Sa Among mga Magbabasa

SUGOD niining gulaa, adunay pipila ka kausaban sa kahan-ayan sa Pagmata! Bisan tuod aduna nay mga kalainan, ang kadaghanan susama ra.

Determinado gihapon ang Pagmata! nga ipadayon ang tumong niini sulod na sa daghang katuigan. Sama sa gisaysay sa panid 4, ‘kining magasina gipatik aron sa paglamdag sa tibuok pamilya.’ Sa pagsusi sa mga hitabo sa kalibotan, pag-asoy bahin sa mga tawo sa lainlaing mga kultura, paghubit sa katingalahang mga butang sa kalalangan, paghisgot bahin sa panglawas, o pagsaysay sa siyensiya ngadto sa mga tawong dili siyentipiko, ang Pagmata! magpadayon sa pagpahibalo sa among mga magbabasa, nga magpaalinggat kanunay kanila sa kahimtang sa kalibotan.

Sa gula niini nga Agosto 22, 1946, ang Pagmata! nanaad: “Ang hugot nga pagsunod sa kamatuoran mao ang kinalabwang tumong niining magasina.” Isip pagtuman sa maong panaad, ang Pagmata! naningkamot kanunay sa pagpatik ug matinud-anong mga impormasyon. Aron makab-ot kana, ang mga artikulo bug-os nga gipanukiduki ug maampingong gisusi aron matino ang pagkatukma niini. Apan kining basahona ‘hugot nga nagsunod sa kamatuoran’ sa mas mahinungdanong paagi.

Ang Pagmata! naggiya kanunay sa mga magbabasa ngadto sa Bibliya. Apan, sugod niining gulaa, ang Pagmata! magpatik ug mas daghang artikulo nga gipasukad sa Bibliya kay sa miagi. (Juan 17:17) Ang Pagmata! magpadayon usab sa pagpatik ug mga artikulo nga magpakita kon sa unsang paagi ang praktikal nga tambag sa Bibliya makatabang kanato sa pagkinabuhing makahuloganon ug mabungahon karon. Pananglitan, daghang giya nga gipasukad sa Bibliya ang gihatag sa mga artikulong “Mga Batan-on Nangutana . . .” ug “Ang Hunahuna sa Bibliya,” nga magpabiling regular nga mga bahin niining magasina. Dugang pa, ipadayon sa Pagmata! ang pagtultol sa mga magbabasa sa saad sa Bibliya bahin sa usa ka malinawong bag-ong kalibotan nga sa dili madugay mopuli sa malapasong sistema sa mga butang karon.​—Pinadayag 21:​3, 4.

Unsa pay lahi? Sugod niining gulaa, ang Pagmata! patikon na nga binulan diha sa kadaghanan sa 82 ka pinulongan (kaniadto kini gipatik kaduha sa usa ka bulan diha sa daghang pinulongan). a Ang “Pagpaniid sa Kalibotan,” nga maoy regular nga artikulo sukad sa 1946, makita gihapon sa matag gula apan usa na lang ka panid imbes duha. Sa panid 31, among sugdan usab sa pagpatik ang makapahinam nga  bag-ong regular nga artikulo nga nag-ulohan ug “Unsay Imong Tubag?” Unsay anaa niini, ug sa unsang paagi magamit nimo kini?

Tan-awa kadiyot ang panid 31 niining gulaa. Ang pipila ka seksiyon niini nga panid makadani sa batan-ong mga magbabasa; ang ubang mga seksiyon magsulay sa memorya sa dugaydugay nang mga estudyante sa Bibliya. Ang seksiyon nga “Kanus-a Nahitabo?” makatabang kanimo sa paghimog talaan sa mga hitabo kon kanus-a nagkinabuhi ang mga tawo nga gihisgotan sa Bibliya ug kon kanus-a nahitabo ang hinungdanong mga panghitabo. Samtang ang mga tubag sa seksiyon nga “Gikan Niining Gulaa” makaplagan sa tibuok magasin, ang mga tubag sa kadaghanan sa ubang mga pangutana makita diha sa gipailang panid nianang gulaa ra usab, nga gibalit-ad pagpatik. Nganong dili una manukiduki sa dili pa nimo basahon ang mga tubag ug dayon ipaambit sa uban ang imong makat-onan? Mahimong gamiton usab nimo kining bag-ong artikulo nga “Unsay Imong Tubag?” ingong basehanan sa mga panaghisgot sa pamilya o sa usa ka grupo bahin sa Bibliya.

Mga 60 ka tuig kanhi, ang Pagmata! nanaad: “Kon bahin sa mga ulohan nga pagahisgotan, kining magasina maningkamot sa pagpresentar ug impormasyon pinasukad sa panglantaw sa tibuok kalibotan imbes sa lokal lamang. Makadani kini sa tanang matinud-anog-kasingkasing nga mga tawo sa tanang kayutaan. . . . Ang materyal ug kaundan sa magasin . . . matulon-anon, edukasyonal ug makaiikag sa kadaghanang mga tawo, batan-on man o tigulang.” Ang mga magbabasa sa tibuok kalibotan mouyon nga ang Pagmata! nakatuman sa maong panaad. Makasalig kamo nga ipadayon namo ang pagbuhat niana.

Mga Magpapatik

[Footnote]

[Mga hulagway sa panid 3]

Ginganlag “The Golden Age” niadtong 1919, giilisdan ug “Consolation” niadtong 1937, ug dayon “Awake!” niadtong 1946

[Mga hulagway sa panid 4]

Ang “Pagmata!” dugay nang naggiya sa mga magbabasa niini ngadto sa Bibliya

[Credit Lines]

Guns: U.S. National Archives photo; starving child: WHO photo by W. Cutting