Ang Imong Kahibulongan nga Pulang mga Selula sa Dugo

TINAMPO SA MAGSUSULAT SA PAGMATA! SA HABAGATANG APRIKA

Ang labing komon nga selula nga naglatay sa imong kaugatan nga maoy nakapapula sa imong dugo mao ang pulang selula. Ang usa lang ka tulo sa imong dugo aduna nay ginatos ka milyong pulang selula. Kon tan-awon diha sa mikroskopyo, kini samag mga donat nga lupyak ang tunga imbes nga lungag. Ang kada selula adunay ginatos ka milyong molekula nga hemoglobin. Sa baylo, ang matag hemoglobin maoy usa ka matahom nga linginon nga estruktura nga gilangkoban ug mga 10,000 ka idrohena, karbon, nitroheno, oksiheno, ug mga atomo sa asupre. Aduna usab kiniy upat ka mas bug-at nga mga atomo sa iron, mao nga ang dugo makadalag oksiheno. Tungod sa hemoglobin, ang pulang mga selula makatangtang sa biya nga carbon dioxide gikan sa imong mga baga ug dayon hulipan ug oksiheno ang imong lawas pinaagi sa hangin nga imong hanggabon.

Ang laing mahinungdanong bahin sa imong pulang mga selula mao ang panit niini nga gitawag ug membrane. Kining talagsaong panit maoy makapaarang sa mga selula nga mainat ug monipis aron kini makalusot sa imong gagmay kaayong kaugatan mao nga makasustento kini sa tanang bahin sa imong lawas.

Ang imong pulang mga selula gigama diha sa imong utok sa bukog. Inigsulod sa bag-ong selula sa imong kaugatan, mosirkular kini sa imong kasingkasing ug lawas kapin sa 100,000 ka beses. Dili sama sa ubang mga selula, ang pulang mga selula walay mga uyok. Kini makahatag kanila ug dugang luna sa pagdalag oksiheno ug makapagaan kanila, nga makatabang sa imong kasingkasing sa pagbombag daghan kaayong pulang mga selula ngadto sa tibuok nimong lawas. Bisan pa niana, kay wala man kiniy uyok, dili mabag-o niini ang iyang mga sangkap sa sulod. Busa, human sa mga 120 ka adlaw, ang imong pulang mga selula anam-anam nga madaot ug mohunit. Ang dagkong puti nga mga selula sa dugo nga gitawag ug mga phagocyte maoy mokaon niining nadaot nga mga selula ug iluwa niini ang mga atomo sa iron. Kini nga mga atomo motapot sa nag-agos nga mga protinang plasma ug magdala niini ngadto sa imong utok sa bukog aron gamiton sa paggamag bag-ong pula nga mga selula. Matag segundo, ang imong utok sa bukog magpagawas ug duha ngadto sa tulo ka milyong bag-ong pula nga mga selula ngadto sa imong kaugatan!

Kon ang imong daghan kaayong pula nga mga selula kalit nga mohunong sa pag-obra, mamatay ka sulod sa pipila ka minutos. Pagkamapasalamaton nato kang Jehova nga Diyos tungod niining kahibulongang bahin sa iyang kalalangan, aron atong matagamtam ang kinabuhi! Sa walay duhaduha ikaw mouyon sa salmista nga miingon: “Oh Jehova, ikaw nakasusi kanako, ug ikaw nakaila kanako. Pagadayegon ko ikaw tungod kay sa makalilisang nga paagi ako katingalahan nga pagkabuhat. Ang imong mga buhat katingalahan, ingon sa nasayran pag-ayo sa akong kalag.”​—Salmo 139:​1, 14.

[Diagram sa panid 24]

(Alang sa aktuwal nga pagkahan-ay, tan-awa ang publikasyon)

Pulang selula sa dugo

Membrane

Hemoglobin (gipadako)

Oksiheno