Gikan sa Among mga Magbabasa

Mga Inahan Salamat sa maayong pagkasulat nga mga artikulong “Ang Papel sa mga Inahan Ingong mga Tig-edukar.” (Pebrero 22, 2005) Natandog gayod niini ang akong kasingkasing, ug nadasig ako sa pagtawag sa akong inahan human nakog basa niini. Ang akong inahan mao ray nagmatuto kanako ug sa akong magulang nga lalaki. Siya ra ganiy naggasto sa iyang pagtungha aron iya kaming masustentohan. Iyang gipaneguro nga kami regular diha sa Kristohanong mga tigom ug sa ministeryo. Nagbunga ang iyang paningkamot. Salamat sa pagpahinumdom kanako sa iyang talagsaong panig-ingnan.

M. S., Tinipong Bansa

Napahinumdoman ako sa pagsakripisyo sa akong inahan sa pag-edukar kanako sa espirituwal ug sa moral. Bisan pag wala siya tabangi sa akong amahan sa emosyonal ug pinansiyal nga paagi, iya akong gitudloan sa paghigugma kang Jehova. Gidasig usab niya ako nga mahimong bug-os-panahong ebanghelisador. Morag wala kaayo nako pabilhi ang paningkamot sa akong inahan, apan sama sa gisugyot niining mga artikuloha, siya takos dayegon. Gitawagan nako siya sa telepono aron pasalamatan siya!

C.H.K., Republika sa Korea

Dili Saksi ang akong amahan. Ang akong inahan maoy nagmatuto kanako “sa disiplina ug sa pagdumala-sa-kaisipan ni Jehova.” (Efeso 6:4) Lisod kadto alang kaniya, ilabina sa akong gipakita usahay nga panggawi. Bayente kuwatro anyos na ako karon, ug mapasalamaton ako nga wala siya mosurender apan nagmalahutayon sa pagtisok sa kamatuoran sa Bibliya diha sa akong kasingkasing.

D. M., Italya

DNA Nalingaw ko sa artikulong “‘Walay-Pulos’ nga DNA?” (Pebrero 22, 2005) Nagtuon kog molecular biology pipila ka tuig kanhi. Naglagot ko sa teksbok kay kini nag-ingon nga 95 porsiyento sa atong DNA ang walay pulos! Gigamit sa awtor ang talagsaong mga ilustrasyon sa pagsaysay sa mga pag-obra sa DNA, ug pagkahuman niana, siya miingon nga mitungha kini pinaagi sa ebolusyon. Busa inyong masabot ang kadako sa akong kalipay sa pagbasa bahin niining gitawag ug walay-pulos nga DNA diha sa Pagmata!

J. C., Tinipong Bansa

Mga Batan-on Nangutana Ang artikulong “Mga Batan-on Nangutana . . . Sa Unsang Paagi Akong Makontrolar ang Akong Emosyon?” nakatandog sa akong kasingkasing. (Pebrero 22, 2005) Ako nag-edad ug 31 anyos ug gimatuto ingong usa ka Kristohanon, apan dili pa hamtong ang akong pagkatawo. Di pa dugay, may mga higayon nga misinta ako sa kasuko, nga bisan ako natingala. Nakatabang nako ang tambag sa akong inahan ug sa lain pang Kristohanong sister. Ug miabot pa gyod ning artikuloha—sa tukmang panahon. Kaduha na nako ni basaha ug tipigan nako ni diha sa duol aron makat-onan nako ang pagkontrolar sa akong emosyon.

I. B., Alemanya

Senyas nga Pinulongan Nalibog ko kay pirme mang gihisgotan ang bahin sa pagkabungol, ug ang kinaulahian anaa sa “Pagpaniid sa Kalibotan” sa ulohang “Pagsulti Pinaagig Senyas Diha sa Internet.” (Pebrero 8, 2005) Usa ako sa mga Saksi ni Jehova, ug aktibo na ako sa pagsangyaw sulod na sa daghang tuig. Apan, ako moprangka nga wala pa gyod ko sukad makahimamat ug bungol sa tanan nakong pagsangyaw! Daghan ba gyod kaayo ang mga bungol?

Ngalan gitago, Tinipong Bansa

Ang “Pagmata!” nagtubag: Sumala sa usa ka pagtuon, mga 8,000,000 ka tawo nga kapin sa singko anyos adunay mga suliran sa pandungog sa Tinipong Bansa lamang—bisan pag adunay hearing aid. Mga 1,000,000 niana ang nagsalig sa senyas nga pinulongan aron makakomunikar. Ang laing pagtuon sa mao ra gihapong nasod nag-ingon nga adunay halos 28,000,000 ka tawo (sa tanang pangedaron) nga may suliran sa pandungog nga wala mogamit ug hearing aid. Posibleng makahimamat kitag mga bungol nga dili lang nato mahibaloan, tungod kay ang pagkabungol dili ra man mamatikdan sa mga magtan-aw. Dugang pa, kon ang bungol nagpuyo uban sa mga tawo nga makadungog, kasagaran nga ang makadungog maoy moabli sa pultahan.