Pagpaniid sa Kalibotan

◼ Pinasukad sa kagustohan sa matag magbubuhis, ang gobyerno sa Espanya magkuha ug 0.5 porsiyento sa mga buhis ug ihatag kini ngadto sa mga organisasyon sa buhat-sa-kaluoy o sa Katolikong simbahan. Bisan tuod 80 porsiyento sa mga Katsila ang nag-angkong mga Katoliko, 20 porsiyento lang kanila ang mipabor nga ihatag kini sa simbahan.​—EL PAÍS, ESPANYA.

◼ “Ang pagkahinabako sa edad nga 30 magpaus-os sa gitas-on sa kinabuhi sa usa ka lalaki ug 5 ¹⁄2 ka tuig, ug sa babaye kapin sa 6 ¹⁄2,” matod pa sa mga tsart bahin sa gitas-on sa kinabuhi nga gihimo sa Institute of Actuaries. Hinunoa, ang paghunong sa pagpanabako sa edad nga 30 makapaus-os pag-ayo sa kapeligrohang mamatay gikan sa sakit nga nalangkit sa tabako.​—THE TIMES, INGLATERRA.

◼ Sa 2004, ang paggamit ug aseite sa tibuok kalibotan misaka ug 3.4 porsiyento ngadto sa 82.4 ka milyong baril kada adlaw. Ang Tinipong Bansa ug Tsina maoy nagkonsumo sa duolan sa katunga sa maong pagsaka diin karon ang Tinipong Bansa naggamit ug 20.5 ka milyon ug ang Tsina 6.6 ka milyong mga baril kada adlaw.​—VITAL SIGNS 2005, WORLDWATCH INSTITUTE.

“Pabilhi ang Imong Inahan”

Ang mga tig-analisar sa panarbaho nagbanabana nga kon ang usa ka Canadianong inahan nga anaa ra sa balay nga may duha ka anak nga nagtungha suweldohan sa tanan niyang ginabuhat, ang iyang tinuig nga suweldo, lakip na ang obertaym, maoy $163,852 (Canadian). Kining kantidara gipasukad sa aberids nga suweldo karon ug sa “100 ka oras sa usa ka semana nga pagtrabaho, nga dunay unom ka adlaw nga tag-15 ka oras ug usa ka adlaw nga 10 ka oras nga pagtrabaho,” nag-ingon ang mantalaang Vancouver Sun. Lakip sa mga responsabilidad sa mga inahan nga anaa ra sa balay maoy sama nianang nagtrabaho sa day-care, magtutudlo, drayber, tiglimpiyo, kosinera, nars, ug tigmentinar sa balay. Kini ang gitambag sa maong mantalaan: “Pabilhi ang imong inahan: Gamay ra tingali siyag suweldo.”

Magkasumpaki nga mga Prinsipyo sa mga Batan-on

Ang mga batan-ong taga-Pinlandia anam-anam nga “nagmugna ug kaugalingon nilang mga prinsipyo,” matod pa sa mantalaan sa University of Jyväskylä, sa Pinlandia. Kasagaran na karon nga “ang mga tawo mamili ug mga prinsipyo gikan sa lainlaing mga tuboran, nga mora lag namalit sa tindahan,” nag-ingon ang mantalaan. Ang mga resulta magkasumpaki usahay. Pananglitan, gituohan sa mga batan-on nga hinungdanon nga ipaambit ang bahandi ug kabtangan sa makiangayong paagi; apan sa samang panahon, ilang “gidawat ang agresibo ug pintas nga kompetisyon.”

Peligrosong Maabonohag Prion

Sa di pa dugayng balita, ang Health and Safety Agency for Medical Products sa Pransiya nag-ingon nga ang mga prion posible gayong mapasa pinaagig pag-abonog dugo. Ang mga prion maoy mga molekulang protina nga gituohang nakapatungha sa bag-ong sakit nga Creutzfeldt-Jakob (vCJD) diha sa mga tawo. Kining makamatay nga pagkadaot sa mga tisyu sa nerbiyos, nga wala pay nahibaloang tambal, mao ang laing klase sa sakit nga bovine spongiform encephalopathy nga motakboy sa tawo, nga mas nailhang mad-cow disease. Gideklarar nga mas grabe ang maong sakit tungod sa duha ka kaso nga nadiskobrehan didto sa Britanya nga posible gayong natakboyan ug vCJD pinaagig pag-abonog dugo. Sa pagkakaron, wala pay kasaligang pagdayagnos aron matumbok kining sakita sa dihang motungha na ang mga simtoma.

Nangandoy ug Mas Yagpis nga Lawas

Nahibaloan sa mga tigdukiduki nga “ang mga batang babaye nga nag-edad pa lang ug singko anyos wala ganahi sa ilang mga lawas ug nangandoy ug mas yagpis nga lawas,” nagtaho ang The Sydney Morning Herald. Ang maong taho nagkutlo sa usa ka pagtuon bahin sa Australianang mga bata nga nag-edad ug singko ngadto sa otso anyos. Duolag katunga sa maong mga bata gustong makabatog mas yagpis nga mga lawas, samtang ang susamang gidaghanon nag-ingon nga “magdiyeta sila kon motambok sila.” Ang usa ka tigpanukiduki nagsugyot nga ang dili-hustong panglantaw bahin sa nindot nga korte sa lawas “motultol ngadto sa ubos nga pagtamod sa kaugalingon, depresyon ug abnormalidad sa pagkaon inigdako nila.”