Pagwagtang sa Kal-ang—Ang Tinuod nga Solusyon

GATOSAN ka milyong tawo sa tibuok kalibotan ang naningkamot sa pagpanginabuhi matag adlaw bisan pa sa tumang kakabos. Dayag nga ang katawhan nanginahanglan ug usa ka matarong nga kagamhanan nga nagtinguha gayod sa pagwagtang niining kawalay-kaangayan. Kini nga kagamhanan kinahanglan usab nga adunay igong gahom sa pagpatuman sa maayong mga katuyoan niini. Kita ba realistikong makadahom nga ang mga tawo makapatunghag ingon niana nga kagamhanan?

Gipamatud-an sa kasaysayan nga tinuod ang pahimangno sa Bibliya: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan.” (Salmo 146:3) Nakaplagan ba nimo nga ang pagsalig sa tawhanong mga kagamhanan o mga lider sagad mosangpot sa kahigawad? Apan, kang kinsa pa man kita makadangop?

Sa pagkatinuod, milyonmilyong tawo ang nag-ampo alang sa usa ka matarong nga kagamhanan nga makausab sa dili-makiangayong kahimtang. Tingali ikaw usab nag-ampo sa sulondang pag-ampo nga gitudlo ni Jesus: “Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta. Ihatag kanamo karong adlawa ang among tinapay alang niining adlawa; ug pasayloa kami sa among mga utang, ingon nga kami nagapasaylo usab sa mga nakautang kanamo. Ug ayaw kami dad-a ngadto sa tentasyon, apan luwasa kami gikan sa usa nga daotan.”​—Mateo 6:9-13.

Kini ba nga Gingharian mao ang atong gikinahanglan? Kini ba usa ka matarong nga kagamhanan? Kini ba may igong gahom sa pagpatuman sa maayong mga katuyoan niini? Walay duhaduha nga makaingon kita nga oo! Ang Diyos nga nagpahiluna niini nga kagamhanan, ‘ang atong Amahan nga anaa sa mga langit,’ maoy “usa ka matarong nga Diyos ug usa ka Manluluwas,” kinsa ‘matarong sa tanan niyang mga buhat.’ (Isaias 45:21; Daniel 9:14) Mao kiniy giingon bahin kaniya: “Putli kaayo ang imong mga mata aron motan-aw sa daotan,” busa makaseguro kita nga ang iyang kagamhanan dili gayod mahimong hiwi. (Habacuc 1:13) Ug sanglit “ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya,” kita nasayod nga siya sa kadili-mapihigon interesado sa kaayohan sa matag tawo sa yuta.​—Buhat 10:​34, 35; Roma 2:11.

Natukod ug Naglihok Na!

Bisan tuod ang Gingharian sa Diyos maoy usa ka langitnong kagamhanan,  kini aktibong modumala sa mga kalihokan sa yuta alang sa kalamposan sa mga katuyoan sa Diyos. Lakip niini ang pagpuli sa dili-hingpit nga kagamhanan sa tawo uban sa hingpit nga kagamhanan sa Diyos. Ang Daniel 2:44 nagsaad: “Sa mga adlaw nianang mga haria [mga kagamhanan] ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino.”

Ubos sa pagdumala niini nga Gingharian, ang katuyoan sa Diyos sa kataposan matuman na sa langit ug sa yuta. Makapadasig gayod ang pagkasayod nga kini maoy usa ka kagamhanan nga makawagtang sa tanang timailhan sa pagkawalay-kaangayan nga sa nangagi nakaamot sa pag-ugmad sa dakong kal-ang tali sa mga adunahan ug sa mga kabos. Wala na unyay kahimtang nga pipila lang ka tawo ang adunahan ug daghan ang kabos.

Makapalipay gayod ang pagkasayod nga ang langitnong kagamhanan sa Diyos natukod na aron sa pagsulbad niining mga problemaha sa walay kataposan! Ang kronolohiya sa Bibliya ug ang mga hitabo sa kalibotan tin-awng nagpaila sa tuig 1914 ingong ang panahon sa dihang ang kagamhanan sa Diyos natukod na sa langit. * Busa, sulod sa halos usa ka siglo, kini aktibong nangandam alang sa pundasyon sa usa ka bag-ong kalibotan sa pagkamatarong.

Kadtong miila nga ang Gingharian natukod na ug kinsa matinumanong nagasunod karon sa pagtultol niini wala magmapihigon. Ang mga Saksi ni Jehova nagahimo sa ilang buluhatong pagsangyaw sa halos tanang nasod. Ang mga molupyo niining mga nasora, walay sapayan sa ilang pagkaadunahan o kakabos, gihatagan ug samang kahigayonan sa pagkat-on kon unsaon pagbaton ug kinabuhing walay kataposan. (Juan 17:3) Wala magsapayan ang mga Saksi sa mga kalainan sa kahimtang sa panalapi sa pagtino sa bili sa mga tawo diha sa ilang mga kongregasyon. Ang mga tawo gipabilhan dili tungod sa ilang nabatonang bahandi. Hinunoa, sila gitahod tungod sa kon kinsa sila. Maoy gipasiugdag dako ang ilang espirituwal nga mga hiyas kay sa ilang materyal nga mga bahandi.

