Mga Batan-on Nangutana . . .

Panaghigalaay sa Eskuylahan—Diin Kutob ang Akong Pagpakigsuod?

“Ang akong mga eskolmet nag-estorya nga alegre kaayo sila niadtong miaging semana. Naguol ko kay dili ako apil sa ilang grupo.”—Michelle. a

“Usahay makakita ko ug grupo sa mga batan-on ug makaingon, ‘Nindota nila oy, suod kaayo sila. Maayo unta kon apilon sab ko nila sa ilang grupo.’”—Joe.

“Dili ko maglisod sa pagpangitag higala diha sa eskuylahan. Sayon ra kaayo kini. Tungod niini ako nakaagom ug mga problema.”—Maria.

ANG imong mga eskolmet maoy imong kauban kanunay halos tibuok adlaw. Parehas ang kadaghanan sa inyong mga problema, kahigawad, ug mga kalamposan. Sa pipila ka paagi, tingali imong bation nga mas magkasinabot kamo sa imong mga eskolmet kay sa imong mga ginikanan, mga igsoon, o mga isigka-Kristohanon. Busa masabtan kon nganong gusto ka tingaling makighigala kanila. Daotan ba kana? Aduna bay mga kapeligrohan? Diin kutob ang imong pagpakigsuod sa imong mga higala sa eskuylahan? Aduna ka bay gihimong mga limitasyon kon diin kutob ang imong pagpakighigala kanila?

Ikaw Nagkinahanglan ug mga Higala

Ang tanan nagkinahanglan ug mga higala—mga tawo nga ilang makauban sa paghugoyhugoy sa maayong mga panahon ug mga tawong kasandigan sa malisod nga mga panahon. Si Jesus dunay mga higala, ug siya nalipay sa pagpakig-uban kanila. (Juan 15:15) Dayon, sa dihang siya himalatyon na diha sa estaka sa pagsakit, si Jesus wala biyai sa iyang suod nga higalang si Juan, ang “tinun-an nga iyang gihigugma [pag-ayo].” (Juan 19:25-27; 21:20) Ikaw nagkinahanglan ug mga higala nga sama niana—mga tawo nga mounong kanimo sa bisan unsang kalisdanan. Usa ka panultihon sa Bibliya nagkanayon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.”—Proverbio 17:17.

Tingali sa imong hunahuna ikaw nakakaplag na ug sama niana nga higala sa eskuylahan, usa sa imong mga klasmet nga dali ra nimong nakasinabot. Kamo samag mga hilig ug malingaw nga mag-estoryahanay. Tinuod, siya dili tingali isigkamagtutuo; apan, sa imong tan-aw, siya morag dili usab maisip nga ‘daotang kauban.’ (1 Corinto 15:33)  Tinuod, ang pipila ka mga batan-on nga dili sama nimog pagtuo sa Bibliya nagsubay ug matarong nga mga prinsipyo. (Roma 2:14, 15) Apan kana ba nagpasabot nga ikaw angayng makigsuod kanila?

Ang mga Kristohanon Mahigalaon

Kini wala magpasabot nga likayan sa tinuod nga mga Kristohanon ang mga dili-magtutuo. Gani, aron matuman ang sugo kanila sa “paghimog mga tinun-an sa katawhan sa tanang kanasoran,” ang mga Kristohanon makigsulti sa mga lalaki ug babaye sa tanang rasa, relihiyon, ug kultura. (Mateo 28:19) Sila matinagdanon sa ilang mga silingan, kauban sa trabaho, o mga eskolmet, ug sila mahigalaon. Ang mga Kristohanon interesado gayod sa uban.

Si apostol Pablo nagpasundayag ug maayo kaayong panig-ingnan maylabot niini. Siya mahibalong makig-estorya sa “tanang matang sa katawhan,” bisan tuod lahi ang ilang tinuohan. Siyempre, si Pablo dili buot nga makighugoyhugoy kanila. Hinunoa, siya miingon: “Gihimo ko ang tanang butang tungod sa maayong balita, aron ako mahimong mag-aambit niini sa uban.”—1 Corinto 9:22, 23.

