Ang Siyensiya ug Bibliya Nakatabang Kanako sa Pagkaplag sa Katuyoan sa Kinabuhi

SUMALA SA GIASOY NI BERND OELSCHLÄGEL

Ang akong pagpangita sa katuyoan sa kinabuhi gidangtan ug 20 ka tuig. Duha ka butang ang nakatabang kanako sa pagkaplag niana: siyensiya ug ang Bibliya. Ang akong pagtuon sa siyensiya nagpamatuod nga ang kinabuhi aduna gayoy katuyoan. Apan ang Bibliya nagpadayag kanako sa maong katuyoan ug nagtabang kanako sa pagsabot niana.

LAGMIT nadungog na nimo ang pipila ka tawo nga nangangkon nga ang siyensiya kasumpaki sa Bibliya. Akong natun-an ang duha, ug ako dili mouyon sa ilang pangangkon. Tingali interesado kang mahibaloan kon ngano.

Natawo ako sa 1962 sa Stuttgart, usa ka siyudad sa habagatang Alemanya. Si Papa nagtrabaho ingong tigdisenyo ug makina, ug siya ug si Mama aktibo sa mga kalihokan sa simbahan. Si Karin, ang akong igsoong babaye, natawo upat ka tuig una kanako.

Ang usa ka hinungdanong hitabo sa akong pagkabata mao kadtong gihatagan ko ni Papa ug usa ka himan nga pang-eksperimento sa siyensiya. Nalingaw kaayo ko nga misulay sa paghimog yano nga mga eksperimento sa kemistriya ug pisika. Oo, makalingaw ang pagkat-on.

Sa ulahi, imbes himan nga pang-eksperimento, kompiyuter na ang akong gigamit. Bisan sa tin-edyer pa ko, akong nahibaloan nga ang kinamaayohang kompiyuter mao ang utok. Apan ako nahibulong: ‘Asa gikan ang utok? Kinsay naghatag niana kanato? Ug unsay katuyoan sa kinabuhi?’

Ang Pagpangagpas sa Taas nga Edukasyon

Ako miundang pagtungha sa edad nga 16 anyos ug misugod sa pag-aprentis isip katabang sa letratista sa pagdebelop ug mga letrato. Tungod kay ang pagtuon  maoy butang nga akong gikalingawan pag-ayo, ang akong tumong mao ang pagtuon ug pisika diha sa usa ka unibersidad. Apan wala dayon ko makaeskuyla sa unibersidad. Gidangtan ug lima ka tuig una ako mikuwalipikar nga mosulod sa unibersidad. Akong gisugdan ang akong pag-eskuyla sa unibersidad sa Stuttgart sa 1983, ug akong gipadayon ang akong pagtuon didto sa Munich. Sa kataposan, ako nahimong doktor sa pisika sa University of Augsburg sa 1993.

Ang akong unang mga adlaw sa unibersidad dili sayon. Ang awditoryum diin gihimo ang lektyur kasagarang mapuno sa mga 250 ka estudyante, nga kadaghanan kanila miundang pagtungha paglabay sa pipila ka bulan. Ako determinado nga dili moundang ug taposon ang akong gisugdan. Sa pagpuyo diha sa dormitoryo sa mga estudyante, akong nakauban ang daghang batan-on nga morag interesado lang sa paglipaylipay. Ang pagpakig-uban sa maong mga batan-on dili gayod mapuslanon. Tungod niana, ako nalangkit sa mapatuyangong mga parti ug migamit ug droga.

Tungod sa Akong Pagpangita, Nakaabot Ako sa India

Tungod sa akong pagtuon ug pisika, mas nasabtan nako ang kinaiyanhong mga balaod sa uniberso. Ako nagdahom nga ang siyensiya sa ngadtongadto magpadayag kanako kon unsay katuyoan sa kinabuhi. Apan, ang akong pagpangita sa katuyoan sa kinabuhi wala ikapatin-aw sa pisika. Sa 1991, ako mibiyahe uban sa usa ka grupo ngadto sa India aron sa pagtuon ug meditasyon sa Oriente. Pagkanindot nga kasinatian nga makita ang maong nasod ug ang mga tawo niini! Apan ako nakurat sa kalainan tali sa dato ug pobre.

