo sa magsusulat sa Pagmata! sa Ukraine
ANG mga tindahan, mga balay, ug mga bilding sa opisina sa tibuok Ukraine shuba ug matang sa pinising. Ang shuba mao ang naandan nga stucco nga pinising nga morag pilos nga layning sa amerkana nga gama sa panit sa karnero kon tan-awon. Ang mga lalaki nga nagpuyo sa harianong mga balay nakaangay sa kaanindot sa shuba, ug bisan ang ordinaryong mga mag-uuma mogasto ug dako aron masapawan ang bungbong sa ilang mga balay ug shuba nga matang sa pinising.
Ang mga teknik niini nga stucco finish makat-onan sulod sa mga duha ka tuig lamang. Ang gamit sa usa ka kantero diyutay ra ug yano. Lakip sa mga gamit mao ang balde nga butangan ug basa nga semento, mubo nga silhig-tukog, ug usa ka pirasong kahoy o metal. Apan, ang trabaho sa paggama ug shuba nga matang sa pinising lisod.
Ang shuba dili kay usa ka yanong stucco finish lamang—kini lainlain ug porma, disenyo, kolor, ug gibag-on. Ang kantero kinahanglang maayong motan-aw kon unsang disenyo ang angay sa tinukod nga iyang trabahoon aron makuha niya ang shuba nga matang sa pinising.
Ang lainlaing mga disenyo nga gamiton ibadlis diha sa bungbong sa dili pa sapawan ug semento. Ang lainlain nga disenyo makuha pinaagi sa paggamit ug dulomon ug hilaw ug kolor nga mga semento nga ipalitada nga lainlain ug timplada. Inigkauga sa shuba, kini pintalan pinaagig espri aron monindot pa gayod.
Ang silhig ituslob sa kantero diha sa miksklada nga semento. Dayon ang silhig iyang iwitik diha sa pirasong kahoy o metal nga iyang gikaptan sa pikas kamot. Ang semento molagpot ug motugpa sa bungbong. Sa hinay-hinay nga pagtrabaho, ang kantero makahuman ug mga 20 ngadto sa 25 metro kuwadrado nga pagpinising sa bungbong sa usa ka adlaw.
Bisan pag hago kaayo ang pagsapaw ug semento niining paagiha kay sa ubang matang sa pinising sa balay, kini sayon nga mentinahon. Ang himoon lamang sa tagbalay mao ang pagkuha sa abog kas-a sa usa ka tuig pinaagi sa pag-espri ug tubig diha niana ug dayon pintalan ang nauphag nang mga luna. Ang shuba nga matang sa pinising modurar ug dugay kon sundon kini nga paagi sa pagmentinar. Gani, daghang balay bag-o gihapong tan-awon bisag 20 anyos na ang pinising.
Usa ka kantero nakahigayon sa paggamit sa iyang abilidad sa gawas sa nasod. Sa dihang miduaw sa usa ka higala sa Balingen, Alemanya, siya gihangyo sa pagsapaw ug shuba nga matang sa pinising diha sa balay sa iyang higala. Samtang ordinaryo lang kining matanga sa pinising sa balay didto sa Ukraine, kini bag-ong ideya niining lungsora.
Samtang nagtrabaho ang kantero, iyang naukay ang tibuok lugar. Midako ang mga mata sa usa ka kontraktor nga nagtan-aw kay dili makatuo sa kanindot nga nahimo sa ordinaryong mga gamit. Nainat ang mga liog sa mga drayber nga naningkamot sa pagtan-aw samtang hinayhinay nga nagpadagan, ug usa ka magsusulat nagkuha ug mga letrato para sa lokal nga mantalaan. Sa dihang natapos, ang balay nakadawat ug ganti gikan sa siyudad.
Nindot kahang tan-awon ang shuba nga matang sa pinising diha sa imong lugar? Tingali ang bag-ong shuba nga matang sa pinising makapanindot sa imong balay ug sa imong lugar.
[Hulagway sa panid 23]
Ang balay nga shuba ug matang sa pinising sa Balingen, Alemanya nakadaog ug ganti
[Hulagway sa panid 23]
Mubong silhig-tukog ug pirasong kahoy nga gamit sa kantero sa pagtrabaho sa shuba nga matang sa pinising
[Hulagway sa panid 23]
Ang paghimo ug shuba nga matang sa pinising lisod