Pagkawalay Puy-anan—Unsay Sulbad?

“HATAGIG isda ang usa ka tawo, ug siya imong mapakaon sa usa ka adlaw. Tudloi siya sa pagpangisda, ug siya imong mapakaon sa tibuok niyang kinabuhi.” Kini nga panultihon nag-ilustrar sa kamatuoran nga ang yanong pagtagbaw sa dihadihang pisikal nga panginahanglan diyutay rag bili. Labi pang maayo nga tabangan ang mga tawo nga makakat-on kon unsaon pagsulbad sa ilang mga suliran ug pagtagana sa ilang mga panginahanglan. Daghang tawo kinahanglang tudloan sa mga katakos sa pagkinabuhi o kaha sa bug-os lahi nga panglantaw ug pagdumala sa kinabuhi.

Ang mga Saksi ni Jehova kombinsido nga ang labing maayong paagi sa pagtabang sa pagkawalay puy-anan mao ang pagtudlo sa mga tawo sa labing maayong paagi sa pagkinabuhi. Nagpasabot kana sa pagpadapat sa labing maayong tambag nga mabatonan—ang tambag nga gitagana sa Maglalalang sa tawo. Kinsa pa bay mas kuwalipikadong mohatag sa maong tambag? Ang iyang tambag nagtabang sa mga tawo nga malikayan ang daghang suliran nga motultol sa pagkawalay puy-anan. Nagtabang usab kini sa sinserong mga tawo nga nalisdan sa pagbuntog niana. Siyempre, ang pagbasa lamang  sa Bibliya dili makahanaw sa tanan natong problema. Apan, ang Bibliya makatabang sa mga tawo sa paghunong sa gastosong mga bisyo, sa pagbaton pag-usab sa pagtahod sa kaugalingon, ug sa pagkinabuhi nga mas dungganon.

Daghang tawo nawad-an sa ilang puy-anan tungod sa pag-abuso sa droga ug alkoholikong ilimnon, pagkahimong kriminal, kalisod sa panalapi, o pagkabungkag sa pamilya. Ang Bibliya naghatag ug praktikal nga tambag niining tanan. Ang pagpadapat niini nakatabang na sa milyonmilyong tawo sa pagbag-o sa ilang panglantaw sa kinabuhi—ug nakabag-o pa gayod sa ilang bug-os nga personalidad—alang sa ikaayo. Hinuon, ang yanong pagpadapat sa tambag sa Kasulatan dili makasulbad sa tanang suliran nga nalangkit sa pagkawalay puy-anan. Sa pagkakaron, ang kinaiyanhong mga katalagman, sakit, kaylap nga kakabos, pagkagiyan, ug uban pa nga susama niini maoy mga suliran nga sagad magkinahanglan ug laing matang sa tabang. Bisan tuod ang mga Saksi ni Jehova maningkamot gayod sa pagtabang sa mga tawo nga nagaantos sa mga epekto sa maong mga kasakitan, sila nahibalo nga ang bug-os makasulbad niini mao lamang ang Magbubuhat sa tawo. Sulbaron ba niya kini?

Orihinal nga Katuyoan sa Diyos

Dunay maayong rason sa paglaom nga sa dili madugay mawala na ang pagkawalay puy-anan. Sa unsang paagi? Tagda kini: Si Jehova nga Diyos nagtaganag maanindot nga puy-anan alang sa unang tawhanong magtiayon. Gibutang sila sa Diyos sa usa ka paraiso, diin nabatonan na nila ang tanan nilang gikinahanglan. Kon gisunod pa unta nila ang paggiya sa ilang Magbubuhat, ila nang napakaylap ang Paraiso sa tibuok yuta. Ang ilang mga anak nagpahimulos na unta sa kadagaya ug haruhay nga mga puy-anan. Ang matag membro sa tawhanong pamilya makasalig gayod unta sa gugma ug pagtambayayongay sa tanan. Mao kanay orihinal nga katuyoan sa Diyos. Wala niya usba ang iyang hunahuna.—Salmo 37:9-11, 29.

Dugang pa, mamatuman gayod ang tanang gusto sa Diyos ug kini dili mapakyas. (Isaias 55:10, 11) Ang Bibliya nagtagna nga moabot ra ang panahon nga ang tanan aduna nay kaugalingong puy-anan ug dagayang pagkaon ug uban pang materyal nga mga butang. Hinuon, sa dili pa kana mahitabo, ang bug-os nga tawhanong katilingban nga atong nailhan karon pagabag-ohon. Ang maong kausaban mahitabo sa dihang mangilabot ang Diyos sa mga kalihokan sa tawo. Mao kanay anaa sa hunahuna ni Jesus sa dihang iyang giingnan ang iyang mga tinun-an sa pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”—Mateo 6:9, 10.

