Kon Nganong Lisod Makakaplag ug Tinuod nga Gugma

Daghan kaayo ang mga tambag bahin sa paghigugmaay. Ang mga terapista ug magtatambag maghatag ug mga giya. Ang mga interbiyo sa iladong mga tawo diha sa telebisyon kasagarang maghisgot bahin niini.

DAGHANG Web site sa Internet nagtanyag ug mga impormasyon kon sa unsang paagi makakaplag ug gugma. Kini nag-ingon nga ikaw mahibalo sa “makaiikag ug talagsaong mga sekreto” ug nga ikaw makakat-on gikan sa “propesyonal nga mga tigparis-paris,” “mga eksperto bahin sa mga relasyon,” ug “mga espesyalista sa gugma,” gawas pa sa mga sikoterapista, sikolohista, ug mga astrologo.

Himalitan usab ang mga libro ug magasin bahin sa gugma, nga pipila niini naghatag ug dili-katuohang mga garantiya. Pananglitan, usa ka libro nag-ingon nga tudloan ka niini “kon sa unsang paagi ang uban imong mapahigugma kanimo.” Laing libro nagtanyag sa pagtudlo kon sa unsang paagi “makakita ug trato nga angay gayod kanimo sulod lang sa usa ka bulan.” Kon dugayan ka sa usa ka bulan, dunay libro nga nagpadayag kon sa unsang paagi imong mapahigugma kanimo ang usa ka tawo hangtod sa hangtod “sulod lang sa 90 minutos o menos pa.”

Ang kadaghanan sa mga tambag dunay kabayaran. Ug daghang tawo mobayad makaduha. Sila mobayad ug salapi aron magpatambag. Dayon, kon sayop ang tambag, nga maoy kasagarang mahitabo, bayran nila kini ug kasakit sa dughan tungod kay dili man epektibo ang tambag sumala sa ilang gidahom.

Apan adunay usa ka tinubdan sa tambag nga epektibo gayod kon ipadapat. Dugang pa, kini matinud-anong naghisgot bahin sa gugma, nga wala maghatag ug dili-katuohang mga pahayag ug dili-realistikanhong mga garantiya. Bisan ug kini dugay na kaayong gisulat, ang tambag niini dili gayod kinaraan. Ang Awtor niini walay-sama sa kaalam ug dili-hitupngan sa gugma. Tingali aduna ka nay kaugalingong kopya niining espesyal nga gasa​—ang Balaang Bibliya. Bisag unsa pay atong kahimtang o kagikan, ang Bibliya nagtudlo kanato kon unsay atong kinahanglang mahibaloan bahin sa gugma. Ug ang tambag niini libre.

Ang Bibliya ba makatabang kanato sa pagbaton ug maayong  relasyon sa tanang tawo? Dili. Ang ubang tawo dili moangay kanato bisag unsa pay atong himoon. Ug ang tinuod nga gugma dili mahimong ipugos. (Awit ni Solomon 8:4) Apan, pinaagi sa pagpadapat sa tambag sa Bibliya, mas dako ang atong kahigayonan nga makaugmad ug mahigugmaong relasyon sa uban, bisan tuod kini magkinahanglan tingalig panahon ug paningkamot. Kining matanga sa gugma hisgotan sa sunod artikulo, apan una pa niana, matikdi kon nganong mas lisod makakaplag ug tinuod nga gugma niining panahona.

Ang Gugma “Mobugnaw”

Sa iyang dakong tagna bahin sa “kataposan sa sistema sa mga butang,” si Jesus tukma nga nagtagna bahin sa mga kahimtang ug kiling sa atong panahon. Siya miingon nga ang timaan sa kataposan mao ang pagkamalapason ug mga gubat​—nga kaatbang gayod sa gugma! Siya miingon usab nga ‘daghan ang magbudhiay sa usag usa ug magdumtanay sa usag usa’ ug nga “mobugnaw ang gugma sa kadaghanan.” (Mateo 24:3-12) Dili ka ba mouyon nga nagkabugnaw na ang gugma sa kalibotan ug nga wala nay tinuod nga gugma, bisan sa sulod sa pamilya?

