Usa ka Gubat nga Nakabag-o sa Akong Kinabuhi

SUMALA SA GIASOY NI MICHAEL MOLINA

‘Gihatagan sa Republika sa Viet Nam si Petty Officer Molina ug Vietnam Cross of Gallantry,’ nagtaho ang mantalaan sa mga sundalo nga “Tester,” sa Maryland, U.S.A. ‘Wala magdugay si Molina nakadawat na usab ug laing medalya nga gold star ingong ikaduhang ganti nga Commentation Medal tungod sa iyang kaisog ug kamalanaton panahon sa usa ka grabeng engkuwentro. Sa Hunyo 6, 1968, nakadawat siya ug ikaduhang medalya nga gold star sa dihang iyang nasanta ang mga gerilyang Viet Cong sa pag-ilog sa usa ka hinungdanong kampo.’

TANAN-TANAN, ako nakalupad ug 284 ka misyon sa gubat ug nakadawat ug 29 ka medalya. Karon ako nag-alagad ingong Kristohanong ministro diha sa lahi nga matang sa pakiggubat, nga bahin niini ang Bibliya nag-ingon: “Ang mga hinagiban sa among pagpakiggubat dili unodnon.” (2 Corinto 10:4) Paasoya ako kon nganong nagbag-o ako sa akong kinabuhi.

Ang Chicago nga nahimutang sa amihanan sa Illinois, U.S.A., morag gihampak kanunay sa kusog nga hangin gikan sa Lake Michigan. Sa Pebrero 1, 1947, sa akong adlawng natawhan, ang hangin kusog kaayo ug ang panahon hilabihan usab ka tugnaw. Kay sundalo man ang akong amahan panahon sa Gubat sa Kalibotan II, duha ka doktor sa militar ang mitabang sa akong inahan sa pagpahimugso kanako. Sa nagdiyes anyos ako, ang among pamilya mibalhin sa Los Angeles, California, diin ang akong magulang nga lalaki ug babaye ug ako nagtungha sa usa ka Katolikong eskuylahan.

Ako nagdako nga nagsigeg dula ug besbol ug potbol sa mga karsada ug sa bakanteng mga lote, ug nagdula-dula ingong sundalo nga nagdalag pusil-pusil ug masinggan nga kahoy. Sa katuigan sa 1960, sa nagtungha ako sa hayskul, ang panghunahuna ug tinamdan sa mga tawo nausab pag-ayo. Ang pagpatay sa mga lider sa katilingban ug politika, lakip na ang pagpusil sa presidente sa Tinipong Bansa sa 1963, maingon man ang mga martsa sa pagprotesta, pagsunog ug bandera sa Amerika, ug ang mapintas nga mga demonstrasyon, maoy ordinaryo lamang nga panghitabo niadtong panahona. Sa eskuylahan, ako ug ang kadaghanan sa akong klasmet naguol nga marekluta sa pagkasundalo.

Wala magdugay human migraduwar sa hayskul sa 1966, gipatawag ako sa militar alang sa pisikal nga eksaminasyon, ug ako nakapasar niini. Apan, imbes sa armi nagparekluta, sa navy ako nagpalista. Kay interesado ako ug mga helikopter, miboluntaryo ako diha sa bag-ong armada sa mga helikopter sa navy. Sa Nobyembre 1967, human dayon sa pagbansay, ako nahiabot sa Saigon nga kaulohang siyudad sa Vietnam.

Unang Kasinatian sa Panggubatan

Wala magdugay, gipadala ako ngadto sa usa ka gamayng landiganan, diin didto dihay upat ka  Huey nga mga helikopter. Ang uban sa among grupo sa 30 ka marinero natulog sa landiganan, samtang ang uban kanamo gipapuyo sa dos-andanas nga bilding nga napulo ka milya ang gilay-on. Sa akong unang gabii, napugwat ako sa akong pagkatulog sa dihang nanglusot ang mga bala diha sa bilding. Miligid ako gikan sa akong teheras ug mihapa sa salog sa pipila ka segundo. Sa dihang nakadungog ako ug rinakrakay sa ibabaw, naghinay-hinay ako ug saka sa hagdanan ug nakaabot sa atop, diin dihay nagtunol kanako ug riple. Tibuok gabii kami nga nagrinakrakay, nga nagtiniil ug nagsul-ob lang ug kamisen ug purol.