Pananglitan, duol sa siyudad sa Pune, among giduaw ang usa ka guru (relihiyosong magtutudlo) nga nag-ingon nga ang pagkakat-on sa hustong mga pamaagi sa meditasyon makatabang sa usa nga modato. Among gihimo ang meditasyon ingong grupo kada buntag. Ang guru namaligya usab ug tambal nga mahal kaayo. Klaro nga dako siyag kita; makita kana sa iyang estilo sa kinabuhi. Nakakita usab kamig mga monghe nga nagpuyo sa kakabos, nga kasukwahi sa guru. Nakapangutana ko sa akong kaugalingon, ‘Ngano man nga ang meditasyon wala makapadato kanila?’ Ang akong biyahe sa India nagpatungha na hinuon ug mas daghang pangutana kay sa natubag niini.

Ang usa sa mga sobenir nga akong nadala gikan sa India mao ang usa ka kampanilya nga gamiton sa meditasyon. Giingnan ko nila nga kon bagtingon sa hustong paagi, ang tilingtiling sa kampanilya motabang kanako sa paghimo sa meditasyon sa hustong paagi. Pagbalik nako sa Alemanya ako mipalit ug horoskopyo nga gidisenyo sa usa ka tawo nga nag-angkon nga makatag-an sa akong kaugmaon. Apan ang pagbatasan sa meditasyon wala magpadayag kanako ug bisan unsa bahin sa kinabuhi. Sa kahigawad akong nadiskobrehan nga ang horoskopyo mao lamay walay-pulos nga piraso sa papel. Busa wala matubag ang akong mga pangutana bahin sa katuyoan sa kinabuhi.

Akong Nakaplagan ang mga Tubag Diha sa Bibliya

Kalit nga nausab ang akong kinabuhi sa 1993. Ako nang nakompleto ang akong pagtuon ug pagpanukiduki ug nagkamulo na pagsulat sa akong doctoral thesis bahin sa quantum physics. Aron mahuman kini sa gitagal nga panahon, ako kining gitrabaho halos adlaw ug gabii, nga napasagdan na ang uban pang mga kalihokan. Sa kalit lang usa ka hapon niana, may nanuktok sa pultahan. Pag-abli nako dihay duha ka babaye.

“Nahibalo ka ba nga ang tuig 1914 maoy espesyal kaayo nga tuig sumala sa Bibliya?” nangutana sila. Nakalitan ko sa maong pangutana. Wala pa gayod ako makadungog sukad ug ingon niana; ni may panahon ako sa pagsusi bahin niana. Apan,  naikag ako sa maong pangutana. Ngano god nga nakaingon man sila nga ang Bibliya dugay nang nagpunting sa 1914 ingong tiniman-ang tuig?

“Gusto ba nimong mahibalo ug dugang bahin niana?” nagpadayon sila sa pagpangutana. Sa akong hunahuna, kon mamati ko sa ilang isulti, segurado nga makakita akog panagsumpaki sa ilang mga argumento. Apan, imbes makakitag panagsumpaki, akong nakaplagan ang makapakombinsir nga pamatuod sa pagkakasaligan sa Bibliya. Akong nakat-onan nga ang tagna sa Bibliya klarong nagpaila nga ang Mesiyanikong Gingharian sa Diyos—usa ka langitnong kagamhanan nga sa ngadtongadto magmando sa tibuok yuta—gitukod niadtong 1914. *

Ang mga babaye maoy mga Saksi ni Jehova, ug gihatagan ko nila ug kopya sa librong Ikaw Mabuhing Walay Kataposan sa Paraiso sa Yuta. * Ako kadtong gibasa sulod sa pipila ka adlaw ug akong nakaplagan nga ang impormasyon maoy lohikal ug makataronganon. Ginamit ang Bibliya, gipakita kanako sa mga Saksi nga kabubut-on ni Jehova nga ang mga tawo mabuhi sa walay kataposan sa paraiso sa yuta. Sumala sa tagna sa Bibliya, kining maong saad matuman sa dili madugay. Pagkanindot nga paglaom sa umaabot! Kining maong paglaom nakatandog sa akong kasingkasing ug nakapalugmaw sa akong mga luha. Mao na kaha kini ang akong gipangita sa miaging 20 ka tuig?