Ilalom sa matarong nga pagmando sa Gingharian sa Diyos, ang masinugtanong katawhan makasaksi sa katumanan niining makapadasig nga tagna: “Sila gayod magtukod ug mga balay ug magpuyo niini . . . Dili sila magtukod ug lain ang magpuyo; dili sila magtanom ug lain ang magkaon. . . . Gamiton sa bug-os sa akong mga pinili ang buhat sa ilang mga kamot.” (Isaias 65:21, 22) Sa yanong pagkasulti, wala nay tawong walay puy-anan.

Ang mga Saksi ni Jehova naningkamot sa pagtanyag sa mga tawo ug espirituwal nga tabang nga ilang gikinahanglan karon. Gusto nilang ikahatag sa uban ang mahigugmaong pagtagad nga giawhag ni Jesus. (Mateo 22:36-39) Kanang samang kahangawa alang sa uban nakadasig kanila sa pagtabang niadtong nawad-an sa ilang pinuy-anan tungod sa kinaiyanhong mga katalagman. *

Sa tinuod lang, nahibalo ang mga Saksi nga dili gayod nila matabangan ang tanan. Si Jacek, nga taga-Polandia, nga nagpuyo sa usa ka puy-anan alang sa mga walay balay, miingon bahin kanila: “Ang pipila kanila init ug ulo o impluwensiyado sa mga droga. Supak ang uban nga  maghisgot bahin sa relihiyon, kay abi nilag ang Diyos walay interes kanila. Apan duna poy interesado sa Pulong sa Diyos.” Ang pananglitan niini mao si Jacek mismo. Nagsugod siya sa pagtuon ug dugang kon unsa gayoy gitudlo sa Bibliya.

Ang usa pa ka lalaking walay puy-anan nga interesado sa Pulong sa Diyos mao si Roman, nga nag-antos sa AIDS ug dili pa dugay nga diha siya sa dalan magpuyo. “Sa pag-abot nako sa ahensiya sa Social Services, wala ko mahibalo nga ang mga Saksi ni Jehova nagtigom ra diay diha sa duol,” siya miingon. “Sa wala madugay sila nakig-estorya kanako diha sa dalan ug ilang gipatin-aw nga ang Diyos nagpatalinghog sa mga pagtuaw sa mga walay puy-anan. Gidapit usab nila ako nga motambong sa usa sa ilang mga tigom.”—Salmo 72:12, 13.

Unsay epekto kaniya sa iyang nadungog? “Nakat-onan ko nga ako mabuhi diay sa walay kataposan sa Paraiso sa yuta ug ako bililhon sa panan-aw sa Diyos. Sanglit napalibotan ako sa bag-o, mahingawaong mga higala, mihunong ako sa paghunahuna kanunay sa akong kalisod ug gibag-o ko ang akong personalidad. Tungod sa akong gugma sa Diyos, gihunong nako ang pagpanigarilyo ug diha sa pag-ampo ako nanaad kaniya nga mosubay na ako diha sa dalan sa pagkamatarong.”

Maayo ang pag-uswag ni Roman sa espirituwal ug sa wala madugay nabawtismohan ingong usa sa mga Saksi ni Jehova. Sa tabang sa mga isigkamagtutuo ug sa mga awtoridad, nakabalhin siya ug maayong puy-anan. Si Roman mipatugbaw nga malipayon: “Ang akong kasingkasing nahupngan sa tumang kalipay. Nasuod ako sa usa ka mahigugmaong Diyos, nga nagpasig-uli sa katuyoan sa akong kinabuhi. Gihatagan niya akog usa ka talagsaong pamilya sa mga igsoong lalaki ug babaye ug usa ka puy-anan usab!”

Palaaboton sa mga Walay Puy-anan

Ang mga Saksi ni Jehova naningkamot sa pagpakitag empatiya sa tanan nilang silingan, lakip na sa mga walay puy-anan. Maikagon sila sa pagpakig-ambit sa mga kamatuoran sa Bibliya bahin sa mas maayong kaugmaon—mga kamatuoran nga bisan karon makapabag-o sa mga kinabuhi.—Juan 8:32.

“Kanang baliko dili na matul-id,” nag-ingon ang Bibliya. (Ecclesiastes 1:15) Oo, bisan pa sa labing maayong intensiyon sa mga tawong boluntaryo ug sa mga awtoridad, ang nakagamot nga mga suliran sa katilingban sama sa pagkawalay puy-anan ug kakabos lisod nang mahanaw. Apan ang Bibliya nagpasalig kanato nga sa dili madugay, ubos sa pagmando sa Gingharian sa Diyos, ang tanang masinugtanong mga tawo magtagamtam na unya ug hingpit nga mga kahimtang sa pagkinabuhi.

[Footnote]

[Hulagway sa panid 8]

Usa ka kagiw nga inahan nga taga-Somalia nga naggunit ug kard alang sa rasyon sa pagkaon

[Credit Line]

© Trygve Bolstad/Panos Pictures

[Hulagway sa panid 9]

Labaw sa tanan, ang mga tawong walay puy-anan nagkinahanglag paglaom alang sa umaabot

[Mga hulagway sa panid 10]

Ubos sa Gingharian sa Diyos, wala nay tawong walay puy-anan