Human sa tulo ka adlaw sa grabe nga ginubatay​—nalibotan ug nahimulag gikan sa uban​—kami nahutdan ug pagkaon ug tubig ug ang among mga bala hapit na usab mahurot. Ang komandante mimando, “Inigbanagbanag, managan kita paingon sa landiganan.” Gitabok namo ang gamayng lungsod nga nagkalayo pa. Among nadunggan ang paka-paka sa mga pusil ug ang buto-buto sa mga masinggan samtang nanagan kami diha sa lungsod. Didto nagpasad bisan diin ang mga patayng lawas.

Sa kataposan nakaabot ra kami sa landiganan, diin mao gihapon ang kahimtang. Among gikalotan ug mga trinsera ang palibot sa landiganan ug kami wala gayod moatras. Daghang higayon nga nakasulod ang mga Vietcong sa among gidepensahan nga lugar ug giatake ang among landiganan, nga nakapatay ug daghan, lakip na ang among komandante. Nagpabilin ako sa akong trinsera sa daghang semana nga walay ilis-ilis ug walay ligo-ligo. Dayon giebakwet kami pinaagig helikopter ngadto sa laing kampo.

Human niadtong unang mga adlaw sa gubat, porsigido ako nga mahimong mangrarakrak o gunner diha sa pultahan sa helikopter. Gihatagan ako ug pipila ka adlaw nga pagbansay ug nahimong membro sa usa ka tem sa sakyanan sa kahanginan. Ordinaryo na ang mga rinakrakay gikan sa itaas; usahay makaabot ako ug tulo o upat ka misyon sa usa ka adlaw.

Ang Epekto sa Gubat

Ako nalisang nga nakakita ug grabeng pinatyanay. Sa samang higayon, ako namalandong sa mga protesta batok sa gubat didto sa akong kaugalingong nasod. Dili ba nakiggubat kami alang sa kagawasan? Dili ba gipameligro namo ang among kinabuhi aron ang uban makabaton ug mas maayong kinabuhi? Bisan pa niana, ako naglibog kon makataronganon ba ang gubat. Kinsay makabenepisyo niini? Ang mga taga-Vietnam ba? Nag-antos na sila ug daghang tuig sa gubat bisan sa wala pa kami miabot. Karon midugang lamang hinuon ang kamatay ug pag-antos.

Batan-on pa ako ug wala makasabot sa politika nga nagpaluyo sa gubat. Wala usab akoy panahon sa paghunahuna bahin niana. Nahibalo lang ako nga may mga misyon ako sa paglupad ug pagtuman sa sugo tungod kay gibansay man ako alang niana. Ang mga marinero moingon, “Kita gibansay sa pagpakiggubat, dili sa paghunahuna.” Apan, gisaaran nako ang akong kaugalingon nga kon ugaling makapabilin akong buhi, mag-usisa gayod ako aron makabaton akog tubag kon nganong gisangka namo kining gubata.

Ang gubat sa Vietnam nakaladlad kanako sa usa ka butang nga dili ako andam sa pag-atubang​—droga. Sa batan-on pa, nanigarilyo ako, moinom ug  serbesa ug wiski matag hinapos sa semana, ug moadto ug mga parti. Apan wala pa gayod ako sukad makagamit ug mga droga. Sa Vietnam nabag-o ang mga butang. Ang pipila sa akong mga higala moingon: “Nganong dili ka man magdroga Mike? Mamatay ka ra man gihapon sa gubat.” Busa, usahay magdroga ako.

Apan, ang mga droga nga makahubog dili gayod angay gamiton panahon sa engkuwentro, ug nanumpa ako sa akong kaugalingon nga dili ako mogamit niini una pa makigsangka sa gubat. Apan, sa nakapauli na ako human sa gubat, nadala nako ang gana sa pagdroga, ug nalinga ako nianang kalibotana.

Sa Nakapauli Gikan sa Gubat

Sa dihang mipauli ako sa California gikan sa Vietnam sa Oktubre 1970, ang akong panglantaw sa kinabuhi nausab pag-ayo. Bisan pag misulod ako sa pagkasundalo aron sa pagtabang sa kawsa sa kagawasan, akong gibati nga ako gipahimudsan lang. Ako mipauli nga nasuko ug puno sa pagdumot. Lahi na ako ug dili na makinasodnon.

