Ang Pangandoy nga Kita Higugmaon

Kaniadto dihay usa ka babaye nga ginganlag Lea nga nagpuyo sa usa ka siyudad nga nahimutang sa dapit nga Turkey na karon. Si Lea ordinaryo ug panagway, apan ang iyang manghod nga si Raquel guwapa.

DIHAY usa ka lalaki nga dako kaayog gugma kang Raquel nga tungod niana siya misugot sa pagtrabaho ug pito ka tuig alang sa amahan ni Raquel aron mapangasawa siya. Apan sa gabii sa kasal, si Lea maoy gipuli sa ilang amahan kang Raquel. Ambot kon unsay hunahuna ni Lea bahin sa plano sa iyang amahan, apan seguradong nahibalo siya nga kini dili usa ka maayong paagi sa pagsulod sa kaminyoon.

Sa dihang nadiskobrehan kini, ang bag-ong bana tutol kaayo. Gipatin-aw sa amahan nga batasan na nila nga ang magulang nga anak nga babaye maoy paminyoon ug una. Busa, si Lea naminyo sa malimbongong paagi ngadto sa usa ka lalaki kansang unang gugma mao ang iyang manghod, nga giminyoan usab sa maong lalaki. Pagkadako gayod tingali sa kaguol ni Lea sa dihang nakita niya nga ang iyang manghod maoy gipakitaag dakong pagmahal! Si Lea walay ikahinugilon nga makalukso-sa-kasingkasing nga mga yugto sa ilang panagtratohay ug wala kaayo siyay mahinumdoman nga malipayong mga gutlo sa adlaw sa iyang kasal, kon aduna man ugaling. Pagkadako gayod tingali sa iyang pangandoy nga unta higugmaon usab siya sama kang Raquel! Busa, kining nahitabo kang Lea maoy usa sa mga rason kon nganong kanunay niyang bation nga siya wala higugmaa ug wala kinahanglana. a

Daghan karon ang parehas ug pagbati kang Lea. Kitang tanan dunay dako kaayong panginahanglan sa pagpakita ug gugma ug sa pagbati nga gihigugma. Tingali nangandoy kita ug kapikas nga magmahal kanato. Gusto usab kita nga higugmaon sa atong mga ginikanan, anak, igsoon, ug sa atong mga higala. Sama kang Lea, tingali atong makita ang uban nga malipayon tungod kay dunay naghigugma kanila, samtang kita intawon wala.

Sukad sa pagkabata kita nakadungog ug romantikong mga sugilanon bahin sa maanyag ug ambongan nga mga tawo nga nagkahigugmaay ug nagkinabuhi nga malipayon hangtod sa kahangtoran. Ang mga mag-aawit sentimental nga nanag-awit bahin sa gugma; ang mga magbabalak naghimaya niini. Apan, usa ka tigdukiduki bahin niini misulat: “Walay bisan unsang kalihokan o buluhaton nga sa sinugdan punog paglaom, apan sa kataposan tugob sa kaguol, sama sa gugma.” Sa pagkatinuod, ang atong relasyon sa mga tawong kinasuoran kanato maoy kasagarang modulot ug hilabihang kasakit​—nga mohatag kanatog tumang kaguol imbes dumalayong kalipay. Sa daghang nasod, mga 40 porsiyento sa tanang magtiayon karon magdiborsiyo, ug daghang magtiayon nga wala magdiborsiyo dili malipayon.

Diha sa daghang kayutaan nagkadaghan usab ang mga pamilyang usa lang ang ginikanan ug mga pamilyang problemado, diin ang mga bata nag-antos usab. Apan, ang mga bata maoy ilabinang nagkinahanglan ug emosyonal nga seguridad sa usa ka mahingawaon, mahigugmaon nga pamilya. Busa, unsa nay nahitabo sa gugma? Asa kita modangop aron makakat-on bahin niining hamili nga hiyas? Ang sunod nga mga artikulo maoy motubag niining mga pangutanaha.

[Footnote]