Determinado Bisag Baldado

Sumala sa giasoy ni Kouamé NʹGuessan

Ang akong kauban ug ako nanglimbasog sa pagduso sa among bisekleta sa lain pang subidahon. Kadto maoy Nobyembre 2002, ug dihay giyera sibil sa Ivory Coast, Aprika. Busa ang hilit nga dalan nga among gisubay daghag kapeligrohan. Diha sa unahan nag-atang ang sunod nga tsekpoint sa militar. Nganong gihimo man nako kanang peligrosong panaw niining panahon sa giyera?

AKO natawo sa 1978 nga adunay balatiang nagkagrabe. Kadto nagsugod sa akong pagkabungol ug sa makapaluya nga kasakit diha sa akong mga bitiis. Sa nagdako ako, ang akong pamilya nagbiaybiay kanako, nga nag-ingon nga ako may ‘mga bitiis nga walay-pulos ug mga dalunggan nga nasampongan ug baga kaayong atuli.’ Tamayon ako sa mga gulanggulang na, ug singgitan sa mga bata nga ako bakol ug inutil.

Nagsugod ko pag-eskuyla sa edad nga otso anyos ug dihadiha ako gidaogdaog sa akong mga klasmet ug mga magtutudlo. Subsob nga gusto nakong mobuka ang yuta ug lamyon ako. Kay nakamatikod nga ako nahadlok, ang mga tawo magbugalbugal kanako. Mobiya lang ko sa balay kon moeskuyla.

Mangutana ko sa akong kaugalingon kon nganong gitaptan man ko niining sakita. Si Mama miingon nga ako gidaotan. Usahay, ako makakita ug mga tawo nga baldado usab ug maghunahuna, ‘Nagpasabot ba kana nga sila gibarang usab?’

Sa 1992, gibati nako ang grabeng kasakit sa akong mga siko. Sa dihang nahupay na ang kasakit, dili na nako matuy-od ang akong mga bukton. Duha ka tuig sa ulahi, nabuta ang akong wala nga mata. Ang akong mga ginikanan nagdala kanako ngadto sa daghang gitawag ug mga tambalan apan wala gyod ko maayo. Tungod kay migrabe ang akong sakit, ako napugos pag-undang sa pag-eskuyla.

Pagpangitag mga Tubag

Usa ka relihiyosong klasmet ang nagdapit kanako nga mosimba uban kaniya. Ako gimatuto ingong animista; apan, sulod sa usa ka tuig ako tig-adtoan sa simbahan. * Wala kaayo koy nakat-onan didto bahin sa Bibliya, busa ako nagsugod sa paghunahuna kon aduna bay kaayohan diha sa organisadong relihiyon.

Ang ubang mga doktrina sa simbahan nakapahadlok kanako, ilabina ang kalayonhong impiyerno. Sa akong hunahuna, ako dili daotan kaayo nga takos sa walay-kataposang pagsakit. Apan, sa samang higayon, ako wala magtuo nga igo na ang akong pagkabuotan nga makadawat ug walay-kataposang kalipay sa langit. Tungod kay wala ako makakaplag ug makapatagbawng mga tubag sa akong mga pangutana, nagsugod pagkawala ang akong interes sa relihiyon.

Pagkasunod tuig ako gidapit nga motambong sa usa ka sesyon sa pagpanambal nga gihimo sa Abidjan, ang kaulohan sa Ivory Coast, duolan sa  150 kilometros gikan sa among gamayng lungsod sa Vavoua. Sa wala pa kami mogikan akong giingnan ang mga kadagkoan sa simbahan nga kulang ang akong kuwarta alang sa bayad sa pagsulod o sa pagkaon. Ilang gipasumbingay nga ako atimanon didto sa Abidjan, apan walay nag-atiman kanako didto. Bisan tuod ako gilibotan sa usa ka dakong panon sa mga 40,000 ngadto sa 50,000 ka tawo, ako mibating nag-inusara ug masulub-on. Walay nagtagad kanako.

Ako mipauli sa Vavoua nga masakiton gihapon, apan nianang tungora ako nahigawad usab. Giingnan ako sa lokal nga mga lider sa simbahan nga wala ako ayoha sa Diyos tungod kay kulang ang akong pagtuo. Human niana, akong giputol ang akong tanang kontak sa relihiyon.

Sa Kataposan, Espirituwal nga Kahupayan

Sa 1996 usa sa mga Saksi ni Jehova ang miduaw sa among pamilya. Wala pa ako makapakigsulti sukad sa usa ka Saksi, apan ako namati sa madasigong panaghisgot tali sa akong magulang nga lalaki ug sa bisita. Ang akong igsoon dili interesado, apan ako interesado. Ang matag pulong nga gisulti sa Saksi mitidlom sa akong kasingkasing.

