Gikan sa Among mga Magbabasa

Kabukiran​—Hinungdanon sa Kinabuhi Dinhi sa Yuta (Marso 22, 2005) Nahingangha gayod ako sa dihang miduaw ako sa Grand Teton. Apan natingala ako sa pagkabasa bahin sa kahinungdanon sa kabukiran. Mas nasabtan nako karon ang kahinungdanon sa kabukiran dinhi sa atong yuta ug ako mas mapasalamaton sa kahibulongang Maglalalang nga nagdisenyo niini.

J. G., Tinipong Bansa

Sa dihang nakita nako ang katahom sa kalalangan ni Jehova, dili nako ikahubit sa mga pulong ang akong gibati. Bisan pa sa pagdaot ug paghugawhugaw sa mga tawo sa atong palibot, kita mapasalamaton ug malingaw gihapon sa kabukiran. Ganahan akong mosugilon sa uban kon unsay mahitabo sa dili madugay, sumala sa gisaad sa Salmo 72:16.

R. C., Tinipong Bansa

Mga Batan-on Nangutana . . . Nganong Angay Kong Buhaton ang Hago nga Trabaho? (Marso 22, 2005) Ako nagtrabaho sa usa ka kompaniya sa pagpamintal nga gidumala sa akong amahan, apan may nag-ingon kanako nga niining trabahoa, dili kono nimo magamit ang imong utok. Apan, ang artikulo naghisgot nga si Jesus ug si Pablo nagtrabaho nga naggamit sa ilang mga kamot. Karon, ako mas madasigon nang motrabaho. Buot kong mabansay pag-ayo niining trabahoa aron akong magamit ang akong kahanas sa pagpanukod ug mga Assembly Hall ug Kingdom Hall.

M. Y., Japan

Nadasig gayod ako niining artikuloha! Kini nagpahinumdom pag-usab kanako nga ang atong pangunang katuyoan sa kinabuhi mao ang pag-alagad kang Jehova nga Diyos ug ang trabaho nga atong pilion kinahanglang nahiuyon sa maong katuyoan. Kining maanindot nga artikulo nagtukmod kanako sa pagpauswag sa akong tinamdan nga kinabubut-ong motrabaho sa mga buluhaton sa balay. Mas hinungdanon, kining artikuloha nakatabang kanako sa pagsabot sa panghunahuna ni Jehova bahin sa hago nga trabaho.

Y. K., Rusya

Kinabuhi​—Usa ka Katingalahang Kutay sa mga Kadena (Enero 22, 2005) Ako nag-edad ug 15 anyos. Sa akong klase sa biology sa eskuylahan, among gitun-an ang bahin sa energy metabolism. Sa dihang gidala nako kining magasina sa eskuylahan, gigamit sa akong magtutudlo sa biology kining artikuloha aron sa pagtudlo sa klase, nga nagpakita sa mga drowing niini. Human sa klase, ang tanan gustong makabatog kopya niining magasina. Gikan niining artikuloha, tin-aw kaayo kon unsa ka maalamon si Jehova. Siya takos gayong dayegon. Mahinamon akong nagpaabot sa panahon diin ang tanang buhing mga butang magadayeg kang Jehova!

Y. B., Rusya

“Kon Nahibalo Lang Unta Niini ang mga Tawo!” (Enero 8, 2005) Ako nag-edad ug 17 anyos, ug kanunay akong naghunahuna nga mobalhin ngadto sa lugar diin mas dako ang panginahanglan sa mga magmamantala sa Gingharian. Ang panig-ingnan ni David nakapalig-on sa akong determinasyon nga mobalhin dayon ngadto sa maong teritoryo iniggraduwar nako sa pag-eskuyla. Palihog ipadayon ang pagpatik ug makapadasig nga mga panig-ingnan nga sama niini. Ang mga batan-on sama nako kinahanglang dasigon kanunay aron mouswag diha sa buluhatong pagsangyaw.

K. O., Polandia

Ako nag-edad ug 20 anyos, ug ako nakahilak samtang akong gibasa kining artikuloha. Ako naghunahuna, ‘Kon ako mamatay nga bata pa, dili nako gustong magmahay tungod kay wala nako alagara si Jehova kutob sa akong maarangan!’ Gusto kong mahimong bug-os-panahong ebanghelisador sa dili madugay. Akong ibutang sa kuwadro kining artikuloha ug ibitay sa bungbong aron dili gayod nako malimtan ang akong gibati sa dihang gibasa nako kini. Salamat sa pagpatik ug maanindot nga mga kasinatian.

N. N., Japan