Mga Estorya sa Bibliya nga Giasoy Pinaagi sa Yelo ug Niyebe

TINAMPO SA MAGSUSULAT SA PAGMATA! SA ALEMANYA

“PUWERTENG nindota oy!” Mao kanay giingon ni Anja sa iyang nakita. Si Georg miingon, “Pagkadaghan sa imong mahimo gikan sa maong materyal.” Tungod kay naikag kami sa ilang giingon, usa ka grupo kami nga miadto sa Lübeck sa amihanang Alemanya aron sa pagtan-aw sa Ice World, usa ka eksibit sa yelo nga kinulit. Ang tema niini maoy “Ang Bibliya—Mga Estorya Gikan sa Daang Tugon ug Bag-ong Tugon.”

Sa pag-abot namo sa Lübeck, ang iladong Holstein Gate natabonan sa gabon. Sa duol niini nagbarog ang dakong tolda nga ordinaryo tan-awon. Apan sa sulod niini among nakita ang mabulokon, naggilaw-gilaw nga kalibotan sa niyebe ug yelo nga nagkalainlain ug porma sa sihag nga yelo nga nag-usab-usab ang mga kolor tungod sa suga.

Bisan sa wala pa kami makasugod sa among paglibot, among nahinumdoman nga kami gipasidan-an nga magsul-ob ug baga nga sinina tungod kay tugnaw sa sulod! Bisan tuod ang temperatura nga -10 grado Celsius dili kaayo tugnaw alang niadtong nagpuyo sa bugnawng mga dapit, ang pipila kanamo gikuraw pag-ayo kay nalimot kami sa pagdala sa among bandana ug mga guwantes. Apan, ang among gibating katugnaw nabaslan ra tungod sa kamabulokon ug kanindot sa mga linilok nga yelo.

Mga Esena sa Bibliya nga Gikulit sa Yelo

Among nakita ang usa ka manulonda, nga nagsul-ob ug besti nga makita bisan ang kunot-kunot, nga naghuyop ug trompeta. Kini nga eskultora morag naglupad ibabaw sa yuta nga napuno sa niyebe. Dihay kinulit nga yelo nga naglarawan sa lainlaing hugna sa paglalang, lakip sa paglalang kang Adan. Samtang nagpaingon sa unahan, kami nakaabot sa arka ni Noe. Nahimuot kami sa dihang among nakita ang usa ka hippopotamus nga nagtulod sa paris niini nga nahuot sa pultahan sa arka samtang dihay minyak nga milusot ilalom sa tiyan sa hippo nga midagan paingon sa arka. Sa duol si Noe nagbarog tupad sa kamada sa mga kahoyng yelo nga kinulit.

Unya nakaabot kami sa usa ka talan-awon sa tanaman sa Eden, nga naghulagway sa pagpakasala ni Adan ug Eva. Dayon mihunong kami sa usa ka dakong eskultora nga maikagon namong  gitan-aw pag-ayo: Si Moises nga naggunit ug duha ka papan sa Kasugoan. Nganong nakapainteres man kini kanamo?

Nahisulat diha sa papan sa yelo, dili ang Napulo ka Sugo, kondili ang Tetragrammaton—ang personal nga ngalan sa Diyos nga Jehova! Nalipay kami sa pagkakita sa Hebreohanong ngalan sa Diyos nga klaro kaayo. Bisan diha sa hapin sa brosyur sa eksibit makita ang maong hulagway ni Moises, nga sa tunga niini dayag kaayo ang Tetragrammaton. Among gikuhaan ug daghang letrato ang maong esena. Diha sa duol dihay kinulit nga baka nga bulawan tan-awon tungod kay nadan-agan sa spotlight. Kadto nakapahinumdom kanamo sa imoral nga idolatriya nga gihimo sa mga Israelinhon human gilayon sa ilang paggawas sa Ehipto.

Anugon nga ang kinulit nga eskultora nga nagpasundayag kang Jacob ug Esau ug nianang kang Jose ug Paraon dili kaayo klaro. Aw, ang pipila ka mga kinulit hinuon medyo natunaw tungod sa mga 100,000 ka bisita nga nanan-aw sa unang tulo ka semana sa eksibit. Apan, klaro kaayo ang dakong kinulit nga eskultora ni Samson, nga nagtumba sa mga haligi sa templo sa mga Filistehanon. Ang laing esena nagpakita kaniya nga giputlan ni Delila ug buhok.

Ang karakter sa Bibliya nga si David gipakita usab, una sa dihang iyang gipildi si Goliat ug sa dihang nagtan-aw kang Bat-seba nga naligo. Gipakita usab ang esena sa pagkatawo ni Jesus. Sa atbang niini makita ang esena sa Kataposang Panihapon.

Human makakita niining tanang eskultora, kami nangamig sa katugnaw. Busa nangadto kami sa restawran buyon sa Holstein Hall. Ang video bahin sa kon giunsa paghimo ang mga kinulit makita sa daghang eskrin diha sa lawak.

Kon Giunsa Paghimo ang mga Eskultora

Sa sinugdanan niini, ang 350 ka toneladang bloke nga yelo nga ang gidak-on maoy mga 6 piye por 3 piye por 2 piye gihakot gikan sa Belgium ug kini gipatong-patong segun sa gidak-on sa himoong eskultora. Ang mga makina nga tighimog niyebe nakapatunghag 200 ka toneladang niyebe ug kini gibuga diha sa dagkong kahon. Pinaagi sa mga gabas nga demotor, tigib, sepilyo, ug mga straw, ang mga yelo ug niyebe giporma sa mga tigkulit ug eskultora nga gibase sa mga esena sa Bibliya.

Sumala sa lider sa proyekto nga si Jana Kürbis, dakong problema ang pagpatungha ug pagmentinar sa hustong klima. Apan ang tanang trabaho nga nalangkit sa proyekto gipabilhan pag-ayo. Usa ka babaye miingon: “Hastang nindota oy!” Usa ka lalaki nagkomento nga “wa nay makalabaw sa kanindot” sa eksibit. Apan, ang iyang asawa naguol tungod kay wala siyay hanaw sa Bibliya.

Gitan-aw sa kadaghanan, lakip sa mga batan-on, ang matag displey nga esena nga nagbasa sa impormasyon bahin sa gihulagway nga mga esena sa Bibliya. Sa mibiya kami sa Ice World nga eksibit, kami nagdala dili lamang ug mga rolyo sa film nga nagamit sa pagletrato kondili mga panumdoman nga dili makalimtan bahin sa mga estorya sa Bibliya nga giasoy pinaagi sa niyebe ug yelo.

[Hulagway sa panid 16]

Ang Hebreohanong personal nga ngalan sa Diyos, Jehova, makita diha sa brosyur sa eksibit

[Hulagway sa panid 16, 17]

Paglalang Kang Adan

[Hulagway sa panid 17]

Si Samson nagtumba sa mga haligi sa templo sa mga Filistehanon

[Hulagway sa panid 17]

Si David ug Goliat

[Hulagway sa panid 17]

Arka ni Noe

[Picture Credit Lines sa panid 16]

Moses in ice: Foto von: Nils Bergmann; snow crystal: snowcrystals.net; creation of Adam: Foto von: Nils Bergmann