Daghag Kapilian, Walay Katagbawan?

ANG mga tawo karon sa Tinipong Bansa “mas daghan ug kapilian sa daghang bahin sa kinabuhi kay sukad masukad,” nag-ingon ang usa ka artikulo sa magasing Scientific American. Tinuod kini maylabot sa mga kapilian sa mga palaliton, serbisyo, trabaho, ug bisan sa personal nga mga relasyon. Kon buot hunahunaon ang mas dakong kagawasan sa pagpili moresulta sa mas dakong katagbawan sa kinabuhi. Apan, sa katingalahan kini kasagarang mosangpot sa kagul-anan. Sa unsang paagi?

Ang artikulo nag-ingon nga ang mga batasan maylabot sa pagpili makaapektar sa kalipay sa usa. Pananglitan, ang pipila mogugol ug dakong panahon ug maningkamot gayod sa pagpili sa kinamaayohang produkto pinaagi sa pagbasa ug maayo sa impormasyon diha niana ug sa pagsusi sa bag-ong mga produkto, ug dayon ilang itandi ang ilang napalit sa napalit sa uban. Ang ubang mga pumapalit kontento na nga makapalit ug “arang-arang” nga produkto, bisag dunay mas maayong kapilian. Ang maong mga indibiduwal mohunong na sa pagpamili kon makita na nila ang ilang gikinahanglan.

Tin-aw nga kadtong gusto gayod ug kinamaayohan malisdan sa pagpili kon magkadaghan ang kapilian. Dayon, sa dihang makapili na sila, nag-ingon ang Scientific American, “anugonan sila sa mga butang nga wala na nila masusi.” Tungod niini, sila “walay katagbawan sa kinabuhi ug dili malipayon, dili malaomon ug mas magul-anon.” Unsay atong ikahinapos? “Adunay maayong katarongan sa pagtuo,” nag-ingon ang artikulo, “nga ang daghan kaayong kapilian labing menos makaamot sa kaylap nga pagkawalay kalipay karon sa modernong katilingban.”

Apan, ang mga tigdukiduki sa pagtuon nag-ingon nga ang kapit-os nga nalangkit sa pagpili mahimong mamenosan. Sa unsang paagi?

● Mahimong mohukom kita nga limitahan ang atong mga kapilian kon kini dili kaayo importante. Pananglitan, paglagda sa imong kaugalingon sa pag-adto sa duha lang ka tindahan sa dihang mamalit ug sinina.

● Pilia ang mga butang nga makatagana sa imong mga panginahanglan inay pangitaon ang ‘kinamaayohan’ nga talagsa rang makita. Dayon ayaw na kana hunahunaa.

● Ayaw hunahunaa kon unsa ka madanihon ang mga butang nga wala nimo pilia. Bansaya ang imong kaugalingon sa paghunahuna sa mga bentaha sa imong napili.

● Ang kasagarang panultihon mao nga “Ayaw pagdahom ug hinobra aron dili ka mahigawad.” Apan kana nga tambag maalamon kon buot nimo nga mas matagbawon sa kinabuhi.

[Credit Line sa panid 31]

Reperensiya: Scientific American