Ako dayong naila ang katuyoan sa akong kinabuhi: ang pagkaila kang Jehova nga Diyos ug pag-alagad kaniya nga tibuok kasingkasing. Akong gipadayon ang akong pagtuon sa Bibliya uban sa mga Saksi ni Jehova, nga nakasabot nga ang akong gitun-an mao ang kamatuoran. Ang akong kauhaw sa espirituwal nga mga butang halos dili matagbaw. Samtang gikompleto nako ang akong doctoral thesis, akong nabasa ang katunga sa Bibliya sulod sa tulo ka bulan.

Pagkakaplag ug Dugang mga Tubag

Sa Mayo 1993, ako mitambong sa akong unang tigom diha sa lokal nga kongregasyon sa mga Saksi ni Jehova sa Augsburg. Ang mga pagtulon-an nga akong nadungog nagpadayag nga kini mao ang kamatuoran. Dugang pa, tawhay ang akong pamati uban sa mga Saksi. Ila kong gitimbaya nga mainiton ug giabiabi pag-ayo, bisan tuod ako usa ka estranyo. Usa ka tigulang nga babaye ang mitupad nako ug mao pay mikuha ug songbok alang nako. Sa misunod nga mga semana, ang usa ka lalaking Saksi ug ang iyang batan-ong anak nga lalaki nagpasakay kanako sa ilang kotse paingon sa Kingdom Hall. Kining bag-ong mga higala sa wala madugay nangimbitar nako sa ilang balay. Sa ngadtongadto gusto na nakong ipaambit sa uban ang akong nakat-onan bahin sa katuyoan sa kinabuhi.

Ang kinasingkasing nga pagsunod sa akong nakat-onan gikan sa Bibliya nagtukmod kanako sa paghimog mga kausaban sa akong kinabuhi. Pananglitan, dili na ko gustong maghupot ug mga butang nga konektado sa okultismo. Busa akong gilabay ang akong horoskopyo maingon man ang kampanilya para sa meditasyon ug ang ubang relihiyosong mga sobenir gikan sa India. Miuswag ang akong pagtuon sa Bibliya, ug akong gipahinungod ang akong kinabuhi kang Jehova nga Diyos, nga nagpabawtismo ingong usa sa mga Saksi ni Jehova sa Munich niadtong Hunyo 1994. Sa pagbuhat niana kinasingkasing nakong gisagop ang tinuod nga katuyoan sa kinabuhi.

Sa Septiyembre 1995, ako nagregular payunir, usa ka bug-os-panahong ministro sa mga Saksi ni Jehova. Kini nagpasabot ug paggugol ug dugang panahon sa pagpakigsulti sa mga tawo bahin sa mga katuyoan sa Diyos. Aron mabuhat kini ako misalig sa kusog nga gihatag ni Jehova. Makadaghan akong mouli sa balay sa gabii human sa paggugol ug daghang oras diha sa ministeryo, nga mobati ug kalipay ug katagbawan nga wala pa gayod nako maeksperyensiyahi sa wala pa nako mailhi si Jehova. Sa Enero 1997, ako gidapit nga magpadayon  sa akong bug-os-panahong pag-alagad sa sangang buhatan sa mga Saksi ni Jehova sa Selters, Alemanya, nga gitawag ug Bethel, diin ako nagpuyo karon. Ang akong mga ginikanan makadaghan nang miduaw kanako, ug bisan tuod dili kami parehas ug relihiyosong pagtuo, sila adunay pagtamod sa Bethel ug nalipay nga ako ania dinhi.

