Gikan sa Among mga Magbabasa

Kanser sa Panit​—Kon sa Unsang Paagi Mapanalipdan ang Imong Kaugalingon (Hunyo 8, 2005) Ang impormasyon niini nga serye maayo kaayo. Ako usa ka pangulong doktor sa usa ka klinika nga nag-atiman sa mga may sakit sa panit. Buot ko nga makadawat ug dugang mga kopya aron akong iapod-apod.

K. W., Denmark

Tungod niini nga artikulo, ako nakadesisyon sa pagpahiling sa bugon nga mitubo sa akong likod. Ang doktor miingon nga kon pasagdan, kini mahimong kanser nga gitawag ug Bowen’s disease. Ako nagpaopera dayon. Kini nga serye nakatabang kanako sa paglihok dihadiha.

S. M., Japan

Ang kahon sa panid 7 nagtukmod kanako nga ipaeksamin sa doktor ang akong alom. Ang dayagnosis​—malignant melanoma diha sa unang hugna niini. Sama sa giingon sa artikulo, kon ang melanoma dili dayon matambalan, kini mahimong makapatay. Ako mapasalamaton sa akong doktor ug niining serye sa Pagmata!, nga posibleng nakaluwas sa akong kinabuhi!

L. S., Tinipong Bansa

Pagsubli nga Magamit sa Pamilya (Mayo 8, 2005) Ako tigbasa lamang sa mga artikulong ganahan nako, apan human makita ang “Pagsubli nga Magamit sa Pamilya,” akong gibasa ang tibuok magasin aron akong matubag ang mga pangutana. Wala madugay nabatasan na nako ang pagbasa sa tibuok magasin!

Y. Z., Rusya

Nagustohan nako kini nga panid. Gawas nga makalingaw, kini nagpaamgo kanako nga kinahanglang akong basahon ug maayo ang mga artikulo!

D. S., Britanya

Mga Batan-on Nangutana . . . Nganong Ganahan man Kong Makigsuod sa Kuwestiyonableng mga Tawo? (Hulyo 22, 2005) Human sa napulo ka tuig nga “kanunayng puliki diha sa buluhaton sa Ginoo,” morag wala gihapon nako matul-id ang akong kahuyangan. (1 Corinto 15:58) Akong naamgohan nga dili hamtong ang akong emosyon, apan wala ako mahibalo kon unsaon pagbuntog niini nga suliran. Nagpasalamat ako kang Jehova sa mga artikulo nga sama niini, nga nakatabang kanato nga magkinabuhi niining presenteng sistema.

J. F., Tinipong Bansa

Kini nga artikulo naghisgot nga ‘dili bug-os likayan kadtong walay hibangkaagan sa kamatuoran sa Bibliya.’ Mahimo ba ninyong ipatin-aw ug dugang kining bahina? Komosta kon ang usa ka Kristohanon nagtinguha nga makigsuod sa usa ka dili-magtutuo? Dili ba angay kining kabalak-an?

D. P., Tinipong Bansa

Ang “Pagmata!” nagtubag: Ang artikulo wala magdasig sa mga Kristohanon sa pagpakigsuod sa mga dili-magtutuo. Sa pagkatinuod, sa bisan unsang kahimtang kining prinsipyoha sa Bibliya mapadapat: “Ang daotang pakig-uban makadaot sa mapuslanong pamatasan.” (1 Corinto 15:33) Apan, wala kini nagpasabot nga bug-os natong likayan ang mga dili-magtutuo. Sama sa gihisgotan sa artikulo, ang Bibliya nag-awhag kanato nga “buhaton nato ang maayo ngadto sa tanan”​—dili lamang sa atong isigkamagtutuo. (Galacia 6:10) Sa pagkatinuod, tungod sa kinaiyahan sa atong Kristohanong ministeryo kita kinahanglang magpakitag tiunay nga interes sa mga tawo, nga trataron sila uban ang dignidad ug pagtahod. Si Jesus naghatag ug maayong panig-ingnan maylabot niini. Wala gayod siya makigsuod niadtong walay interes sa pagtuman sa kabubut-on sa Diyos. (Juan 15:14) Sa samang higayon, iyang giduol ang mga tawo ug siya nahibalo kon unsaon sa pagpakigsulti ug pagpakiglabot kanila. Ingong resulta, si Jesus nakahigayon sa paghatag ug epektibong pamatuod. (Tan-awa, pananglitan, ang asoy sa Lucas 7:36-50.) Sama ni Jesus, kita makapadayon sa pagpakitag matinahorong tinamdan ngadto sa mga dili-magtutuo. Ang atong tumong mao nga mahimong “makataronganon, magpasundayag ug bug-os nga kalumo sa tanang tawo.” ​—Tito 3:2.