Gawas pa sa gipamulong ni Jesus, si apostol Pablo detalyadong naghubit sa batasan sa mga tawo sa “kataposang mga adlaw.” Siya misulat nga ang mga tawo unya “magmahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos.” (2 Timoteo 3:1-4) Kini nga mga kinaiya komon na kaayo diha sa daghang kayutaan.

Hunahunaa: Ganahan ka ba sa mga tawong hambogiro ug dili-mapasalamaton, sa mga tawong dili-maunongon, kinsa magbutang-butang o magbudhi kanimo? Gusto ka bang makighigala sa mga tawong mahigugmaon sa ilang kaugalingon, sa salapi, o sa kalipayan? Kay gitugotan sa makikaugalingon nga mga tawo ang kadalo ug personal nga mga pangibog nga mag-impluwensiya sa ilang relasyon sa uban, lagmit ang bisan unsang interes nga ilang ipakita sa uban maoy hinakog. Busa, ang Kasulatan maalamong nagtambag: “Magpahilayo ka kanila.”​—2 Timoteo 3:5.

Matikdi usab nga kini nag-ingon nga ang mga tawong magkinabuhi sa kataposang mga adlaw “walay kinaiyanhong pagbati,” o sumala pa sa pagkapamulong niini sa laing hubad, sila “walay natural nga pagbati alang sa ilang mga pamilya.” Ikasubo, nagkadaghang kabataan ang nagdako sa ingon niana nga mga panimalay. Kasagaran, ang makat-onan sa mga bata bahin sa gugma ilang makuha gikan sa media. Apan ang media tukma ba nga naghulagway sa matang sa gugma nga moresulta ug mas maayong relasyon?

Dili-Realistikanhong Gugma o Tinuod nga Gugma?

Kadaghanan kanato naimpluwensiyahan sa usa ka paagi sa media. Usa ka tigdukiduki misulat: “Sukad sa atong pagkabata, ang mga sine ug telebisyon, mga libro ug magasin, musika sa radyo ug CD, panganunsiyo, ug bisan mga balita kanunayng magbombardiyo kanato ug mga ideya bahin sa sekso, gugma, ug panagtratohay nga dili realistikanhon ug lisod hikalimtan.” Siya miingon usab: “Ang kadaghanang paghulagway sa media sa sekso, gugma, ug panagtratohay nakaimpluwensiya o nakapasamot sa atong dili-realistikanhong mga pagdahom nga dili daling makalimtan sa kadaghanan kanato. Tungod niini kita dili malipayon sa atong relasyon sa atong mga paris maingon man sa atong kaugalingon.”

Oo, ang mga libro, sine, ug mga awit talagsa lang  mohatag ug tukma nga paghulagway sa gugma. Kon buot sabton, ang ilang pangunang katuyoan maoy paglingaw, dili pag-edukar. Busa, ang mga magsusulat mosulat ug daghang nobela bahin sa dili-realistikanhong mga kahimtang ug paghigugmaay ug kini dakog kita. Apan ikasubo, kining hinanduraw nga estorya daling isipon ingong tinuod. Busa, ang mga tawo kasagarang maguol kon ang ilang relasyon dili sama nianang sa mga bida sa salida o nobela. Busa sa unsang paagi atong mailhan ang kalainan sa kon unsay dili-realistikanhon ug kon unsay tinuod, kon unsay gugma sumala sa paghulagway sa media ug kon unsay tinuod nga gugma? Tagda ang mosunod nga mga pagtandi.

