Ang Hunahuna sa Bibliya

Anak ba Gayod sa Diyos si Jesus?

UBAN ang hugot nga pagtuo si apostol Pedro miingon kang Jesus: “Ikaw mao ang Kristo, ang Anak sa Diyos nga buhi.” (Mateo 16:16) Kini maoy usa lamang sa daghang teksto sa Bibliya nga nagtawag kang Jesus ingong Anak sa Diyos, usa ka ekspresyon nga nakapukaw ug lainlaing mga reaksiyon diha sa mga tawong mahiligon sa relihiyon.

Daghan sa nagtuo nga si Jesu-Kristo mao ang Diyos ang nalisdan sa pagpatin-aw kon nganong siya gitawag nga Anak sa Diyos. Makataronganon ang paghunahuna nga dili mahimong siya kanang duha. Ang uban nagtuo nga si Jesus maoy usa ka importanteng persona sa kasaysayan, usa ka maalamong tawo, o tingali usa gani ka tinuod nga manalagna sa Diyos, apan kutob ra diha. Unsa ba gayoy gitudlo sa Bibliya? Hinungdanon ba kon unsay imong gituohan?

Ang Panganay sa Diyos

Gipakita sa Bibliya nga dihay panahon nga ang Diyos nag-inusara. Tungod sa iyang gugma, siya nakahukom nga ipaambit ang gasa nga kinabuhi pinaagi sa pagkahimong amahan​—apan dili sa tawhanong diwa. Hinunoa, gigamit ni Jehova ang iyang dili-matugkad nga gahom sa paglalang aron sa paghimo ug buhi, intelihente nga espiritung persona​—“ang sinugdan sa kalalangan sa Diyos,” nga atong nailhan karon ingong si Jesu-Kristo. (Pinadayag 3:14; Proverbio 8:22) Tungod kay si Jesus direkta mang gilalang sa Diyos sa dihang ang Diyos nag-inusara pa, si Jesus angayan nga tawgong “bugtong nga anak” ug “panganay sa tanang kalalangan.”​—Juan 1:14; Colosas 1:15.

Busa, tin-aw nga ingong una sa mga linalang sa Diyos, dili mahimong si Jesus mao ang Maglalalang, “ang bugtong nga Diyos.” (1 Timoteo 1:17) Sa laing bahin, ang Diyos naghatag sa iyang Anak ug daghang pribilehiyo. Pananglitan, pinaagi kang Jesus, ang Diyos naglalang sa “tanang ubang butang,” lakip na gani sa mga manulonda. Kini nga mga manulonda gitawag ingong ‘mga anak sa Diyos’​—kay si Jehova man ang naghatag kanila ug kinabuhi.​—Colosas 1:16; Job 1:6; 38:7.

 Human andama ang yuta aron kapuy-an sa tawo, ang Diyos, nga dayag nga nakigsulti sa iyang panganay nga Anak, miingon: “Buhaton nato ang tawo sumala sa atong larawan.” (Genesis 1:26; Proverbio 8:22-31) Busa, gilalang usab ni Jehova ang unang tawhanong anak sa Diyos, si Adan, pinaagi sa espiritung linalang nga nahimong Jesus.​—Lucas 3:38.

Si Jesus Nahimong Tawhanong Anak sa Diyos

Si apostol Juan nagtug-an kanato nga sa tinudlong panahon, ang espiritung Anak sa Diyos “nahimong unod ug mipuyo sa atong taliwala.” (Juan 1:14) Aron mahimo kini nga kausaban sa kinaiyahan ni Jesus, sa milagrosong paagi ang Diyos nagbalhin sa kinabuhi ni Jesus gikan sa langit ngadto sa tagoangkan sa Hudiyang ulay nga si Maria. Nianang paagiha si Jesus nagpabiling Anak sa Diyos, bisan tuod tawhanon. Dugang pa, tungod kay ang Diyos, dili si bisan kinsang tawo, ang naghatag kang Jesus ug kinabuhi, si Jesus natawo nga hingpit, walay sala. “Ang matawo pagatawgong balaan, Anak sa Diyos,” miingon ang manulondang si Gabriel kang Maria.​—Lucas 1:35; Hebreohanon 7:26.

