Mga Batan-on Nangutana . . .

Kinahanglan ba Kaming Magpakasal sa Naandan nga Paagi?

“Ang akong trato, si Cindy, maoy unang naghisgot bahin sa posibilidad nga magpakasal diha sa usa ka pribadong seremonya, nga dili magpahibalo sa among mga higala ug mga paryente. Human mahisgotan kini, among gibati nga ang pagpakasal niining paagiha dili kaayo makahurot ug daghang panahon ug kusog ug dili kaayo makatensiyon.”—Allen. *

KON ikaw anaa na sa hustong edad nga magminyo ug aduna nay trato, tingali mas gusto ka ug pribadong kasal. Sa pipila ka kahimtang ang managtrato basin mas gustong magtaban ug magpakasal nga dili magpahibalo sa ilang mga ginikanan. Unsang mga prinsipyo ang makatabang kanimo sa pagdesidir kon unsay buhaton?

Hinungdanon ba Gayod ang Pagsunod sa Naandang Paagi?

Bisan tuod ang kaminyoon komon diha sa kadaghanang kultura, ang mga kostumbre maylabot sa seremonyas sa kasal nagkadaiya gayod. Alang sa mga managtrato nga Kristohanon, ang pagsunod sa tanang lokal nga kostumbre sa kasal dili mao ang labing hinungdanong butang. (Roma 12:2) Hinunoa, ang ilang pangunang tinguha mao nga ang ilang panagtrato ug kaminyoon makahatag ug kadungganan kang Jehova nga Diyos.—1 Corinto 10:31.

Sanglit ang kaminyoon dungganon nga kahikayan, kini dili gustong isekreto sa kadaghanang managtrato. Diha sa daghang nasod, ang managtrato nga mga Saksi ni Jehova kasagarang magpakasal diha sa ilang lokal nga Kingdom Hall. * Human niana, lagmit gusto nilang makauban ang ilang pamilya ug mga higala sa usa ka salosalo ug tingali gamayng kalingawan. Ang maong mga okasyon dili kinahanglang engrande. Apan, dili ikalimod nga ang pag-organisar ug kasal ug salosalo makatensiyon ug gastoso kaayo. Pananglitan, sa Tinipong Bansa, ang mga salosalo sa kasal kasagarang mokabat ug libolibo ka dolyares.

Aron mamenosan ang tensiyon ug gastos, ang ubang managtrato nakadesisyon sa pagpasimple sa ilang kasal. “Among giingnan ang among mga ginikanan nga kami dili magpakasal sa naandang paagi,” matod ni Cindy, “kay gusto namo nga kini  simple lang ug dili gastoso. Gipasaligan kami sa akong mga ginikanan nga sila nakasabot sa among kahimtang ug gitahod nila ang among desisyon. Sila mapaluyohon kaayo.” Sa laing bahin, sa dihang ang trato ni Cindy nga si Allen, nga gihisgotan sa sinugdan, mibutyag sa ilang mga plano sa kasal ngadto sa iyang mga ginikanan, sila naglisod sa pagsabot sa desisyon ni Allen ug Cindy. “Sila nagtuo nga duna silay nahimong sayop nga tungod niana nakadesisyon kami sa pagpasimple sa among kasal,” matod ni Allen. “Apan dili kana tinuod.”

Basig mahiubos usab ang imong mga ginikanan kon himoon nimong simple kaayo ang imong kasal, kay basin gusto nila nga daghan ang makaambit sa ilang kalipay nianang espesyal nga adlaw. Apan, komosta kon ikaw naghunahuna sa pagpakasal nga dili magpahibalo sa imong mga ginikanan tungod kay nasayod ka nga supak gayod ang imong pamilya sa imong pagminyo?