Gugma Sumala sa Paghulagway sa mga Nobela Kontra Tinuod nga Gugma

Ang mga estorya sa gugma diha sa mga libro, sine, o mga pasundayag sa entablado nagkalainlain, apan ang pagkahan-ay o pagkabalay niini halos parehas lang. Ang magasing Writer nag-ingon: “Ang kadaghanan sa isulat nga mga estorya sa gugma dunay gisunod nga sumbanan. Adunay rason niini. Ang estorya kasagarang bahin sa usa ka lalaki ug babaye nga magkahigugmaay, dayon sila magkabulag apan sa ulahi magkabalikay. Kini nga pagkahan-ay sa estorya maoy gusto kaayo sa mga magbabasa, bisag unsa pa ang lokasyon o panahon sa maong estorya.” Atong susihon kining popular nga paagi sa paghan-ay sa estorya.

Usa ka lalaki ug babaye magkahigugmaay: Nakaila sa ambongang prinsipe ang usa ka maanyag nga babaye, ug sila nagkahigugmaay. Usa ka malamposong awtor nagtambag niadtong gusto nga mahimong mga magsusulat ug mga nobela sa gugma nga “kinahanglang masabtan dayon sa imong magbabasa sa una pa lang nga panagkita [sa duha ka bida] nga sila para gayod sa usag usa.”

Ang ideya nga ang lalaki ug babaye magkahigugmaay sa una pa lang nga panagkita morag nagpasabot nga ang tinuod nga gugma maoy usa lang ka pagbati​—usa ka dili-mabangbang nga emosyon nga mangibabaw sa dihang imong mahimamat ang tawong angay kanimo​—nga ikaw kalit na lang nga mahigugma ug dili kinahanglang maningkamot o mahibalo bahin nianang tawhana. Apan, ang tinuod nga gugma dili lang lunlon pagbati. Tinuod nga nalangkit ang pagbati, apan ang gugma maoy usa ka halawom nga tawhanong bugkos nga naglakip usab sa pagpadapat sa mga prinsipyo ug kini nga bugkos magkalig-on kon kini palamboon ug mentinahon sa hustong paagi.​—Colosas 3:14.

Dugang pa, nagkinahanglan ug panahon aron mailhan ang usa ka tawo. Kon sa una pa lang ninyong panagkita ikaw moingon nga nakit-an na nimo ang tawo nga angay kanimo, kini dili gayod realistikanhon ug kasagarang moresulta ug kaguol. Dugang pa, sa pagtuo nga imo nang nakaplagan ang tinuod nga gugma, basin mabutaan ka na hinuon sa mga timailhang nagpakita nga kini dili gayod tinuod nga gugma. Ang pagpilig maayong kapikas nagkinahanglan ug labaw pa kay sa pagdepende lang sa imong pagbati nga nahaylo gumikan sa bul-og sa kaibog. Busa ayaw pagdali. Sa pagkatinuod, gipakita sa daghang pagtuon nga ang dili-maalamong pagpili ug kapikas dunay dili maayong epekto sa trabaho, sa mental ug pisikal nga kahimsog, ug bisan sa gitas-on sa kinabuhi.

Sila magkabulag: Usa ka daotang konde midagit sa maanyag nga babaye ug mikalagiw sa kastilyo. Gipangita sa prinsipe ang babaye bisan pa sa dakong peligro. Usa ka tigpamaba alang sa Romance Writers of America miingon: “Ang dugokan sa usa ka nobela sa gugma kinahanglan nga mahitungod sa duha ka tawong  nagkahigugmaay ug nakigbisog sa pagpalampos sa ilang relasyon.” Diha sa kadaghanang nobela, ang relasyon magmalamposon gayod​—ang mga magbabasa nasayod niana. Ang mga problema, nga sagad walay kalabotan sa inyong relasyon, mabuntog.

