Mobalik Kaha Kini Pag-usab?

KON atong balikan ang nangaging panahon, tingali kini mas maanindot bisag biya na sa modernong panahon. Pananglitan, sa kalibotan sa Kasadpan kini maoy panahon sa mga tartanilya, taas nga mga kalo, ug tag-as, sagyad nga mga saya. Apan kini maoy makalilisang usab nga panahon diin daghan kaayo ang nangamatay sa tibuok kalibotan. Unsay hinungdan?

Dili gubat, bisan tuod dihay gubat nga gisangka nianang panahona. Ang gihisgotan dinhi maoy laing hampak, ug kini gitawag ingong ang labing malaglagong hampak sa tibuok kasaysayan sa tawo—ang trangkaso Espanyola sa 1918-19.

Ang mga biktima sunod-sunod lang ug kamatay, kay wala na may tambal nga mosaler. Milyon-milyong batan-on nga maayog lawas kalit nga nangamatay sa edad nga daghan pa unta sila ug mahimo sa ilang kinabuhi. Dili maato ug lubong ang mga patayng lawas. Sa ubang mga lugar ang tanang tawo sa kabaryohan ug kalungsoran nahurot ug kamatay.

Kining tanan nahitabo mga 85 ka tuig kanhi. Nahibalo ba kita sa hinungdan nianang sakita? Mobalik kaha ang ingon niana nga kalamidad? Kon mobalik man ugaling kana, makapanalipod kaha kita sa atong kaugalingon?

Kini nga panghitabo adunay laing makapainteres nga bahin. Nahibalo ka ba nga dugay nang gihisgotan sa Bibliya ang kamatay nga atong nakita sa atong panahon? (Lucas 21:11; Pinadayag 6:8) Apil ba ang trangkaso Espanyola sa katumanan sa tagna sa Bibliya? Ang mga tubag niini ug sa ubang mga pangutana hisgotan sa sunod nga mga artikulo.

[Hulagway sa panid 3]

Nangandam sa paglubong sa mga biktima sa trangkaso Espanyola, sa Philadelphia, U.S.A.

[Credit Line]

Library of the College of Physicians of Philadelphia