Tibuok adlaw ako nga magtabako ug marijuana ug naggamit ug ubang mga droga samtang mag-ayo-ayo sa akong motorsiklo sa garahe sa akong ginikanan. Ang akong pagpamalandong ug paghunahuna kanunay bahin sa nahitabo kanako sa Vietnam nakapasamot sa akong depresyon. Ang akong konsensiya nagsugod sa pagtulisok kanako. Nagkadako ang akong tinguha sa pagsusi sa katarongan sa Gubat sa Vietnam.

Gihatagan sa gobyerno ang mga beterano ug pinansiyal nga tabang aron makapadayon sa pagtungha, busa nagpalista ako sa kolehiyo sa siyudad ug sa ulahi nagpalista sa California State University sa Los Angeles. Didto nakahigala ako ug mga tawo nga nakaapil sa mga demonstrasyon batok sa gubat sa Vietnam, ug uban pa nga nalangkit sa gubat. Daghan kamig nahisgotan bahin sa gubat ug sa mga kahimtang sa kalibotan. Walay usa kanamo ang nakabaton ug makapatagbawng tubag; kami naglibog gayod.

Mga Paningkamot sa Pagtabang ug Pagpangitag Tabang

Sa pagkatinuod, daghan kanamo dunay problema sa emosyon ug sa hunahuna. Ako natukmod sa pagpaningkamot sa pagtabang. Busa nagtuon ako ug abnormal psychology. Kay nalangkit ako sa gubat ug pinatyanay, midesisyon ako sa pagbayad sa akong daotang nahimo. Busa, nagsugod ako sa pagtrabaho sa mga ospital sa mga buang.

Ang mga droga mapalit ug gigamit sa daghang estudyante sa unibersidad, ug akong nakita nga kini ang hinungdan sa daghang problema. Gusto ko nga mouswag sa akong mga pagtuon ug motabang sa naospital nga mga tawo nga dunay mga diperensiya sa hunahuna. Busa mihunong ako sa paggamit ug mga droga ug gigugol ang akong panahon ug kusog sa pagtuon ug pagtrabaho. Bisan pa niana, ingong sikoterapista, nakita nako nga limitado lamang ang akong mahimo sa akong mga pasyente nga may diperensiya sa hunahuna.

Kay bug-os nahigawad sa sistema sa mga butang ug sa akong gihasol nga konsensiya, nangita ako ug kahupayan sa akong kaguol. Nagsugod ako sa pag-ampo ug pagsimba. Ako wala kaayoy napupo nga maayo sa Misa sa Simbahang Katoliko. Busa magabii ako mosimba. Mosulod ako sa simbahan, magdagkot ug kandila, ug mag-ampo atubangan sa mga imahen. Lakip na niini ang imahen ni Jesus nga gilansang sa krus maingon man ang imahen ni Maria nga may baraw nga mitaop sa kasingkasing ug ubang mga imahen sa mga santos kono.

Ako namalandong: Pagkamakapasubo ug pagkaway-kinabuhi nga dapit ang simbahan! Ania ba gayod kaha dinhi ang espiritu sa Diyos? Ako nagkinahanglan ug mga tubag ug pagdasig. Daghang pag-antos na ang akong nakita. Busa, usa ka gabii niana migawas ako sa simbahan ug miadto sa parke aron mag-ampo. Mitan-aw ako sa mga bituon ug tingali sa unang higayon sa akong kinabuhi kinasingkasing nga nakigsulti ako sa akong Maglalalang.

Nakakat-on sa Kamatuoran sa Bibliya

Nagpahuwas ako sa presyur sa pagtrabaho sa ospital sa usa ka hinapos sa semana ug akong giduaw ang akong daang higala, si Gary. Usa ka adlaw niana kami didto sa iyang sala nga nagtan-aw ug TV. Ang balita maoy bahin sa pagtangtang kang Presidente Nixon sa katungdanan. Kami nag-estoryahay bahin sa korapsiyon sa tanang bahin sa kinabuhi, ug akong gihisgotan nga ako gipahimudsan lang maylabot sa gubat sa Vietnam.