Sa tinuod nga kinabuhi kanunay nga dunay mga problema sa gawas ug sa sulod sa usa ka relasyon. Kini may kalabotan tingali sa salapi, trabaho, mga paryente, ug mga higala. Ang mga problema motungha usab kon dili makab-ot sa usa ang mga pagdahom sa iyang paris. Diha sa mga nobela o salida, ang kahuyangan sa mga bida kasagarang dili kaayo seryoso, apan dili kanunay ingon niana sa tinuod nga kinabuhi. Dugang pa, kon dili kita maningkamot, ang tinuod nga gugma dili makasagubang sa mga pagsulay o sa nagkasumpaking mga panglantaw, kagikan, tinguha, ug personalidad. Hinunoa, ang gugma naglangkit ug kooperasyon, pagkamapaubsanon, kalumo, pasensiya, ug hataas nga pailob​—mga hiyas nga dili sayon nga ugmaron.​—1 Corinto 13:4-7.

Sila magkabalikay: Giluwas sa prinsipe ang maanyag nga babaye ug gihinginlan ang konde. Ang prinsipe ug ang babaye nagpakasal ug sila nagkinabuhi nga malipayon hangtod sa kahangtoran. Usa ka editor sa mga nobela bahin sa gugma nagtambag sa mga nagplano nga mahimong mga magsusulat: “Sa imong paniklop sa estorya kinahanglan nga ang mga bida magmalipayon hangtod sa kahangtoran. . . . Ang magbabasa kinahanglang malipay tungod kay ang mga bida nagkadayon ug nagmalipayon.” Wala kaayoy mga nobela sa gugma nga naghisgot kon unsay nahitabo sa mga bida paglabay sa daghang tuig human sa kasal. Kay nianang panahona tingali nabutang sa pagsulay ang ilang relasyon tungod sa dili pagsinabtanay ug sa daghan pang ubang mga problema ug kalisdanan. Sumala sa gipakita sa estadistika sa diborsiyo, sa ngadto-ngadto daghang kaminyoon dili makalahutay sa maong mga pagsulay.

Oo, ang gugma nga gihulagway diha sa mga nobela wala kaayo magkinahanglan ug paningkamot; apan ang tinuod nga gugma nagkinahanglan ug panlimbasog. Ang pagsabot sa kalainan niining duha magpanalipod kanimo batok sa pagkainosente ug pagkadili-realistikanhon. Magpugong usab kini kanimo sa pagdalidali sa pagsulod sa usa ka relasyon nga basin imong basolan sa ulahi. Ang sunod nga artikulo maghisgot kon sa unsang paagi ikaw makaugmad ug tinuod, dili-mahakogong gugma ug kon sa unsang paagi ikaw mahimong mas hiligugmaon.

[Blurb sa panid 5]

Ang mga tawong dili kaayo mahigugmaon dili usab kaayo hiligugmaon

[Blurb sa panid 7]

Ang gugma nga gihulagway diha sa mga nobela wala kaayo magkinahanglan ug paningkamot; apan ang tinuod nga gugma nagkinahanglan ug panlimbasog

[Kahon/Hulagway sa panid 6]

Mga Bida sa mga Nobela sa Gugma

Sa Tinipong Bansa, kapin sa usa ka bilyong dolyar ang mahalin matag tuig sa pagbaligyag mga nobela sa gugma. Halos katunga sa tanang nobela nga gibaligya nianang nasora maoy bahin sa mga estorya sa gugma. Sumala sa estadistika nga gipatik sa Romance Writers of America, ang tulo ka pangunang mga hiyas sa mga bidang lalaki nga gusto kaayo sa mga magbabasa, nga halos 90 porsiyento kanila mga babaye, mao ang pagkalig-on, pagkaambongan, ug pagkaintelihente. Ang tulo ka hiyas nga gusto kaayong makita sa mga magbabasa diha sa mga bidang babaye mao ang pagkaintelihente, determinasyon, ug pagkaanyag.

[Mga hulagway sa panid 6, 7]

Ang media panagsa lang mohatag ug tukma nga paghulagway sa gugma