Ang Hunahuna sa Bibliya

Mas Gipaboran ba sa Diyos ang Ubang mga Nasod kay sa Uban?

DAGHAN ang mibati nga mas gipaboran sa Diyos ang ilang nasod kay sa uban. Apan kon pangayoan ug pruyba, unsa may ilang isulti? Ang uban maghisgot tingali sa mga kalamposan diha sa kasaysayan sa ilang nasod—sama sa mga kadaogan sa militar o pag-uswag sa ekonomiya. Basin hisgotan pa gani nila ang malamposong mga programa nga gihikay aron sa pagpakaon sa mga gigutom, pagpanalipod sa mga kabos, o sa pagpalambo sa hustisya ug sa makiangayong pagtratar sa mga tawo. Ang uban nagtuo nga gipaboran sa Diyos ang ilang yutang natawhan tungod sa kinaiyanhong katahom niana.

Ang ingon nianang tinamdan sa pagpasigarbo sa nasod kaylap bisan asa. Bisan pa niana, gipaluyohan ba sa Bibliya ang ideya nga mas gipaboran sa Diyos ang usa ka nasod kay sa uban?

Usa ka Hinungdanong Hiyas sa Diyos

Klaro ang tubag kon atong masabtan ang hinungdanong hiyas sa Labing Gamhanang Diyos, usa ka hiyas nga gipasiugda pag-ayo sa Bibliya. Ang Diyos dili mapihigon. Pananglitan, ang Buhat 10:34 klarong nag-ingon: “Ang Diyos dili mapihigon.” Ang Bibliya nag-ingon usab nga si Jehova nga Diyos “wala magpihig kang bisan kinsa” ug nga “kang Jehova nga atong Diyos walay pagkadili-matarong o pagpihig.” (Deuteronomio 10:17; 2 Cronicas 19:7) Gidumtan sa Diyos ang pagkamapihigon; gipakasama pa gani niya kana sa pagkadili-matarong.

Apan, mangutana ka tingali: ‘Dili ba mas gipaboran man sa Diyos ang karaang nasod sa Israel kay sa ubang mga nasod? Dili ba kana pamatuod sa pagkamapihigon?’ Tinuod, gipili sa Diyos ang nasod sa Israel sa kapanahonan sa Bibliya, ug gipanalipdan niya ang mga Israelinhon diha sa pipila sa ilang mga pakiggubat sa ubang mga nasod. Gawas pa, ang Bibliya nag-ingon bahin sa Diyos: “Siya nagasulti sa iyang pulong kang Jacob, sa iyang mga regulasyon ug sa iyang hudisyal nga mga hukom sa Israel. Siya wala magbuhat niana sa bisan unsa nga nasod.” (Salmo 147:19, 20) Apan ang mga pakiglabot ba sa Diyos sa Israel nagpaila nga siya may-pagpihig? Wala gayod. Tagda ang tulo ka rason.

Una, gipili sa Diyos ang Israel aron makabenepisyo ang tanang kanasoran. Siya naghimog pakigsaad uban sa katigulangan nianang nasora, si Abraham, nga nag-ingon: “Pinaagi sa imong binhi ang tanang nasod sa yuta tinong magapanalangin sa ilang kaugalingon.” (Genesis 22:17, 18) Oo, ang katuyoan sa Diyos sa pagpakiglabot sa Israel mao ang pagpatungha ug usa ka “binhi” nga maghatag ug dagkong mga panalangin, dili lamang sa mga tawo sa usa ka nasod kondili sa mga tawo sa “tanang nasod sa yuta.”

Ikaduha, ang mga panalangin sa Diyos dili kay sa katawhan sa Israel lamang gihatag. Sa walay-pagpihig gipaposible niya nga ang mga indibiduwal sa ubang mga nasod makaduyog sa iyang piniling katawhan diha sa pagsimba kaniya. (2 Cronicas 6:32, 33) Daghan ang midawat sa maong pagdapit ug gipanalanginan tungod niana. Ang Moabihanon nga si Ruth maoy usa ka iladong pananglitan niana.—Ruth 1:3, 16.