Nadunggan kami ni Alva, nga asawa sa akong higala, ug siya migawas gikan sa kosina. Siya miingon nga ang mga hitabo sama niadtong among gihisgotan maoy katumanan sa tagna sa Bibliya. “Unsay kalabotan sa mga problema sa presidente sa tagna sa Bibliya?” nangutana ako. Si Alva misaysay nga sa  dili madugay ang Gingharian sa Diyos ilalom sa pagmando ni Kristo Jesus maoy mopuli sa tanang dunot nga mga gobyerno ug nga ang tawo makabaton ug kinabuhing walay kataposan nga malinawon diha sa usa ka yuta nga himoong paraiso. (Daniel 2:44; Pinadayag 21:​3, 4) Si Alva naghisgot bahin sa Pag-ampo sa Ginoo, nga niana kita naghangyo nga moabot ang Gingharian sa Diyos ug nga matuman ang kabubut-on sa Diyos dinhi sa yuta maingon man sa langit.​—Mateo 6:​9, 10.

Akong nasabtan nga nagkinahanglan gayod kita ug pagtultol sa Diyos aron makabaton ug mas maayong gobyerno ug tinuod nga pakigdait sa yuta. (Ecclesiastes 8:9; Jeremias 10:23) Mahitungod sa posibilidad nga mabuhi sa walay kataposan, akong nahinumdoman nga nakakat-on nga ang mga atomo nga naglangkob sa atong pisikal nga lawas mapulihan dayon. Bisag morag dili-katuohan ang pipila ka butang nga gisulti ni Alva, ang akong kaikag napukaw. Buot ko nga maghimayad sa daghang kadaot nga akong nahimo ug sa pagtabang sa paghupay sa pag-antos sa uban. Gisugyotan ako ni Alva sa pagtambong sa Kingdom Hall, diin daghan ako ug makat-onan.

Si Bill Akina maoy bug-os-panahong ministro sa kongregasyon. Siya usa ka navy panahon sa ikaduhang gubat sa kalibotan, busa nakasabot siya sa akong gibati. Labaw sa tanan, siya nahibalo bahin sa Bibliya, ug gitubag niya ug sa iyang asawa ang akong daghang pangutana pinaagi sa paggamit niini. Sa miuswag ang akong pagtuon uban kang Bill, akong nasabtan nga bisan pag maayo ang akong tuyo sa pagtabang niadtong nangaospital, temporaryong kahupayan lamang ang akong ikahatag kanila. Sa laing bahin, ang pagtabang sa mga tawo nga makabaton ug tukmang kahibalo bahin sa Bibliya magkahulogan ug kinabuhing walay kataposan alang kanila kon sila motuo ug magkinabuhi sumala niini nga kahibalo.​—Juan 17:3.

Gitun-an ako ni Bill sa Bibliya pinaagi sa paggamit sa giya sa pagtuon nga Ang Kamatuoran nga Motultol sa Kinabuhing Dayon. Ako gibawtismohan sa pagsimbolo sa akong pagpahinungod sa Diyos sa Hulyo 1974. Paglabay sa unom ka bulan nagpayunir ako, nga maoy pagtawag sa bug-os-panahon nga mga magmamantala sa mga Saksi ni Jehova. Kasamtangan, mihunong ako sa akong mga pagtuon sa unibersidad ug sa pagtrabaho sa ospital. Aron may ikasustento ako sa ministeryo, nagtrabaho ako ingong dyanitor nga naghinlo ug mga bangko magabii. (1 Tesalonica 4:11) Ang akong mga higala ug pamilya nagtuo nga nabuang na ako.

Human sa mga usa ka tuig nga pagpayunir didto sa California, gipamalandong nako kon sa unsang paagi magamit ako sa bug-os pa diha sa pag-alagad kang Jehova. Midesisyon ako nga himoon nakong tumong ang pagkahimong misyonaryo sa langyawng teritoryo. Human nag-alagad ingong payunir sa pipila ka tuig, nakadawat ako ug imbitasyon sa pagtungha sa Watchtower Bible School of Gilead, nga niadtong higayona nahimutang sa Brooklyn, New York. Usa ako sa mga estudyante sa ika-66 nga klase niana nga tunghaan ug migraduwar sa Marso 11, 1979, sa Long Island City, New York.