Gisaysay sa Saksi nga ang sala nag-apektar sa tawhanong pamilya tungod sa pagkamasinupakon sa unang tawo. Ang maong rebelyon misangpot sa pagkadili-hingpit ug kamatayon sa tanang tawo. Apan, gihatag ni Jesus ang iyang kinabuhi ingong lukat aron ang atong mga sala mapasaylo ug kita makatagamtam ug kinabuhing dayon. (Roma 3:23; 5:12, 17-19) Dugang pa, gipakita sa Saksi gikan sa Bibliya nga sa dili madugay si Jehova nga Diyos, pinaagi sa iyang Gingharian, maghimo sa yuta nga usa ka paraiso ug magwagtang sa sala ug sa tanang makapasubong mga sangpotanan niini.—Isaias 33:24; Daniel 2:44; Pinadayag 21:3, 4.

Ang pagkamakataronganon sa mga pagtulon-an sa Bibliya dakog epekto kanako. Ang Saksi, nga sa ulahi akong nailhan ingong Robert, naghimog mga kahikayan nga tun-an ako sa Bibliya kaduha sa usa ka semana. Sulod sa pipila ka bulan, kay nasangkapan na sa akong bag-ong kahibalo sa Bibliya, ako nahimong kuwalipikado nga mouban sa mga Saksi diha sa ilang balay-balay nga buluhaton sa ministeryo. Nalisdan ko niini, tungod kay kinahanglang buntogon nako ang akong kahadlok sa pagpakig-uban sa mga tawo.

Mitungha ang mga Babag

Ang akong pamilya wala malipay nga ako nagtuon sa Bibliya. Aron pasuk-on ko, ang akong magulang nga lalaki manigarilyo diha sa akong lawak-katulganan inigkagabii. Sa buntag labdan ko sa ulo ug magluya. Ang laing problema mao ang among pagkaon. Si Papa mahiligon sa pagpangayam, ug ang karne nga iyang gitagana maoy among pangunang sud-an. Akong gipatin-aw kaniya nga gidili sa Bibliya ang pagkaon sa karne sa wala-mapaagasig dugo nga mga mananap. (Buhat 15:28, 29) Bisan pa niana, dili niya paagasag dugo ang gipangayam niya nga mga mananap. Usahay hatagan lang ko ni Mama ug pulos kan-on, apan subsob nga wala akoy igong pagkaon.

Bisan tuod ang Kingdom Hall sa Vavoua anaa sa pikas bahin sa lungsod, wala gayod nako tugoti ang gilay-on o ang dili-maayong panahon nga mopugong kanako sa pagtambong sa mga tigom. Ako nabawtismohan sa Septiyembre 1997 sa “Pagtuo sa Pulong sa Diyos” nga Distritong Kombensiyon sa Ivory Coast. Ngadtongadto gipauswag pa nako ang akong pagpakigbahin sa Kristohanong ministeryo hangtod sa punto nga ako nahimong kuwalipikado nga magpayunir, ingon sa pagtawag sa mga Saksi ni Jehova sa ilang bug-os-panahong mga ministro.

Dugang mga Kalisdanan

Ang politikanhong kagubot misangpot sa usa ka giyera sibil sa Septiyembre 2002. Sa pipila na lang ka semana, ang mga sundalo sa nasod makaabot na sa Vavoua. Kay nahadlok nga makalas ang ilang kinabuhi, ang ubang mga tawo nangalagiw, lakip na ang kadaghanan sa mga Saksi ni Jehova. Lima ka adlaw human mangalagiw ang mga tawo, ang mga sundalo miokupar sa lungsod ug dihadiha gidili ang tanang sosyal nga kalihokan. Tungod niana, kadaghanan sa mga molupyo sa Vavoua nagkatibulaag, lakip na ang nahibiling mga Saksi.

Tungod kay walay publikong transportasyon, ang mga tawo kinahanglang mobaktas ug daghang kilometros aron makaabot sa sikbit nga mga lungsod. Dili ko makabaktas ug ingon niana kalay-a,  busa ako na lang ang Saksi nga nahibilin sa Vavoua. Ako nagpadayon sa pagsangyaw, ug nagpahigayon ug mga tigom sa kongregasyon nga niana ang pipila ka lokal nga molupyo nanambong.

