Usa ka Lahi nga Paagi sa Paglakaw!

TINAMPO SA MAGSUSULAT SA PAGMATA! SA PINLANDIA

Nakadungog ka na ba ug Nordic walking? Sa Pinlandia, kining paagiha sa paglakaw nahimong usa sa labing popular nga mga ehersisyo. Kini naglakip sa paggunit ug mga tukod sama nianang gamiton sa pag-ski. Sa unsang paagi kini nagsugod, ug unsay mga kaayohan niini?

SA DIHANG makakita ka ug tawong naglakaw nga naggunit ug tukod tingalig makahunahuna ka ug tig-ski nga wala maggamit sa iyang sapatos nga pang-ski. Sa pagkatinuod, ang mga maglulumba sa ski maoy nagpauso sa Nordic walking sa dihang ilang gipangusgan ang ilang pagbansay panahon sa ting-init pinaagi sa paglakaw nga naggunit sa ilang mga tukod nga pang-ski. Sa katuigang 1980, ang ubang mga atleta gitudloan sa paglakaw niining paagiha ingong usa ka epektibong ehersisyo. Sa ulahing bahin sa katuigang 1990, ang mga tawo sa katibuk-an nakakat-on na niining paagiha sa paglakaw. Ang surbi sa Gallup sa 2004 nagpakita nga 760,000 ka taga-Pinlandia—19 porsiyento sa populasyon—ang naghimo niini kas-a sa usa ka semana. “Ang Nordic walking mao na karon ang ikaduha sa labing popular nga ehersisyo sa Pinlandia, nga ang numero uno mao ang paglakaw.” matod ni Tuomo Jantunen, ehekutibong direktor sa Suomen Latu, ang organisasyon nga nagpahigayon sa surbi. Ang Nordic walking dili usa ka uso nga umalagi lang. Niining ulahing katuigan, kini anam-anam nga gitudlo ngadto sa ubang mga nasod.

Daghan ang nasayod sa mga kaayohan sa paglakaw, apan unsa ang mga kaayohan sa paglakaw nga naggunit ug mga tukod? “Usa sa kinadak-ang kaayohan mao nga ang Nordic walking makapalihok sa ibabawng bahin sa lawas, lakip na sa mga kaunoran diha sa mga bukton, bukobuko, ug pus-on,” matod sa pisikal nga terapista ug eksperto sa Nordic walking nga si Jarmo Ahonen. “Makaparelaks usab kini sa nanggahi nga liog ug mga abaga, nga usa ka komon nga suliran niadtong mga nagtrabaho sa opisina,” siya midugang.

Sanglit ang Nordic walking makapalihok ug mas daghang kaunoran kay sa naandang paglakaw, kini usab makatunaw ug mas daghang kaloriya. Ang paggamit ug mga tukod makapaspas sa paglakaw ug makapakusog sa pinitik sa pulso. Apan dili kay kana ra. Ang mga tigpasiugda niini miingon nga kon ang mga tukod gamiton sa hustong paagi, kini makapatul-id sa paglakaw, ug makapanindot sa postura. “Pinaagi sa Nordic walking, dili kaayo mahago ang mga lutahan, kay maabagan man kini sa mga tukod,” nag-ingon si Ahonen. Usa ka tawo nga nag-ehersisyo niining paagiha nag-ingon nga ang talinis nga mga tukod nakatabang kaniya nga dili madakin-as sa dihang maglakaw sa danlog nga mga dapit. Tungod niini, panahon sa tingtugnaw ang mga tigulang nga tiglakawlakaw naggamit niining bag-ong teknik, kay nianang panahona ang yuta kasagarang natabonan ug niyebe o yelo.

[Kahon sa panid 20]

Mga Instruksiyon Para sa mga Bag-ohan

Ang Nordic walking wala magkinahanglan ug mahalon nga mga gamit. Ikaw nagkinahanglan lang ug komportableng mga sapatos ug linaing pagkadisenyo nga mga tukod nga husto ang gitas-on. Kon bagtok ang dapit nga imong laktan, sul-oti ug goma ang tumoy sa mga tukod. Dili kaayo lisod nga mahanas sa Nordic walking. Ikaw makakat-on niini. Apan, kon ikaw bag-ohan pa, maayo nga mangutana ka sa usa ka eksperto sa Nordic walking.