Gusto ka bang makakat-on kon unsaon nimo pagkinabuhi ubos niining matarong nga kagamhanan? Nan susiha kini karon. Kat-oni kon sa unsang paagi makalaom ka sa pagtagamtam ug kalipay sa pagkinabuhi sa dihang ang kalibotan dili na mabahin tungod sa pagkaadunahan sa mga tawo.

[Footnote]

 [Kahon/Mga hulagway sa panid 8, 9]

Ang Tanan Managsoon, Adunahan man o Kabos

◼ Pagkahuman sa Gubat sa Kalibotan II, daghang Saksi ni Jehova sa Uropa ug Asia ang nanginahanglag pagkaon, besti, ug balay. Ang mga Saksi gikan sa ubang mga nasod nagpadala ug daghang besti ug pagkaon sa ilang espirituwal nga mga igsoon sa Uropa, Pilipinas, ug Japan. Ang mga Saksi sa Tinipong Bansa ug Canada miamot ug mga hinabang nga ipadala sa Alemanya, Austria, Belgium, Czechoslovakia (karon Czech Republic ug Slovakia), Gresya, Holland, Hungaria, Inglaterra, Italya, Pinlandia, Polandia, Pransiya, ug Romania.

[Mga hulagway]

Tinipong Bansa

Switzerland

Alemanya

◼ Ning bag-o pa, sa ting-init sa 1994, usa ka grupo sa boluntaryong mga Saksi gikan sa Uropa ang maikagong mitabang sa ilang Kristohanong mga igsoong lalaki ug babaye sa Aprika. Ang organisado kaayo nga mga kampo ug mga tambalanan gipahiluna alang sa mga kagiw gikan sa Rwanda. Daghan kaayong besti, habol, pagkaon, ug literatura sa Bibliya ang gipadala ingong hinabang sa kapin sa 7,000 ka mga kagiw​—halos tulo ka pilo sa gidaghanon sa mga Saksi ni Jehova sa Rwanda niadtong panahona.

 ◼ Duha ka tuig sa ulahi, sa 1996, ang gubat mibuto sa sidlakang bahin sa Demokratikanhong Republika sa Congo. Ang mga tanom sa uma nadaot, ang gipondong mga pagkaon gipangawat, ug ang suplay nga mga pagkaon ug kasangkapan gibabagan sa pag-abot. Kadaghanang tawo kas-a na lang makakaon sa usa ka adlaw, nga miresulta sa malnutrisyon ug sakit. Ang mga Saksi ni Jehova sa Uropa misanong dayon. Usa ka grupo sa mga Saksi, nga naglakip sa mga doktor, misakay ug ayroplano aron sa pagdalag tambal ug salapi. Pagka-Hunyo 1997, ang mga Saksi sa Belgium, Pransiya, ug Switzerland miamot ug 500 ka kilo nga tambal, 10 ka toneladang tugob-sa-protina nga mga biskuwit, 20 ka toneladang ubang pagkaon, 90 ka toneladang besti, 18,500 ka paris sa sapatos, ug 1,000 ka habol​—sa kantidad nga halos $1,000,000.

◼ Gawas pa sa pagtaganag materyal nga mga panginahanglan, ang mga Saksi ni Jehova ilabinang interesado sa pagtabang sa mga tawo sa espirituwal nga paagi. Mao kiniy hinungdan nga naninguha sila sa pagtukod ug mga Kingdom Hall aron gamiton ingong mga dapit sa pagtudlo sa mga tawo bahin sa Bibliya. Niadtong 1997, kini gitaho: “Pinaagi sa tabang sa mga igsoon sa ubang kanasoran, ang Sosyedad [sa Watch Tower] nakatabang sa pagtukod ug 413 ka bag-ong mga Kingdom Hall ug pagreper sa lain pang 727 sulod lang sa upat ka bulan sa 75 ka lainlaing nasod.” Pagka-2003, ang taho gihimo: “Lakip sa Uropanhong mga nasod nga nakabenepisyo gikan sa kahikayan sa pagtabang sa pagtukod ug mga Kingdom Hall sa mga nasod nga limitado ang salapi mao ang Romania, diin 124 ka Kingdom Hall ang natukod sukad sa Hulyo 2000. Ginamit ang susamang disenyo sa halos tanan nilang mga Kingdom Hall, ang Ukraine nakatukod ug 61 sa tuig 2001 ug dugang 76 pa sa 2002. Pinaagi sa salapi nga giamot ngadto sa Kingdom Hall Fund, gatosan ka Kingdom Hall ang natukod sa Bulgaria, Croatia, Macedonia, Moldova, Rusya, Serbia ug Montenegro.”

[Mga hulagway]

Croatia

Bulgaria

Romania

[Hulagway sa panid 7]

Usa ka boluntaryo nga nag-atiman sa duha ka ilo nga mga kagiw

[Credit Line]

© Liba Taylor/Panos Pictures

[Hulagway sa panid 10]

Ang mga Saksi ni Jehova nagamantala ug mensahe sa paglaom

[Hulagway sa panid 10]

Ang Gingharian sa Diyos magwagtang unya sa kakabos