Ang pamatuod sa pagkaanak ni Jesus samtang siya unodnon naggikan mismo sa Amahan. Sa panahon sa pagbawtismo kang Jesus, si Juan Bawtista nakasaksi nga ang mga langit nabuksan ug nakadungog ug usa ka tingog gikan sa langit nga nag-ingon: “Kini mao ang akong Anak, ang hinigugma, nga akong giuyonan.” (Mateo 3:​16, 17) Mao diay nga giingnan ni Juan ang iyang mga tinun-an: “Nakita ko kini, ug ako nagpamatuod nga kini siya mao ang Anak sa Diyos.”​—Juan 1:34.

Panahon sa iyang yutan-ong ministeryo, wala ibandilyo ni Jesus nga siya ang Mesiyas, ang Anak sa Diyos. (Marcos 8:​29, 30) Subsob niyang gitugotan ang mga tawo nga mohimo mismo nianang maong konklusyon pinaagi sa pagpamati sa iyang mga pagtulon-an, pagpaniid sa iyang paagi sa pagkinabuhi, ug pinaagi sa pagsaksi sa iyang daghang milagro, nga ang kadaghanan niini nakita sa mga tawo. Pananglitan, iyang giayo “ang tanang masakiton, ang mga nag-antos sa nagkadaiyang mga balatian ug mga pagsakit.” (Mateo 4:​24, 25; 7:​28, 29; 12:15) Ang mga buta, bungol, bakol, ug ang mga masakiton nangadto kang Jesus, ug iyang giayo sila. Gibanhaw pa gani niya ang mga patay! (Mateo 11:4-6) Nakita sa iyang mga tinun-an nga sa milagrosong paagi si Jesus milakaw sa tubig ug nagpalinaw sa hangin ug mga balod panahon sa usa ka makusog nga unos. Tungod niini nga pasundayag sa gahom, ang mga tinun-an natukmod sa pag-ingon: “Sa pagkatinuod ikaw mao ang Anak sa Diyos.”​—Mateo 14:24-33.

Kon sa Unsang Paagi ang Anak sa Diyos Makahatag Kanimo ug Kaayohan

Nganong gibalhin sa Diyos ang iyang bugtong nga Anak gikan sa langit nganhi sa yuta, ug sa ngadtongadto makaagom dinhi sa mabangis nga kamatayon? “Aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Oo, pinaagi lamang sa pagkamatay nga si Jesus ‘makahatag sa iyang kalag nga usa ka lukat baylo sa daghan.’ (Mateo 20:28) Sa pagkatinuod, sa tibuok kasaysayan, walay usa nga nakapakita ug mas labawng gugma alang sa katawhan kay kang Jehova ug sa iyang panganay nga Anak.​—Roma 8:32.

Human sa iyang kamatayon, si Jesus “gipahayag nga Anak sa Diyos” sa linain ug gamhanan kaayo nga paagi, “pinaagi sa pagkabanhaw gikan sa mga patay” balik ngadto sa kinabuhi ingong espiritung Anak sa Diyos. (Roma 1:4; 1 Pedro 3:18) Unya, human maghulat nga mapailobon diha sa kiliran sa iyang Amahan sulod sa duolan sa 19 ka siglo, si Jesus gientrono ingong Hari sa Gingharian sa Diyos​—usa ka langitnong kagamhanan nga sa dili madugay magamando sa tibuok yuta.​—Salmo 2:​7, 8; Daniel 7:​13, 14.

Gusto ka bang makabaton sa pag-uyon niining gamhanang Anak sa Diyos? Kon mao, gidasig ka namo sa pagsusi sa iyang mga pagtulon-an ug pagpadapat niana sa imong kinabuhi. Si Jesus mismo miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Oo, hinungdanon gayod kon unsay gituohan sa usa bahin sa Anak sa Diyos!​—Juan 3:18; 14:6; 1 Timoteo 6:19.

NAHIBULONG KA BA?

◼ Nganong gitawag man si Jesus nga bugtong nga Anak sa Diyos?​—Juan 1:​3, 14; Pinadayag 3:14.

◼ Nganong makatuo ka man nga si Jesus mao ang Anak sa Diyos?​—Mateo 3:​16, 17.

◼ Sa unsang paagi makabenepisyo ka sa pagtuo nga si Jesus mao ang Anak sa Diyos?​—Juan 3:16; Juan 14:6; 17:3.

[Mga hulagway sa panid 12, 13]

Ang maalamong pagpanudlo ug gamhanang mga milagro ni Jesus nagpamatuod nga siya dili ordinaryong tawo