Ang Hunahuna sa Bibliya

May Pagpihig ba ang Bibliya sa mga Babaye?

SI Tertullian, usa ka teologo sa ikatulong siglo, kas-a naghubit sa mga babaye ingong “ganghaan sa yawa.” Ang uban naggamit sa Bibliya sa paghulagway sa mga babaye ingong menos ug bili sa mga lalaki. Tungod niini, daghang tawo ang nagtuo nga may pagpihig ang Bibliya sa mga babaye.

Si Elizabeth Cady Stanton, ika-19 nga siglong tigpasiugda sa katungod sa kababayen-an sa Tinipong Bansa, nagtuo nga “ang Bibliya ug ang Simbahan maoy kinadak-ang babag sa kagawasan sa kababayen-an.” Mahitungod sa unang lima ka basahon sa Bibliya, si Stanton kanhi nag-ingon: “Wala akoy laing nahibaloan nga mga basahon nga bug-os nagtudlo bahin sa pagdominar ug pagpakaulaw sa babaye.”

Bisan pag pipila lang tingali karon ang naghupot nianang naghingaping panglantaw, daghan gihapon ang nagtuo nga gipaluyohan sa pipila ka bahin sa Bibliya ang pagpihig sa mga babaye. Husto ba ang maong konklusyon?

Kon sa Unsang Paagi ang mga Babaye Gilantaw Diha sa Hebreohanong Kasulatan

“Ang imong pangandoy maoy alang sa imong bana, ug siya magagahom kanimo.” (Genesis 3:16) Kini gisabot sa mga kritiko  ingong paghukom sa Diyos kang Eva ug ingong Iyang pag-uyon sa lalaki sa pagdominar sa babaye. Apan, inay usa ka pagpahayag sa katuyoan sa Diyos, kini maoy tukmang pag-asoy sa makapasubong mga sangpotanan sa sala ug pagsalikway sa pagkasoberano sa Diyos. Ang pag-abuso sa mga babaye maoy direktang resulta sa pagkadili-hingpit sa tawo, dili pagbuot sa Diyos. Diha sa daghang kultura, ang mga asawa gigamhan sa ilang mga bana, sagad sa mabangis nga mga paagi. Apan dili kini maoy katuyoan sa Diyos.

Si Adan ug si Eva gilalang sumala sa dagway sa Diyos. Dugang pa, sila parehong gisugo sa Diyos sa pagsanay, pun-on ang yuta, ug gamhan kini. Sila kinahanglang magtinabangay sa usag usa. (Genesis 1:27, 28) Tin-aw nga nianang panahona walay mapintasong naggahom sa lain. Ang Genesis 1:31 nag-ingon: “Nakita sa Diyos ang tanan nga iyang gibuhat ug, tan-awa! kadto maayo kaayo.”

Sa pipila ka kahimtang, ang mga asoy sa Bibliya wala magpaila sa panghunahuna sa Diyos sa usa ka butang. Kini igo lang nag-asoy ug kasaysayan. Ang asoy bahin sa pagtanyag ni Lot sa iyang mga anak nga babaye ngadto sa mga taga-Sodoma gitaho nga walay katin-awan kon nahiuyon ba kadto sa moralidad o gihukman ba siya sa Diyos. *—Genesis 19:6-8.

Sa pagkatinuod, gidumtan sa Diyos ang tanang matang sa pagpanglupig ug pag-abuso. (Exodo 22:22; Deuteronomio 27:19; Isaias 10:1, 2) Gihukman sa Moisesnong Balaod ang pagpanglugos ug prostitusyon. (Levitico 19:29; Deuteronomio 22:23-29) Gidili ang pagpanapaw, ug ang lalaki ug babaye nga naghimo niini parehong silotan ug kamatayon. (Levitico 20:10) Inay magpihig sa mga babaye, ang Balaod nagpasidungog ug nanalipod kanila batok sa kaylap nga pagpanglupig nga maoy kasagarang gihimo sa mga nasod diha sa ilang palibot. Ang takos nga Hudiyong asawa gitahod pag-ayo ug gipabilhan. (Proverbio 31:10, 28-30) Ang kapakyasan sa mga Israelinhon sa pagsunod sa mga balaod sa Diyos sa pagtahod sa mga babaye maoy ilang sala, dili pagbuot sa Diyos. (Deuteronomio 32:5) Sa kataposan, ang nasod sa katibuk-an gihukman ug gisilotan sa Diyos tungod sa ilang dayag nga pagkamasinupakon.

Ang Pagpasakop Nagpasabot ba ug Pagkamapihigon?

Ang bisan unsang sosyedad makaobra ug maayo kon adunay kahusay. Kini nagkinahanglan nga adunay magpatuman sa awtoridad. Ang kaatbang niana magpatunghag kagubot. “Ang Diyos usa ka Diyos, dili sa kasamok, kondili sa kalinaw.”—1 Corinto 14:33.

Si apostol Pablo naghubit sa kahikayan sa pagkaulo sulod sa pamilya: “Ang ulo sa matag lalaki mao si Kristo; sa baylo ang ulo sa usa ka babaye mao ang lalaki; sa baylo ang ulo ni Kristo mao ang Diyos.” (1 Corinto 11:3) Ang matag indibiduwal gawas sa Diyos magpasakop sa mas labaw nga awtoridad. Tungod kay si Jesus adunay gipasakopan nagpasabot ba kini nga siya gipihig? Wala gayod! Ang kamatuoran nga ang mga lalaki gitudlo sa Kasulatan nga maoy manguna diha sa kongregasyon ug sa pamilya wala magpasabot nga ang mga babaye gipihig. Aron ang pamilya ug ang kongregasyon magmalamposon, kinahanglang tumanon sa mga babaye ug mga lalaki ang ilang tagsatagsa ka papel nga may gugma ug pagtahod.—Efeso 5:21-25, 28, 29, 33.

Si Jesus nagtahod kanunay sa mga babaye. Siya midumili sa pagsunod sa mapihigpihigon nga mga tradisyon ug mga lagda nga gitudlo sa mga Pariseo. Siya nakigsulti sa dili-Hudiyong mga babaye. (Mateo 15:22-28; Juan 4:7-9) Siya nagtudlo sa mga babaye. (Lucas 10:38-42) Siya naghatag ug mga prinsipyo nga nanalipod sa mga babaye aron sila dili mahimong biniyaan. (Marcos 10:11, 12) Lagmit ang kinadak-ang kausaban sa iyang panahon mao ang pagdawat ni Jesus sa mga babaye nga mahimong iyang suod nga mga higala. (Lucas 8:1-3) Ingong hingpit nga larawan sa tanang hiyas sa Diyos, gipakita ni Jesus nga ang mga lalaki ug babaye managsama ug bili sa panan-aw sa Diyos. Sa pagkatinuod, taliwala sa unang mga Kristohanon, ang mga lalaki ug mga babaye nakadawat sa gasa sa balaang espiritu. (Buhat 2:1-4, 17, 18) Alang niadtong gidihogan, nga adunay paglaom nga moalagad ingong mga hari ug mga saserdote uban kang Kristo, wala na unyay kalainan sa sekso (gender) sa dihang sila banhawon na ngadto sa langitnong kinabuhi. (Galacia 3:28) Ang Awtor sa Bibliya, nga si Jehova, wala magpihig sa mga babaye.

[Footnote]

[Hulagway sa panid 18]

Dili sama sa kadaghanan sa iyang mga katalirongan, si Jesus nagtahod sa mga babaye