Gikan sa Among mga Magbabasa

Mga Doktor Bag-o pa nakong nabasa ang serye nga “Pagsabot sa Imong Doktor.” (Enero 22, 2005) Salamat sa tin-aw nga paghubit sa mga pagbati nga maagoman sa mga doktor. Usa ako ka nars, ug personal nakong nakita ang dili-pagsinabtanay tali sa medikal nga mga kawani ug mga pasyente. Nanghinaot ako nga kining serye sa mga artikulo motabang sa daghang tawo nga mas masabtan ang medikal nga mga kawani ug pabilhan ang ilang trabaho.

L. K., Rusya

Giingnan ako sa usa ka doktor nga maikagon niyang gibasa ang magasin. Gidayeg niya ang gihimong panukiduki ug miingon nga bug-os siyang miuyon niining seryeha sa mga artikulo. Salamat niining nindot nga mga artikulo.

H. Z., Alemanya

Ingong usa ka pasyente, kanunay lang kong maghunahuna bahin sa akong kaugalingon. Apan kining magasina nakatabang kanako sa pagsabot sa kapit-os nga maagoman sa mga doktor. Sukad karon inig magpatambal ko, dili na ako basta maghisgot lang bahin sa akong sakit sumala sa akong kaugalingong panglantaw, kondili ako nang sundon ang tambag sa kahon nga “Pakigkooperar sa Imong Doktor.” Gusto nako nga mahimong usa ka mas masinabotong pasyente.

J. M., Japan

Ako usa ka Kristohanong ansiyano ug usa usab ka doktor. Ako ilabinang maluya sa emosyon tungod sa pag-atiman ug daghan kaayong makaluluoy nga mga pasyente kada adlaw. Ang pagkahimong usa ka Saksi ni Jehova nakatabang kanako sa pagdumala sa akong trabaho sa timbang nga paagi. Naningkamot ako sa pagkahimong episyente sa akong trabaho aron makabaton ako igong panahon sa balay alang sa akong asawa ug mga anak ug alang sa akong Kristohanong mga buluhaton. Ang magasing Pagmata! nakatabang kanako sa pagkahimong balanse ug sa pagpadayon sa paghatag ug pagtagad sa hinungdanon gayod nga mga butang.

P. R., Tinipong Bansa

Dili ako mouyon sa pahayag nga “ang ubang mga abogado magpasakag walay hinungdan nga mga sumbong aron makasapi.” Ang mga abogado kasagarang dili makakuwarta hangtod nga wala pay ipakanaog nga desisyon ang korte o hangtod wala pay gikauyonan ang matag kiliran. Aron makadaog sa kaso, kinahanglan nilang pamatud-an nga nalapas gayod ang naandang paagi sa pag-atiman. Sanglit ako nalangkit sa daghang kaso bahin sa sayop nga pagtambal sulod sa kapig 30 ka tuig, makaingon ko kaninyo nga mas daghan kog gidumilian nga mga kaso kay sa akong gidawat.

J. M., Tinipong Bansa

“Ang Pagmata!” nagtubag: Ang among pahayag nga “ang ubang mga abogado magpasakag walay hinungdan nga mga sumbong” wala maghisgot bahin sa pagkakaylap nianang buhata. Ang among gipasabot mao nga ang kasubsob sa pagdemanda tungod sa sayop nga pagtambal gikabalak-an gayod sa daghang doktor. Segurado nga ang maong walay-pasikaranang mga pagdemanda nagakahitabo gayod. Hinuon, adunay punto ang magbabasa. Ang sistema sa pamalaod adunay mga limitasyon nga nagpahimong dili praktikal—sayop pa gani—ang pagpasakag walay-hinungdan nga sumbong.

Mga Batan-on Nangutana Ako nag-edad ug 11 anyos. Ganahan kaayo ko sa artikulo nga “Mga Batan-on Nangutana . . . Unsay Angay Nakong Buhaton Kon ang Uban Motug-an sa Ilang mga Problema Kanako?” (Enero 22, 2005) Adunay batang babaye sa among tunghaan nga nakaagom ug makapasubong mga kasinatian sa kinabuhi, ug iya akong gisuginlan bahin nianang tanan. Nadugangan pa gayod ang iyang problema sa dihang ang iyang lolo namatay niining miaging semana. Daghan kong nakitang mga punto niining artikuloha nga makatabang kanako sa paghupay kaniya. Makapahupay kaayo kanako ang pagkasayod nga si Jehova nakasabot sa bug-os kon unsay naagoman sa mga batan-on.

A. H., Tinipong Bansa

Ako nag-edad ug 14 anyos, ug daghan sa akong mga kaedad ang moduol kanako alang sa tambag. Usahay ang ilang mga problema maoy bahin sa mga butang nga wala ako sa kahimtang nga motabang. Ayohon nako pagpasabot kanila kon nganong dili ako makatabang, ug usahay ipaambit nako ang pinasukad-sa-Bibliya nga impormasyon uban kanila. Karon ang akong mga kaedad mangutana kanako bahin sa akong relihiyon. Kini nagdasig kanako sa paggamit sa brosyur nga “Kinsa ba Gayod ang mga Saksi ni Jehova, ug Unsay Ilang Gituohan?” ingong ulohan sa pakigpulong nga giasayn kanako sa among klase.

B. D., Canada