Mga Paningkamot sa Pagtambong sa Asembliya

Ang usa ka adlaw sa espesyal nga asembliya sa mga Saksi ni Jehova gieskedyul nga pagahimoon pagka-Nobyembre didto sa lungsod sa Daloa. Ako nag-ampo kang Jehova, nga nagpahayag sa akong tinguha nga motambong. Usa ka Saksi nga mibiya kanhi sa lungsod mipauli nga wala damha. Ako siyang gihangyo kon mahimo ba ko niyang paangkason sa iyang bisekleta paingon sa asembliyahanan, nga mga 50 kilometros ang gilay-on. Misugot dayon siya, bisan tuod siya masakiton usab.

Kadaghanan sa mga tawo mibatig kahadlok, busa dili kadto ang maayong panahon nga mobiyahe. Ang mga sakyanan gidid-an sa pagbiyahe gikan sa Vavoua paingon sa Daloa. Ang biyahedor nga wala mailhi mahimong dudahan ug masingganon sa sundalo sa bisan hain sa nag-awayay nga grupo. Bisan pa niana, sa Sabado sa buntag, sa Nobyembre 9, 2002, migikan mi sa Vavoua nga nagbisekleta ug mipaingon sa Daloa, ingon sa gihubit sa sinugdan.

Sa wala madugay nakaabot mi sa una sa daghang mga tsekpoint sa militar. Kami girekisa pag-ayo ug gitugotan sa pagpadayon sa biyahe. Ang panaw dugay ug kapoy. Magbaktas mi paingon sa tumoy sa bungtod, ug unya pag-abot namo sa taluktok, mopadulhog mi nga magsakay sa bisekleta.

Sa ngadtongadto, laing siklista ang mitabang kanamo. Ako miangkas nga naglingkod diha sa gamayng patongan sa likod sa iyang bisikleta. Samtang kining maabiabihon nga estranyo nagpadagan sa bisikleta, akong gigamit ang kahigayonan sa pagpakigsulti kaniya bahin sa Gingharian sa Diyos. Akong gipatin-aw nga ang kagamhanan sa Diyos maoy langitnon ug sa dili madugay kini magpahinabo ug dumalayong pakigdait sa yuta. Nahibulong siya sa akong giingon ug daghan siyag gipangutana kanako. Pag-abot namo sa Daloa, iya ming gipalitan ug pagkaon ug misaad nga siya motambong sa adlaw sa espesyal nga asembliya pagkasunod buntag.

Miabot mi sa Daloa nga lawom na ang kagabhion, gikapoy apan malipayon nga nakaabot kami sa among destinasyon. Ang among siyam-ka-oras nga biyahe dili sayon. Usa ka Saksi niadtong dapita ang mainitong nag-abiabi kanamo ug nagsugyot nga kami moestar uban kanila hangtod nga medyo molinaw na ang politikal nga kahimtang. Ikasubo, ang asembliya kinahanglang kanselahon tungod sa politikanhong kagubot. Apan, ang maong panaw wala makawang. Kini misangpot sa pagkadawat nako ug dugang mga pribilehiyo sa pag-alagad sa mga isigka-Kristohanon sa Daloa.

Ang Determinasyon Nagdalag mga Panalangin

Karon ako puliki ingong ministeryal nga alagad ug regular payunir sa usa ka kongregasyon sa Daloa. Motabang usab ako sa pagmentinar sa Assembly Hall sa mga Saksi ni Jehova sa Daloa. Aron matagan-an ang akong materyal nga mga panginahanglan, ako maghimo ug mamaligya ug mga adornong alibangbang nga gama sa kahoy ug magdibuho usab ug mga karatula.

Sulod sa daghang katuigan ako mibiya lamang sa balay kon moeskuyla, apan sukad niadto ako nakabaktas na ug daghang kilometros sa pagpangita niadtong giuhaw sa kamatuoran mahitungod sa kon nganong naglungtad ang sakit ug pag-antos. Samtang ako nagpaabot sa Gingharian sa Diyos nga mopapha sa tanang balatian, ako nagpadayon sa pagpaambit ngadto sa mga tawo sa Ivory Coast sa makapahupay nga maayong balita mahitungod sa mga katuyoan sa Diyos.

[Footnote]

[Hulagway sa panid 13]

Nagpaingon sa Daloa aron sa pagtambong sa asembliya

[Hulagway sa panid 13]

Nagtabang sa pag-atiman sa among Assembly Hall sa Daloa

[Hulagway sa panid 13]

Ako maghimo ug mamaligya ug adornong alibangbang nga gama sa kahoy aron masuportahan ang akong kaugalingon