Ikatulo, ang linaing relasyon sa Diyos uban sa yutan-ong Israel temporaryo lamang. Sa 29 K.P., gipatungha sa Israel ang gitagna nga “binhi” nga mao ang Mesiyas, si Jesu-Kristo. (Galacia 3:16) Apan si Jesus gisalikway ingong Mesiyas sa iyang mga tagilungsod. Siya miingon kanila: “Tan-awa! Ang inyong balay mabiniyaan kaninyo.” (Mateo 23:38) Human niana, ang pagpakiglabot sa Diyos sa katawhan wala nay kalambigitan sa sekular nga kalihokan sa mga nasod ug sa ilang mga paggubatay. Hinunoa, sa walay-pagpihig iyang gipaposible nga mabatonan sa tanang katawhan ang mga panalangin. Tagda ang pipila ka pananglitan.

 Mga Gasa sa Diyos Alang sa Tanan

Ang halad lukat ni Jesu-Kristo mao ang kinadak-ang gasa sa Diyos sa tawo. (Roma 6:23) Pinaagi niini, mapahigawas ang usa gikan sa sala ug kamatayon, nga naghatag sa matag usa kanato ug kahigayonan nga makabaton ug kinabuhing walay kataposan. Kining maong gasa maoy alang sa mga indibiduwal “gikan sa matag tribo ug pinulongan ug katawhan ug nasod.” (Pinadayag 5:9) Oo, buot sa Diyos nga “ang tanan nga magpasundayag ug pagtuo” kang Jesus makabaton ug “kinabuhing walay kataposan.”—Juan 3:16.

Ang maayong balita mahitungod sa Gingharian sa Diyos magdalag daghang panalangin niadtong magpatalinghog niana. (Pinadayag 14:6, 7) Kini maghatag ug paglaom alang sa umaabot ug magtaganag maalamong tambag nga mosangpot sa mas malipayong kinabuhi karon. Si Jehova walay-pagpihig nga nagtino nga “kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.” (Mateo 24:14; 28:19, 20; Buhat 16:10) Kanang maayong balita anaa sa Bibliya, usa ka basahon nga mabatonan—labing menos ang pipila ka bahin niini—diha sa kapin sa 2,300 ka pinulongan. Ingong mahigugmaong Amahan, gipaposible ni Jehova nga mabatonan halos sa tanang tawo sa yuta ang “mga pulong mahitungod sa kinabuhing walay kataposan.”—Juan 6:68; Josue 1:8.

Kini ug ang ubang mga gasa gikan sa Diyos mabatonan sa tanan—oo, sa katawhan sa tanang nasod, rasa, ug mga pinulongan. Busa, ang pagkadawat sa pabor ug panalangin sa Diyos wala magdepende sa atong dapit nga natawhan o sa etnikong kagikan.

Kinsay Makabaton sa Pabor sa Diyos?

Nan, unsay kinahanglan natong buhaton aron mabatonan ang pabor sa Diyos? Si apostol Pedro mitubag pinaagi sa pag-ingon: “Sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35) Klaro nga ang pagkahimong interesado lamang bahin sa Diyos dili pa igo. Kinahanglang maugmad nato ang sinserong gugma alang sa Diyos, nga mahadlok nga mapasuko siya. Kinahanglan usab nga kita “magabuhat sa pagkamatarong,” o aktibong magahimo sa kon unsay maayo sa panglantaw sa Diyos.

Sa pag-ilustrar: Diha sa daghang nasod ang publikong mga tunghaan mabatonan sa tanan, apan kadto lamang moeskuyla ug magkugi ang makabenepisyo niana. Sa samang paagi, ang pabor sa Diyos mahimong mabatonan sa tanan, apan gikinahanglan ang atong pagpaningkamot. Ang maong paningkamot maglakip sa regular nga pagbasa sa Bibliya, pagpasundayag ug pagtuo sa halad lukat ni Kristo, ug pagkinabuhi sumala sa mga prinsipyo sa Bibliya. Kon kita tinuoray nga ‘mangita kang Jehova,’ kita mahimong mahilakip niadtong iyang giuyonan.—Salmo 105:3, 4; Proverbio 2:2-9.

[Hulagway sa panid 15]

Gipaposible sa Diyos nga ang “mga pulong sa kinabuhing walay kataposan” mabatonan sa mga tawo sa tanang nasod