Tagda ang Pagbati sa Imong Pamilya

Ang imong mga ginikanan basin supak sa imong pagminyo tungod kay gibati nila nga ikaw bata pa kaayo aron mohimog hinungdanong desisyon nga sama niini. Basin nabalaka sila nga ang imong mga prioridad mausab samtang ikaw nagkahamtong ug nga magbasol ka unya sa imong gipili nga minyoan. O kaha, nasayod sila nga ikaw anaa na sa hustong edad nga magminyo, apan sila may nakitang dili maayong kinaiya sa imong hinigugma. O basin did-an ka nila sa pagminyo tungod kay ang imong gipili nga minyoan dili sama nimog relihiyon.

Kon ang imong mga ginikanan matuod nga mga Kristohanon, lagmit aduna silay binase-sa-Bibliya nga mga katarongan nga mabalaka. Angayan lang nga ilang ipahayag ang ilang mga pagduhaduha. Sa pagkatinuod, isipon sila ni Jehova nga nagpabaya ug dili-mahigugmaon kon dili nila ipahayag ang ilang kabalaka. Ug ikaw makabenepisyo kon ikaw mamati sa ilang opinyon.—Proverbio 13:1, 24.

Sa pag-ilustrar: Kon mopalit ka ug sinina, lagmit mangutana ka sa uban kon kini mobagay ba kanimo. Tingali dili ka mouyon sa ilang opinyon sa tanang higayon, apan ikaw magdahom gihapon nga sultihan ka sa imong suod nga mga higala kon ang sinina dili eksakto kanimo o dili ka angayan niini. Imong pabilhan ang ilang isulti, kay kini makatabang kanimo nga dili mag-usik ug kuwarta. Nan, ilabina gayod nga angay nimong pabilhan ang opinyon sa imong pamilya bahin sa imong pagpili ug kapikas sa kaminyoon. Ang sinina mahimo nimong bayloan o isalibay, apan si Jehova naglaom nga ikaw mounong sa imong kapikas sa tibuok nimong kinabuhi. (Mateo 19:5, 6) Kon mopili ka ug kapikas nga dili mobagay sa imong personalidad ug espirituwalidad, mas dako gayod ang mahimong problema kay sa pagsul-ob lang ug dili-eksakto nga sinina. (Genesis 2:18; Proverbio 21:9) Ug tungod niini, basin mawad-an kag kahigayonan nga makakaplag ug tinuod nga kalipay.—Proverbio 5:18; 18:22.

Tinuod, hinakog tingali ang katarongan sa ubang mga ginikanan kon nganong sila supak sa kaminyoon sa ilang anak—pananglitan, aron padayon nilang makontrolar ang ilang anak. Apan, sa dili ka pa moingong hinakog ang kabalaka sa imong mga ginikanan ug dayon sekretong magpakasal, nganong dili nimo analisahon ang katarongan sa ilang pagsupak niini?

Mga Hinungdan sa Pagbantay

Tinuod gayod nga ang imong mga prioridad mausab samtang ikaw nagkahamtong. “Sa dihang ako bata pa,” misulat si apostol Pablo, “ako nagasulti ingon sa usa ka bata, naghunahuna ingon sa usa ka bata, nangatarongan ingon sa usa ka bata; apan karon nga ako hingkod na, ako nang giwagtang ang mga kinaiya sa usa ka bata.” (1 Corinto 13:11) Sa samang paagi, ang mga kinaiya nga ganahan nimo sa ubang tawo sa dihang ikaw tin-edyer pa tingali mausab sa dihang ikaw hamtong na. Busa, ang Bibliya nag-awhag kanimo sa paghulat hangtod nga ikaw “lapas na sa pagbuswak sa pagkabatan-on”—ang mga tuig sa dihang kusog kaayo ang imong pangibog sa sekso—una ka mohimog seryosong lakang sa pagpili ug kapikas sa kaminyoon.—1 Corinto 7:36.

