Kini ba ang Bulawanong Katuigan?
Kini ba ang Bulawanong Katuigan?
ALAS 6:30 na sa buntag panahon sa kamig kaayo nga kabuntagon sa tingtugnaw sa Soweto, Habagatang Aprika. Kinahanglang mobangon na si Evelyn. a Sa iyang balay walay sentral nga sistema sa pagpainit, busa lisod kaayo.
Hinayhinay niyang gipahimutang sa kilid sa katre ang iyang rayumahong mga tuhod. Dayon siya milingkod ug mipahulay una. Inanayng nawala ang kasakit sa iyang mga bitiis. Unya nanukod si Evelyn ug mitindog. Miagulo siya sa kasakit. Nagkupot sa iyang bat-ang, si Evelyn miaginod paingon sa banyo, sama sa ‘apan-apan nga nagsaguyod.’—Ecclesiastes 12:5. b
‘Ay salamat, nahimo ko pa kini!’ miingon si Evelyn sa iyang kaugalingon. Dili lang kay nakamata pa siya ug nakadangat ug lain na usab nga adlaw kondili nalihok usab niya ang iyang nag-ul-ol nga lawas.
Apan, aduna pa siyay laing gikabalak-an. “Basin unyag angoangohon ko,” matod ni Evelyn. Matag karon ug unya makalimot siya kon diin niya gibutang ang iyang mga yawi, apan abtik pa ang iyang hunahuna. “Nag-ampo lang ko nga dili ako mawad-an sa maayong panghunahuna sama sa ubang mga tigulang,” matod pa ni Evelyn.
Sa batabata pa siya, wala gayod maghunahuna si Evelyn kon unsay mahitabo sa dihang matigulang na siya. Dali rang milabay ang mga katuigan, ug karon ang iyang lawas nagsigeg pahinumdom kaniya nga siya 74 anyos na.
Ang uban nga mas maayog kahimtang kang Evelyn ug wala kaayoy giantos nga grabeng sakit ug kapit-os tawhay nga makalantaw sa ulahing bahin sa ilang kinabuhi ingong bulawanong katuigan. Sama sa patriarkang si Abraham, sila makaabot tingali sa “igo nang katigulangon, tigulang ug tagbaw.” (Genesis 25:8) Ang uban nakasinati ug “malisod nga mga adlaw” ug makaingon lamang: “Ako walay kalipay niini.” (Ecclesiastes 12:1) Sa usa ka surbi daghan kaayong tawo ang dulom ug panglantaw sa panahon sa pagretiro nga ang magasing Newsweek nagsugyot nga ang terminong bulawanong katuigan pulihan ug “Mangiob nga Katuigan.”
Unsay imong panglantaw sa pagkatigulang? Unsa ang pipila ka suliran nga giatubang sa mga tigulang? Dili ba kalikayan ang pagkahimong angoangohon inigkatigulang na? Unsay mahimo aron sa pagpatunghag kalinaw sa hunahuna panahon sa bulawanong katuigan?
[Mga footnote]
a Ang pipila ka ngalan niining maong serye giusab.
b Kini nga teksto sa karaang basahon sa Bibliya sa Ecclesiastes dugay nang giila ingong masinaboton, balaknon nga paghubit sa kalisdanan sa pagkatigulang.