Siyensiya ug ang Bibliya

Ang uban mahibulong tingali kon ngano nga ang usa ka tawo nga nakagugol ug daghang tuig sa pagtuon sa siyensiya makatuo sa giingon sa Bibliya. Aw, wala akoy nakita nga panagsumpaki tali sa siyensiya ug sa Bibliya. Ingong pisiko, akong natun-an ang mga balaod nga naggahom sa kinabuhi, ug kining mga balaora naghatag ug pamatuod nga kini gidisenyo sa labaw-tawhanong intelihensiya.

Pananglitan, dunay daghang teoriya sa pisika, kemistriya, ug biolohiya. Ug bisan tuod ang mga teoriya yano lang tingali kaayo, ang matematika nga nalangkit niana komplikado kaayo. Ang intelihente kaayo nga mga siyentipiko nagduso ug mga teoriya ug gigantihan ug Nobel Prize tungod sa ilang trabaho. Apan mas labaw pang intelihente ang Persona nga nagdisenyo ug naglalang sa uniberso, nga gipaningkamotan pag-ayo sa mga siyentipiko nga masabtan!

Ang pangangkon sa daghang ebolusyonista nga ang kinabuhi mitungha nga sulagma dili gayod katuohan. Sa pag-ilustrar: Linyaha ang napulo ka bola sa saker diha sa dulaanag saker, nga ang matag bola usa ka metros ang distansiya sa usag usa. Pinaagi sa pagpatid sa unang bola, paningkamoti nga maigo sa matag bola ang nagsunod nga bola, aron ang napulo ka bola maigo. Dugang pa, tag-ana ang posisyon sa bola human niana. Ang purohan nga molampos ka gamay kaayo nga kadaghanang tawo lagmit mag-isip niana nga imposibleng mahitabo.

Kon mao kana, sa unsang paagi si bisan kinsa makapangangkon nga ang pagkaugmad sa selula sa tawo—nga naglangkit ug mga proseso nga mas komplikado kay sa pagpatid ug mga bola sa saker—nahitabo nga sulagma lamang? Ang labing makataronganong katin-awan mao nga ang usa ka intelihente kaayong Persona naglalang sa mga tawo ug sa tanang matang sa kinabuhi dinhi sa yuta. Kini bang maong Persona, kinsa mao ang Maglalalang, mohimo niana nga walay katuyoan? Siyempre dili. Aduna gayod siyay katuyoan, ug ang maong katuyoan gipadayag ug gipasabot diha sa Bibliya.

Sa imo nang nahibaloan, ang siyensiya ug Bibliya nakatabang kanako sa pagkaplag ug mga tubag sa dugay na nakong mga pangutana bahin sa kinabuhi. Mahanduraw ba nimo ang dako kaayong kahupayan ug kalipay nga imong bation sa dihang makaplagan nimo ang usa ka butang nga imong gipangita kapin na sa 20 ka tuig? Maoy akong tinguha nga tabangan ang mas daghan pang tawo kutob sa mahimo nga makaplagan ang akong nakaplagan karon—dili lamang ang mga tubag sa akong mga pangutana kondili, mas hinungdanon pa, ang hustong paagi sa pagsimba sa bugtong matuod nga Diyos, si Jehova!

[Mga footnote]

[Blurb sa panid 14]

Ingong pisiko, ako nagtuon sa mga balaod nga nagmando sa kinabuhi, ug kining mga balaora naghatag ug pamatuod nga kini gidisenyo sa usa ka labaw-tawhanong intelihensiya

[Hulagway sa panid 12]

Sa dihang ako 12 anyos

[Hulagway sa panid 13]

Sa akong pagpangita sa katuyoan sa kinabuhi, ako midangop sa meditasyon sa Oriente

[Hulagway sa panid 15]

Ang pagsangyaw sa uban naghatag kanako ug tinuod nga kalipay ug katagbawan

[Credit Line]

Cover of book: J. Hester and P. Scowen (AZ State Univ.), NASA