Mabatonan Nimo ang Kabaskog sa Pagkabatan-on Hangtod sa Kahangtoran!

ANG tawo nga gilansang tupad ni Jesus hapit nang mamatay. “Jesus,” siya nangaliyupo, “hinumdomi ako sa dihang moabot ka na sa imong gingharian.” Si Jesus mitubag: “Sa pagkatinuod ako magaingon kanimo karong adlawa, Ikaw makauban nako sa Paraiso.” (Lucas 23:​42, 43) Tinuod, kanang wala-hinganling tawo dili himalatyon tungod sa sakit nga motakboy sa pagkatigulang; siya gisilotan ug kamatayon tungod sa krimen nga iyang nabuhat. Bisan pa niana, kadtong nagkatigulang na makabaton ug pagdasig gikan niining malisod nga situwasyon.

Dili nato kapugngan ang pagdayeg sa talagsaong pagsalig nga nahuptan nianang tawhana! Bisan tuod si Jesus himalatyon na diha sa estaka sa pagsakit tupad kaniya, kanang tawhana wala magduhaduha nga si Jesus magamando gayod ingong Hari sa Gingharian sa Diyos. Dugang pa, siya naghunahuna nga mahimo siyang hinumdoman ni Jesus sa umaabot ug pakitaan ug kaayo. Tiaw mo kana​— ang maong hinukman nga tawo mabanhaw diha sa usa ka mahimayaong paraiso, diin si Jesus maoy Hari!

Ang kahimtang sa katawhan susama nianang sa himalatyon nga mamumuhat ug daotan. Sa unsang paagi? Bisan unsa pay atong pangedaron, kitang tanan nagbayad sa silot tungod sa sala ug nagkinahanglan ug kaluwasan. (Roma 5:12) Sama niadtong maong kriminal kita makalaom kang Kristo Jesus​—makalaom gani nga mahupayan sa mapait nga mga suliran nga modangat sa pagkatigulang! Sa pagkatinuod, si Jesus nagtanyag ngadto sa katawhan sa paglaom nga mabuhi sa walay kataposan nga may hingpit nga lawas ug hunahuna diha sa usa ka paraisong yuta.​—Juan 3:​16, 36.

Gibag-o ang Tanang Butang Alang sa mga Tigulang ug Bata

Ilalom sa Gingharian ni Kristo ang mga molupyo sa yuta “makakaplag gayod sa ilang tumang kalipay sa kadagaya sa pakigdait.” (Salmo 37:11) Walay moingon: “Ako masakiton.” (Isaias 33:24) Ang bisan unsang depekto nga kinahanglan natong antoson karon mawala na, tungod kay “ang bakol mosaka ingon sa laking osa, ug ang dila sa amang mosinggit sa kasadya.” (Isaias 35:6) Ang mga tigulang makabaton pag-usab sa kabaskog sa ilang pagkabatan-on; ang ilang unod ‘mabag-o labi pa kay sa pagkabatan-on.’​—Job 33:25.

 Apan, makataronganon ba ang paghambin sa maong paglaom? Aw, hunahunaa ang Usa nga nagtanyag sa paglaom sa Paraiso ngadto nianang himalatyong tawo. Sa daghang higayon ang mga panon sa katawhan nagdala ngadto kang Jesus ug mga tawong bakol, pungkol, buta, ug bungol. Kinabubut-on niyang giayo ang “tanang matang sa balatian.” (Mateo 9:​35, 36; 15:​30, 31; Marcos 1:40-42) Iyang gipakita kon unsay buhaton sa iyang Gingharian. Gibanhaw pa gani ni Jesus ang ubay-ubayng mga tawo nga nangamatay. (Lucas 7:11-17; Juan 11:38-44) Sa pagbuhat niana, iyang gipalig-on ang iyang saad nga “ang tanan nga anaa sa handomanang mga lubnganan makadungog sa iyang tingog ug manggula.”​—Juan 5:​28, 29; Buhat 24:15.

Handurawa ang pagmata didto sa Paraiso nga may bag-ong lawas, klaro ang panan-aw, ang mga dalunggan makadungog sa honi sa kalanggaman ug sa malipayong mga tingog, ang mga bukton ug bitiis wala na mag-ul-ol, ug ang hunahuna himsog kaayo. Mawala na hangtod sa kahangtoran ang “malisod nga mga adlaw” sa pagkatigulang. (Ecclesiastes 12:1-7; Isaias 35:​5, 6) Bisan ang kamatayon “pagawagtangon”​—kini ‘pagalamyon hangtod sa kahangtoran.’​—1 Corinto 15:​26, 54.

Ang pagtandi sa mga panghitabo sa kalibotan karon sa mga tagna sa Bibliya nagpaila nga kita nagkaduol na gayod sa kataposan sa pagkatigulang nga atong nasinatian. (Mateo 24:​7, 12, 14; Lucas 21:11; 2 Timoteo 3:1-5) Haduol na ang panahon sa dihang ang mga tigulang nga nagpasundayag ug pagtuo sa Diyos ug nag-alagad kaniya sa makausa pa makatagamtam sa kabaskog sa pagkabatan-on​—hangtod sa kahangtoran!

[Kahon/Hulagway sa panid 9]

Iehersisyo ang Imong Utok!

Maingon nga ang pisikal nga ehersisyo makapalig-on sa kaunoran, ang pagbansay sa hunahuna makapakondisyon usab sa utok. Aron mapalihok ang utok, kinahanglang mohimo kitag bag-ong mga butang. Ang mosunod maoy pipila ka paagi diin maestablisar ug mapalig-on ang mga koneksiyon sa selula sa utok.

◼ Ugmara ang kaikag diha sa bag-ong mga butang, sama sa arte, eskultura, mga dula nga naglangkit sa mga pulong (scrabble ubp.), o mga jigsaw ug crossword puzzle; pagtuon ug laing pinulongan.

◼ Pakigsulti sa lainlaing matang sa mga tawo; pakighugoyhugoy ug pakigkabildo aron dili laayan ug molantip ang hunahuna.

◼ Ugmara ang espirituwalidad. “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”​—Filipos 4:​6, 7.

◼ Pagbasa ug haom nga mga basahon; ipaambit sa uban ang imong nabasahan.

◼ Hinumdomi ug iasoy ang mga balita sa radyo o TV aron maehersisyo ang imong daklit ug dugay nga memorya.

◼ Gamita ang imong kamot nga dili kaayo pirmeng gamiton (wala kon ikaw tuohon, o ang balit-ad niana) sa pagpislit sa remote control sa TV, sa paggamit sa telepono, o sa pagsepilyo sa imong ngipon.

◼ Gamita ang tanan nimong mga sentido kutob sa maarangan sulod sa tibuok adlaw.

◼ Pagkat-on bahin sa makaiikag nga mga lugar sa duol o layo ug adtoa kana.

[Hulagway sa panid 8, 9]

Si Jesus nagsaad nga ang mapait nga panahon sa pagkatigulang sa dili madugay mahanaw na ug pulihan sa kabaskog sa pagkabatan-on hangtod sa kahangtoran