Pagpaniid sa Kalibotan

Ang Gahom sa Pagkatawa

“Gibanabana sa mga siyentipiko nga bisan ang katunga lang sa minuto nga masadyaong pagkatawa maoy katumbas sa 45 minutos nga bug-os nga pagpahulay,” nagtaho ang Polakong magasin nga Przyjaciółka. “Ang dili-pinugos nga pagkatawa maoy katumbas sa tulo ka minutos nga aerobic nga ehersisyo, samtang ang napulo ka mabinationg pahiyom motumbas ug napulo ka minutos nga paspas nga pagbugsay.” Ang uban pang mga kaayohan sa pagkatawa naglakip sa tulo ka pilo nga pag-usbaw sa gidaghanon sa hangin nga mosulod sa baga maingon man sa mas maayong sirkulasyon sa dugo, paghilis sa kinaon, metabolismo, pag-obra sa utok, ug pagpagawas sa makadaot nga mga substansiya gikan sa lawas. Ang magasin misugyot nga aron makabaton ka ug maayong buut, kinahanglan kang mopahiyom sa imong kaugalingon, sa imong kapikas, ug sa imong mga anak sayo pa sa buntag. “Ayaw seryosoha ang imong kaugalingon,” kini midugang. “Paningkamot nga makita ang positibong bahin sa mga butang bisan sa lisod nga mga kahimtang.”

 Dili Hilakon sa Gabii Kon Maladlad sa Kahayag sa Hapon

Usa ka di pa dugay nga pagtuon sa kinatulgan sa 56 ka himsog nga mga masuso, nga gipatik sa Journal of Sleep Research, nagpadayag nga “ang mga masuso nga naladlad sa mas dugang kahayag sa sayong kahaponon maayog kinatulgan sa gabii.” Hinunoa, ang pagkaladlad sa kahayag sa buntag ug gabii wala magpahinabog kalainan sa kalidad sa pagkatulog. Ang tigpasiugda sa maong pagtuon nga si Dra. Yvonne Harrison sa John Moores University sa Liverpool, Britanya​—kinsa usa mismo ka inahan​—nakahukom sa pagtuon sa epekto sa kahayag diha sa kinatulgan sa mga masuso tungod sa mas unang pagtuon nga nagpakita nga ang dugang pagkaladlad sa kahayag maadlaw nagpauswag sa kalidad sa kinatulgan sa mga edaran.

Sakit nga Chagas Mikaylap

Ang sakit nga Chagas naggikan sa usa ka parasito nga mapasa pinaagi sa kinalibang sa mosuyop-ug-dugo nga insekto nga kasagarang gitawag ug tighalok nga insekto. Ang sakit maoy komon diha sa kabaryohan gikan sa Mexico ngadto sa Argentina. Ang The Herald sa Mexico nagtaho nga gibanabanang usa ug tunga ngadto sa duha ka milyong Mexicano ang natakboyan sa parasito. Apan, ang sakit nga Chagas mikaylap ngadto sa ubang mga dapit sa kalibotan. Ang usa ka paagi mao ang pag-abonog dugo. Ang Mexicanong biologo nga si Bert Kohlmann nag-ingon: “Nakadawat na kami ug mga taho gikan sa Australia, Uropa, Tinipong Bansa ug Canada bahin sa mga impeksiyon gumikan sa pag-abonog dugo. Ang mga lalin gikan sa kayutaan sa Amerika nga kasagaran himsog ug panglawas magdonar ug dugo ug ang mga tawo nianang ubang mga dapit wala gani maghunahuna sa pagpasusi kon sila ba natakboyan ug sakit nga Chagas.” Ang World Health Organization nagbanabana nga sa Kasadpang Hemispera, 16 ngadto sa 18 milyones ka tawo ang natakboyan sa sakit ug 100 milyones pa ang nameligro. Sa pagkakaron, wala pay tambal sa sakit nga Chagas, nga kasagaran makapatay.

Pag-aghat sa mga Tawo sa Pagbayad ug Buhis

Aron dasigon ang lokal nga mga molupyo sa pagbayad sa ilang wala-mabayring mga buhis sa propiedad nga mokabat ug $1.15 ka milyon, ang mga opisyal sa siyudad sa Rajahmundry, sa India, mitanyag sa pagkanselar sa mga multa ug tubo sa utang, nagtaho ang ahensiya sa balita nga Reuters. Sa dihang napakyas ang maong pamaagi, ang mga opisyal nagsuhol ug 20 ka grupo sa mga magtatambol aron sa pagtambol diha sa gawas sa mga balay sa mga tawong napakyas sa pagbayad sa ilang mga buhis. Ang mga magtatambol “naghimog talagsaong pasundayag sa gawas sa balay sa mga wala makabayad, nag-aghat kanila sa paggula sa ilang mga balay ug nagpatin-aw kanila kon pilay ilang utang ug nga kinahanglan nilang bayran dayon kana,” matod sa opisyal sa munisipyo nga si T.S.R. Anjaneyulu. “Dili sila mohunong hangtod ang mga tawo mosugot sa pagbayad sa mga utang.” Kining talagsaong paagi epektibo. Human sa walay-hunong nga pagtambol sa mga magtatambol sulod sa usa lang ka semana, nakolekta sa siyudad ang 18 porsiyento sa nagpatongpatong nga wala-mabayring buhis sa propiedad.