Komosta na man kon ang imong mga ginikanan adunay ikasaway sa imong hinigugma? Tungod sa ilang kasinatian sa kinabuhi, nabansay ug maayo ang katakos sa imong mga ginikanan sa pag-ila sa husto ug sayop. (Hebreohanon 5:14) Busa makita nila ang seryosong mga depekto sa personalidad sa usa nga gusto nimong minyoan, nga wala nimo  makita. Tagda ang prinsipyo sa mga pulong nga gisulat sa maalamong tawo nga si Solomon: “Ang mauna sa iyang legal nga kaso maoy matarong; ang iyang isigkatawo moabot ug magausisa kaniya.” (Proverbio 18:17) Sa susama, basin nakombinsir ka sa imong hinigugma nga siya ang angayang kapikas alang kanimo. Apan, human ‘siya mausisa’ sa imong mga ginikanan, tingali may ikasulti sila nga pipila ka butang nga angay nimong tagdon.

Pananglitan, tingali sila hugot nga magpahinumdom kanimo nga ang Bibliya nagsugo sa matuod nga mga Kristohanon sa ‘pagminyo lamang diha sa Ginoo.’ (1 Corinto 7:39) Basin mangatarongan ka nga duna kay mga nailhan nga naminyo sa dili sama nila ug pagtuo, apan karon sila malipayon nang nag-alagad kang Jehova. Tinuod, nagakahitabo kini. Apan, pipila lamang ang maong kahimtang. Kon maminyo ka sa usa nga dili sama nimo ug pagtuo, ikaw wala lamang magbalewala sa mga sukdanan ni Jehova kondili imo usab nga gipameligro ang imong espirituwalidad.—2 Corinto 6:14. *

Dili-Maalamong Rason sa Pagminyo

Ang ubang mga batan-on nagtaban ug sekretong nagpakasal tungod kay sila nakahimog imoral nga buhat ug nagtuo nga dili na sila makonsensiya kon pakaslan ang ilang trato. O basin buot nilang ililong ang mga resulta sa ilang sala, sama sa wala-damhang pagmabdos.

Kon magminyo ka aron tabonan ang usa ka sala, imong gipabug-at ug samot ang usa ka sayop pinaagi sa pagbuhat ug laing sayop. “Siya nga nagatabon sa iyang kalapasan dili molampos,” nagpasidaan si Solomon, “apan siya nga nagasugid ug nagabiya niini pagakaluy-an.” (Proverbio 28:13) Naamgohan sa amahan ug inahan ni Solomon, si David ug Bat-seba, nga usa ka kabuangan ang pagsulay sa pagtago sa ilang imoral nga buhat. (2 Samuel 11:2–12:25) Inay kay itago ang imong sala, isulti kini sa imong mga ginikanan ug sa mga ansiyano sa kongregasyon. Nanginahanglan kinig kaisog sa imong bahin, apan makaseguro ka nga si Jehova mopasaylo kanimo kon ikaw mahinulsolon. (Isaias 1:18) Sa dihang ikaw aduna nay hinlo nga konsensiya, ikaw mas makahimo na ug timbang nga desisyon bahin sa kaminyoon.

Likayi ang Pagbasol sa Ulahi

Sa paghinumdom sa adlaw sa iyang kasal, si Allen miingon: “Tungod sa among desisyon nga himoong simple ang among kasal, ang maong okasyon wala kaayo makapatensiyon. Nagbasol lang ako nga wala nako ipasabot ug maayo sa akong pamilya ang mga rason sa among desisyon.”

Sa pagkatinuod, personal nga butang ang pagdesisyon kon ang hamtong nga managtrato magpakasal ba sa naandang paagi o dili. Apan, sa dihang maghimog bisan unsang desisyon bahin sa kaminyoon, ayaw pagdalidali, pakigsulti sa imong pamilya, ug ‘palandonga ang imong mga lakang.’ Sa ingon, imong mamenosan ang mga hinungdan sa pagbasol sa ulahi.—Proverbio 14:15.

[Mga footnote]

[Hulagway sa panid 23]

Pakigsulti sa imong pamilya sa dihang mohimog bisan unsang desisyon bahin sa kaminyoon