Nakadawat ug Lainlaing Asaynment

Ako giasayn sa Guatemala, sa Sentral Amerika, diin nag-alagad ako ingong misyonaryo sa mga usa ka tuig. Dayon gidapit ako sa pagtrabaho sa gamayng imprentahan sa sangang buhatan sa mga Saksi ni Jehova sa kaulohan, sa Guatemala City. Sa 1981, gipakaslan nako si Lupita nga usa ka payunir sa maong dapit ug siya gidapit sa pagduyog kanako diha sa sangang buhatan. Sa ngadto-ngadto, sa 1996, ang among imprentahan sa Guatemala gihunong sa dihang nagsugod kami sa pagkadawat sa tanan namong mga publikasyon gikan sa sanga sa Mexico.

Ang among anak nga babaye, si Stephanie, natawo sa 1984, bisan pa niana nagpadayon ako sa pag-alagad diha sa sangang buhatan. Bisan sa panahon nga nanganak si Lupita kang Mitchell sa 1987, nagpadayon gihapon ako sa pag-alagad didto. Kay layo man ug gipuy-an gikan sa sangang buhatan ug mobiyahe pag mga 10 kilometros paingon sa opisina matag adlaw, naglisod ako. Apan usa ka dakong pribilehiyo ang pag-alagad niining kapasidara, ug ang akong pamilya mapaluyohon kaayo.

 Si Lupita ug Stephanie karon mga payunir, ug si Mitchell maoy usa na ka bawtismadong ministro. Ang iyang pagtuon sa tunghaang bokasyonal matapos karong tuiga, ug ang iyang tumong mao ang pagsulod sa bug-os-panahong ministeryo. Ako nahibalo nga nakabaton kami niining talagsaong mga pribilehiyo, dili tungod sa mga abilidad, kondili tungod sa dili-takos nga kalulot ni Jehova. Usa siya ka mahigugmaong Diyos, ug iyang gamiton ang si bisan kinsa nga adunay mainandamong espiritu ug modangop kaniya sa pagtultol.

Usahay pangutan-on kami kon giunsa namo pagtigayon nga makabahin man kami sa bug-os panahon sa ministeryo ug sa samang higayon suportahan ang among kaugalingon. Kami dunay sekular nga trabaho panahon sa among bakasyon. Apan gawas pa niana, kami naningkamot gayod nga magbaton ug ‘simpleng mata’ kon bahin sa materyal nga mga butang, nga mangayo ug tabang ni Jehova, magbaton ug pagsalig kaniya, ug kanunayng mangita sa iyang pagtultol.​—Mateo 6:25-34; Proverbio 3:5.

Ang pagtakin-takin ug pistola nagpaisog kanako, busa akong nakita nga kinahanglang maningkamot kanunay nga mahimong mapaubsanon. Ang sistema sa mga butang ni Satanas nagtudlo kanako sa pagdumot ug sa pagpatay ug sa pagkahimong matahapon, agresibo, ug mapanagan-on. Apan gipakitaan ako ni Jehova ug kaluoy ug mahigugmaong kalulot, ug mapasalamaton kaayo ako niini. Karon ako determinado sa pagpadayon sa paghunong sa pagtuon sa pagpakiggubat ug sa pagbaton ug gugma ug kaluoy sa tanan.​—Mateo 5:43-45; Isaias 2:4.

Nalisdan ako sa paghimog mga kausaban. Apan, nakakat-on ako sa pagkahimong makigdaiton. Pinaagi sa tabang sa Diyos akong nasugakod ang mangil-ad nga mga damgo magabii tungod sa akong naagoman sa gubat. Ako nagpaabot gayod sa panahon dihang ang mga gubat ug panag-away mohunong na. (Salmo 46:9) Hangtod nga moabot kanang panahona, ako mapasalamaton sa higayon sa pag-alagad diha sa makaluwas-ug-kinabuhi nga buluhaton sa pagtabang sa mga tawo sa pagkakat-on bahin sa atong dakong Maghahatag ug Kinabuhi, si Jehova nga Diyos.

[Mga hulagway sa panid 12]

Gunner ako diha sa helikopter

[Hulagway sa panid 14]

Uban kang Bill Akina ug iyang asawa, si Eloise, sa 1978

[Hulagway sa panid 15]

Nagtrabaho sa imprentahan sa sanga sa Guatemala, sa 1982

[Hulagway sa panid 15]

Nagsangyaw uban sa akong asawa

[Hulagway sa panid 15]

Karon uban kang Lupita, Mitchell, ug Stephanie