Relihiyon sa Rusya

Sa miagi, gituohan nga ang relihiyosong mga magtutuo sa Rusya kasagaran maoy mga babaye, mga edaran, ug mga tawong wala makatapos sa hayskul. Apan, gipakita karon sa estadistika nga nagkadaghang mga batan-on, mga lalaki, ug mga tawong taas ug edukasyon ang nakig-anib na sa usa ka relihiyon, nagtaho ang Rusong mantalaan nga Rossiyskaya Gazeta. Tali sa 1989 ug 1991, 30 porsiyento lamang sa populasyon ang nag-angkong membro sa Ortodoksong simbahan. Apan sa 1999, kana nga gidaghanon miabot ug kapin sa 50 porsiyento. Ang Rusong mga sosyologo di pa dugayng nakakaplag nga 30 porsiyento sa mga Ruso nagtuo sa kinabuhi human sa kamatayon, 24 porsiyento nagtuo sa langit ug impiyerno, ug 28 porsiyento nagtuo sa relihiyosong mga milagro. Duolan sa ikatulo ka bahin niadtong gisurbi miuyon sa pamulong nga “Ako nagtuo nga ang Diyos naglungtad ug wala magduhaduha bahin niana.” Sa samang higayon, “30 porsiyento sa mga Ruso nagtuo sa astrolohiya, ug 50 ngadto sa 55 porsiyento nagtuo sa matagnaong mga damgo ug mga tilimad-on,” nag-ingon ang taho.

Simbahan sa Gresya Misulay Paggamit ug Modernong Grego

Kay nabalaka nga daghang Gregong mga maninimba dili makasabot sa mga teksto sa Bibliya nga basahon diha sa karaang Grego nga pinulongan panahon sa mga serbisyo sa simbahan, ang arsobispo sa Gresya nagmando sa mga simbahan sa Atenas sa paggamit usab ug modernong Grego. “Ang Bag-ong Testamento gibasa diha sa orihinal nga ‘Koine’ o komon nga Grego, usa ka porma sa pinulongang Grego nga gigamit gikan sa ulahing bahin sa ikaupat nga siglo WKP ngadto sa ikalima nga siglo KP,” nagsaysay ang mantalaang Kathimerini. Apan ang arsobispo “nabalaka nga ang mga batan-on ilabinang dili makasabot niini nga porma sa Grego ug dili makasabot sa mga serbisyo,” matod sa taho. Sa usa ka eksperimentong programa nga gihubit sa Kathimerini ingong “usa ka dakong kausaban alang sa Simbahan nga lig-ong nagapangupot sa mga tradisyon niini,” ang mga teksto sa Bibliya gibasa una sa Koine nga Grego ug dayon sa modernong Grego. Apan wala pay usa ka tuig sa ulahi, ang mantalaan nagtaho nga “gihunong” sa simbahan ang paningkamot nga “mas masabtan ang Bag-ong Testamento.”

Mga Web Site Diin Makontak ang Kanhing mga Higala Nagpauswag sa Gidaghanon sa Diborsiyo

Ang mga site sa Internet diin makontak ang kanhing mga kaeskuyla “nakaamot sa pagdaghan sa nabungkag nga kaminyoon tungod kay ang gilaay nga mga bana ug asawa nakigkontak sa ilang mga trato kanhi,” nagtaho ang Guardian Weekly sa Britanya. Sa pagkomento kon sa unsang paagi kining maong batasan nakaapektar sa gidaghanon sa diborsiyo sa Britanya, nga sulod sa miaging pito ka tuig miabot sa kinatas-ang ihap niini sa 2004, si Christine Northam, tigpamaba sa organisasyon nga nagtanyag ug giya bahin sa kaminyoon nga Relate, miingon: “Daghang tawo adunay malipayong panumdoman bahin sa ilang unang pagpakigtrato sa tunghaan. Kon sila dili malipayon uban sa ilang kapikas, sila mosugod paghanduraw kon unsa kahay nahitabo kon wala nila bulagi ang ilang trato kanhi.” Mas sayon na karon alang sa dili-malipayon nga kapikas sa “pag-Internet aron sa pagpangitag romantikong relasyon,” nag-ingon ang mantalaan, “inay kay sa pagsulbad sa emosyonal nga mga suliran sa ilang kaminyoon.”

Mga Hagdan Peligroso

Ang paggamit ug hagdan “nagpahinabog mas daghang dili-makamatay nga mga samad matag tuig kay sa mga aksidente sa sakyanan,” nag-ingon ang magasin sa Tinipong Bansa nga The Week. Ang taho midugang: “Matag tuig, gibanabanang 1,091 ka Amerikano nga tiggamit ug hagdan ang mamatay ug 769,400 ang masamdan.” Unsay hinungdan sa sayop nga pagtikang nga moresulta sa pagkahulog? “Kasagaran, ang mga tawo masayop sa pagbanabana sa distansiya ug masayop sa pagtikang,” nag-ingon ang The Week.