Gikan sa Among mga Magbabasa

Kahupayan Ang seryeng “Kahupayan Gikan sa Kapit-os!” tukma kaayo sa panahon alang kanako! (Pebrero 8, 2005) Ang mga artikulo miabot sa dihang abi nakog hapit na akong ma-nervous breakdown tungod kay wala ako makasagubang ug maayo sa kapit-os. Ang mga sugyot nga inyong gitagana dako kaayog epekto sa akong kinabuhi.

Ngalan wala ibutyag, Tinipong Bansa

Di pa dugay ako gidayagnos nga may depresyon. Busa ang pahayag nga “Dili daotan nga atimanon nimo ang imong kaugalingong mga panginahanglan” nakapalig-on kanako. Akong gipabilhan ang gihisgotan bahin sa ‘pagtigom ug kusog.’ Ako naguol pag-ayo, apan akong paningkamotan nga ilhon ang akong mga limitasyon sukad karon.

Y. O., Japan

Mao pay akong pagbalik gikan sa usa ka seminar diin ako naghatag ug mubong presentasyon bahin sa pagsagubang sa kapit-os. Ako nakahisgot bahin sa mga hinungdan sa kapit-os ug sa mga epekto niini, maingon man kon unsay makatabang—tanan gipasukad niining nindot nga magasin!

J. L., Alemanya

Cellphone Salamat sa artikulo nga “Cellphone—Higala o Kaaway?” (Pebrero 8, 2005) Ako 14 anyos, ug ako nagdepende pag-ayo sa akong cellphone. Ang artikulo nakatabang kanako sa pagsabot nga ang cellphone dili angay nga maoy labing hinungdanong butang sa akong kinabuhi, ilabina kon tagdon ang posibleng mga epekto diha sa panglawas. Salamat sa inyong makaiikag nga mga artikulo.

M. B., Romania

Mga Harp Seal Buot nakong ipahayag ang akong kinasingkasing nga apresasyon sa makalingaw ug matulon-anon nga mga artikulo sa Pagmata! Human mabasa ang artikulong “Mga Itoy sa Niyebe sa Magdalen Islands,” ako nalingaw gayod niining himos nga mga mananap. (Enero 8, 2005) Ang mga hulagway nakatabang kanako sa pagsabot sa ilang makaiikag nga pagtubo. Gawas nga natukmod ako sa pagpasalamat kang Jehova, kinsa naglalang niining mga mananapa, ang artikulo nakapalig-on sa akong tinguha sa pagpuyo sa Paraiso. Ako may makapaguol nga mga suliran, ug dili nako ikahubit kon sa unsang paagi kining makapalipay nga artikulo nakadasig gayod kanako. Palihog padayona ang pagpatik ug mga artikulo nga sama niini.

N. S., Japan

Kabayo sa Dagat Nadawat nako ang inyong magasin gikan sa mga Saksi ni Jehova, ug gusto nakong magpasalamat sa artikulong “Nanagsayaw nga mga Kabayo sa Dagat.” (Disyembre 22, 2004) Di pa dugay nakadawat akog taas nga grado sa akong asaynment sa eskuylahan mahitungod sa mga kabayo sa dagat human gamita ang impormasyon sa inyong artikulo. Tungod sa magasing Pagmata!, mas daghan akog nakat-onan bahin sa siyensiya ug teknolohiya—ug ilabina mahitungod sa Diyos. Mga Saksi ni Jehova, salamat sa inyong ekselenteng mga magasin!

T. P., Indonesia

Nahisulat Na . . . Ako nalipay gayod nga nakabasa sa artikulong “Nahisulat na nga Ako Unya Siyang Makita”! (Disyembre 22, 2004) Ako 11 anyos, ug hangtod karon wala akoy kaisog sa pagsulti sa uban bahin sa Gingharian sa Diyos. Apan human mabasa ang sugilanon sa kinabuhi ni Rosalía Phillips, ako nakaamgo nga si Jehova motabang kanako. Gusto ko nga mahimong maisogong magmamantala sa maayong balita sama ni Rosalía.

P. P., Polandia

Ako 27 anyos, ug 24 ka tuig kanhi namatay ang akong inahan. Sukad nga ako nahimong usa ka Saksi ni Jehova, hugot ang akong paglaom nga makita pa siya pag-usab. Ako mapasalamaton kaayo sa mga artikulong sama niini—mapasalamaton kang Jehova, sa Pagmata!, ug kang Rosalía sa pagpaambit kanamo sa iyang nindot nga kasinatian.

A. F., Venezuela