Gikan sa Among mga Magbabasa

Enerhiya Tungod sa pagtaas sa presyo sa gasolina sa akong nasod, buot nakong ipahayag ang akong apresasyon sa panghapin nga seryeng “Mabatonan ba Nato ang Mas Hinlong Tinubdan sa Enerhiya?” (Marso 8, 2005) Makapadasig ang paghunahuna nga sa bag-ong kalibotan sa Diyos, “tinoon ni Jehova nga ang dagayang mga kahinguhaan sa yuta maapod-apod sa makataronganong paagi ngadto sa tanang tawo.”

M. N., Tinipong Bansa

Sistema Solar Wala kaayo koy nahibaloan bahin sa astronomiya, apan naikag kaayo ko sa pagbasa sa artikulong “Ang Tawo nga Nagbutyag sa mga Tinagoan sa Sistema Solar.” (Marso 8, 2005) Kahibulongan ang mga kalamposan ni Kepler, kinsa nakadiskobre sa mga balaod sa pagbiyo sa mga planeta. Apan sa dihang akong palandongon ang kaalam ni Jehova, nga maoy nagmugna niining maong mga balaod, mobati gayod ako ug kahingangha.

M. Y., Japan

Ang astronomiya maoy usa sa mga gikaikagan nako. Nakurat ako sa dihang akong nabasa nga dili diay kanunay hayahay ang kinabuhi ni Johannes Kepler. Ubos sa pagtultol ni Jehova, lagmit sa bag-ong kalibotan, ako magkalipay sa pagtuon sa wala-mailhing mga galaksiya sa atong uniberso uban nianang eskolar sa kanhiayng panahon. Palihog padayon sa pagsulat ug makapainteres nga mga artikulo nga sama niini!

S. M., Alemanya

Salamat sa pagpasayon niining lisod sabton nga ulohan aron masabtan sa tanan ang kahibulongang kalalangan ni Jehova. Ang pagbasa bahin sa mga diskoberiya ni Kepler ug sa iyang hugot nga desisyon nga magpabiling bulag sa bakak nga relihiyon nakadasig kanako! Ako nagtuo nga kamo magpatik ug nunot-sa-panahon nga mga artikulo sa umaabot nga mga panahon.

S.M.C., Britanya

Pagsakripisyo Alang sa Uban Nadasig gayod ako sa artikulong “Malipayon sa Pagsakripisyo Alang sa Uban.” (Pebrero 22, 2005) Makahuloganon kaayo alang kanako ang kasinatian sa kinabuhi ni Claire Vavy tungod kay managsama ang among pangedaron ug ang gidugayon sa among bug-os-panahon nga pag-alagad. Ang labaw nga nakadani kanako niining artikuloha mao nga kini giasoy sa usa ka batan-ong dalaga. Ingong usa ka tagsaanong babaye, ako nalig-on sa kadasig ni Claire ug sa iyang positibong tinamdan. Gipadayag sa iyang mga letrato sa maong artikulo ang iyang tinuod nga kalipay. Kadto dugang nagpasiugda kanako nga ang kalipay wala mag-agad sa atong kahimtang o mga kabtangan, kondili sa atong gugma kang Jehova ug sa atong pag-alagad kaniya.

Y. R., Tinipong Bansa

Tamates Ako 12 anyos, ug nagustohan nako ang artikulong “Ang Tamates—Daghag-Gamit nga ‘Utanon.’” (Marso 8, 2005) Mapasalamaton kaayo ako kang Jehova tungod kay siya naglalang ug nagkadaiyang klase sa lamiang mga utanon. Nakurat ako sa dihang akong nabasahan nga duna diay tamates nga may badlis-badlis! Salamat sa makaiikag nga mga artikulo.

M. F., Latvia

Buaya Nakadayeg ako sa artikulo nga “Makapahiyom Ka ba sa Buaya?” (Marso 8, 2005) Ako kanunayng nag-isip sa buaya nga usa ka katingalahang linalang. Nalipay ako sa pagkabasa ug daghang makapainteres nga mga impormasyon nga makatukmod sa mga tawo nga ganahan sa mga buaya sama kanako. Ako nagpaabot sa bag-ong kalibotan ni Jehova, diin dugang pa natong mailhan ang mga buaya!

L. I., Tinipong Bansa

Gikan sa Among mga Magbabasa Ako natawo nga may sakit sa bukog. Ang makapatandog ug makapalig-on nga mga sulat nga migula sa “Gikan sa Among mga Magbabasa” (Marso 8, 2005) bahin sa artikulong “Usa ka Bag-ong Nawong Alang Kang Mailyn” nakapalugmaw sa akong mga luha. (Mayo 22, 2004) Ang matag sulat maayong pagkasulti nga alang kanako makahuloganon kaayo ug ako personal nga nakabenepisyo.

M. J., Britanya