Ang Hunahuna sa Bibliya

Nganong Susihon ang Bibliya Alang sa Giya?

“Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang.”​—2 Timoteo 3:16.

ASA ka mosusi ug giya alang sa imong kinabuhi? Sa pagkakaron, daghan kaayong mabatonang giya sa halos tanang ulohan nga imong mahunahunaan. Sa gihapon, daghan ang mosusi sa karaang mga sinulat sa Bibliya alang sa giya.

Ugaling lang, wala kaayo pabilhi sa kadaghanan ang Bibliya, ilabina niining panahona nga kaylap kaayo ang impormasyon ug modernong teknolohiya. Ang pipila ka tinahod nga mga magtutudlo ug mga siyentipiko nagpaluyo sa ideya nga ang Bibliya dili na kono hinungdanon. Husto ba sila? Tungod sa daghang tinubdan sa giya karon, nganong angay man nimong susihon ang Bibliya?

Usa ka Basahon sa Kamatuoran

Usa ka higayon niana si Jesu-Kristo nagpahulay sa usa ka atabay ug nakig-estorya sa usa ka babayeng Samarianhon. Siya miingon sa babaye: “Ang Diyos maoy Espiritu, ug silang magasimba kaniya kinahanglan nga magasimba uban sa espiritu ug sa kamatuoran.” (Juan 4:24) Gipakita niining mga pulonga nga dunay matang sa pagsimba nga dalawaton sa Diyos. Aron kita makasimba diha sa kamatuoran, ang atong pagsimba kinahanglang nahiuyon sa gibutyag sa Diyos bahin sa iyang kaugalingon diha sa Bibliya. Ang Pulong sa Diyos mao ang kamatuoran.​—Juan 17:17.

Apan, daghang relihiyon ang nag-angkon nga nagtuo sa Bibliya, ug ang matag usa daw lainlaig gitudlo. Tungod niini, daghan ang nalibog kon unsa ba gayoy gitudlo sa Bibliya. Si Jesus ba ang Diyos, o siya ba ang Anak sa Diyos? Aduna bay kinabuhi human sa kamatayon o wala? Ang impiyerno ba usa ka tinuod nga dapit diin ang mga tawo sakiton human mamatay? Si Satanas ba usa gayod ka persona? Unsay nalangkit sa pagkahimong  Kristohanon? Mahinungdanon ba gayod alang sa Diyos ang atong mga lihok ug hunahuna? Husto ba ang pagpakigsekso sa dili pa magminyo tungod kay ikaw tinuod nga nahigugma sa usa? Daotan ba ang pag-inom ug makahubog nga mga ilimnon? a Daghang relihiyon nangangkon nga silay nagtudlo sa kamatuoran bahin niini. Apan kasagaran nga ang relihiyosong mga doktrina nagkasumpakiay sa usag usa. Dili mahimong silang tanan mao ang kamatuoran.​—Mateo 7:21-23.

Busa, sa unsang paagi imong makaplagan ang kamatuoran bahin sa Diyos ug ang matang sa pagsimba nga makapahimuot kaniya? Pananglitan, imong nahibaloan nga kinahanglan kang operahan aron maayo ang imong grabeng sakit. Unsay imong himoon? Kon posible, pangitaon nimo ang labing takos nga siruhano alang nianang klaseha sa operasyon. Imong susihon ang iyang kredensiyal ug kasinatian, makigkita ug makig-estorya ka kaniya. Sa kataposan, sa dihang ikaw kombensido na nga siya mao ang labing takos, ikaw mosalig ug magpaopera kaniya. Lahi tingali ang opinyon sa uban. Apan lig-on na ang imong pagtuo niini nga doktor.

Sa samang paagi, kon ikaw mohimog matinud-anon ug bug-os nga pagsusi sa mga ebidensiya, ikaw makabatog pagtuo sa Diyos ug sa Bibliya. (Proverbio 2:1-4) Sa pagpangitag mga tubag sa mga pangutana bahin sa matang sa pagsimba nga dalawaton sa Diyos, aduna kay kapilian. Mahimo nimong susihon ang nagkasumpaking mga pagtulon-an ug mga opinyon sa mga tawo, o kaha imong susihon ang hunahuna sa Bibliya.

Tukma ug Praktikal

Ang maampingong pagsusi sa Bibliya maghatag kanimog daghang pamatuod nga “ang tibuok Kasulatan inspirado sa Diyos ug mapuslanon.” b (2 Timoteo 3:​16, 17) Pananglitan, ang Bibliya punog detalye bahin sa mga tagna. Gipamatud-an sa kasaysayan ang katumanan niini. (Isaias 13:​19, 20; Daniel 8:3-8, 20-22; Miqueas 5:2) Bisan pag dili kini basahon sa siyensiya, ang Bibliya tukma sa siyentipikanhong paagi. Duna kiniy mga impormasyon bahin sa kinaiyahan ug panglawas nga gisulat libolibo ka tuig sa wala pa masabti sa mga siyentipiko ang samang mga butang.​—Levitico 11:​27, 28, 32, 33; Isaias 40:22.

Dugang pa, ang Bibliya motabang kanato sa paghimog maalamong mga desisyon. Kini adunay dagayang praktikal nga tambag bahin sa kinabuhi sa pamilya, pisikal ug emosyonal nga kahimsog, negosyo, ug ubang adlaw-adlaw nga mga butang. Ang Proverbio 2:​6, 7 nag-ingon: “Si Jehova magahatag ug kaalam; sa iyang baba nagagikan ang kahibalo ug ang katakos sa pag-ila. Ug siya magatipig ug praktikal nga kaalam alang sa mga matul-id.” Pinaagi sa pagsusi sa Bibliya alang sa giya, imong mabansay ang imong gahom sa pagsabot “sa pag-ila sa maayo ug sa daotan.”​—Hebreohanon 5:14.

Ang Pulong sa Diyos motabang usab kanato sa pagsabot bahin sa katuyoan sa kinabuhi. (Juan 17:3; Buhat 17:​26, 27) Gisaysay niini ang kahulogan sa mga kahimtang sa kalibotan. (Mateo 24:​3, 7, 8, 14; 2 Timoteo 3:1-5) Diha niana gipakita kanato sa Diyos kon unsaon niya pagwagtang ang pagkadaotan gikan sa yuta aron ang tawo makapahimulos sa hingpit nga panglawas ug walay-kataposang kinabuhi.​—Isaias 33:24; Daniel 2:44; Pinadayag 21:​3, 4.

Personal nga naeksperyensiyahan sa milyonmilyon nga ang Bibliya usa gayod ka kasaligang tinubdan sa praktikal nga kaalam. Ang mga magpapatik sa Pagmata! nagdapit kanimo sa pagsusi sa serye sa mga artikulo nga nag-ulohang “Ang Hunahuna sa Bibliya,” nga makita sa tanang gula niining magasina. Sa pagbuhat niana, makakaplag kag dugang pamatuod nga ang Bibliya mao ang labing maayong tinubdan sa giya alang sa imong kinabuhi.

[Mga footnote]

NAPALANDONG BA NIMO?

◼ Unsang matanga sa pagsimba ang dalawaton sa Diyos?​—Juan 4:24.

◼ Unsay angay nimong himoon aron makapahimulos sa kaalam sa Diyos?​—Proverbio 2:1-4.

◼ Sa unsang paagi nga ang Bibliya maoy tinubdan sa praktikal nga giya?​—Hebreohanon 5:14.