Imong masundog ang panig-ingnan ni Pablo. Magmahigalaon sa imong mga isigkabatan-on. Pagkat-on sa pagpakigkomunikar ug maayo kanila. Ang pipila sa imong mga eskolmet nangita tingali sa binase-sa-Bibliya nga paglaom nga imo nang nabatonan. Tagda ang kahimtang sa usa ka Kristohanon nga batan-ong babaye nga ginganlag Janet. Siya ug ang iyang mga klasmet giasaynan sa pagsulat ug mubo nga komento bahin sa ilang tagsa ka klasmet, ug dayon basahon sa matag usa sa mga estudyante ang mga komento sa ilang mga klasmet bahin kanila. Usa sa mga komento nga nadawat ni Janet nagkanayon: “Ikaw kanunayng malipayon kaayo. Palihog sultihi kami kon ngano!”

Sama sa gipakita niini nga kasinatian, ang uban nimong mga klasmet basin gustong maminaw bahin sa imong tinuohan. Seguradong makatabang ang imong pagkamahigalaon kanila. Tino nga mohatag kini kanimo ug kahigayonan sa pagpatin-aw sa imong tinuohan. Tugoti usab ang imong mga klasmet sa pagpahayag sa ilang mga panglantaw, ug paminawg  maayo sa ilang isulti. Ang imong eksperyensiya sa pagpakigkomunikar sa imong isigkabatan-on mapuslanon gayod kon ikaw manarbaho na sa ulahi ug makaatubang ug susamang mga kahimtang. Diha sa eskuylahan ug sa trabahoan, ang imong pagkamahigalaon makatabang kanimo sa ‘pagdayandayan sa pagtulon-an sa atong Manluluwas, ang Diyos, sa tanang butang.’—Tito 2:10.

Panaghigalaay Uban sa mga Tawong Dili Samag Pagtuo

Siyempre, ang pagkamahigalaon ngadto sa usa ka klasmet lahi kay sa pagpakigsuod kaniya. Si Pablo misulat: “Ayaw pagpayugo nga dili timbang sa mga dili-magtutuo.” (2 Corinto 6:14) Aron ikaw mahimong suod nga higala sa usa ka tawo, kamo kinahanglang parehas ug mga prinsipyo ug tumong. Busa dili nimo mahimong suod nga higala ang usa ka tawo nga wala magsubay sa imong Kasulatanhong mga tinuohan ug sukdanan. Ang pagpakigsuod sa usa ka klasmet nga dili-magtutuo lagmit makaimpluwensiya kanimo sa paghimog daotan o makadaot sa imong maayong pamatasan.

Si Maria nakakat-on niini sa masakit nga paagi. Tungod sa iyang bibo nga kinaiya, siya daling makakaplag ug mga higala apan maglisod sa pagtakda ug limitasyon sa pagpakighigala. “Malipay ko nga daghan ang ganahan nako, babaye man o lalaki,” siya miadmitir. “Tungod niini, ako anam-anam nga naunlod sa huyonghuyong niini nga kalibotan.”

Sama ni Maria, tingali malisdan ka sa pag-ila nga ikaw suod na kaayo sa usa nga dili nimo samag tinuohan. Bisan pa niana, ikaw makalikay nga masakitan pinaagi sa pagtakda ug klarong mga limitasyon kon kinsay imong himoong suod nga higala ug kon kinsay dili. Sa unsang paagi?

Kon Unsaon Pagpili ug Maayong mga Higala

Sama sa gihisgotan ganiha, si Jesus dunay suod nga mga higala sa dinhi pa siya sa yuta. Si Jesus nagbaton ug suod nga mga higala pinaagi sa pagkinabuhi nga matarong ug pagpakighisgot bahin sa espirituwal nga mga butang. Kon ang mga tawo modawat sa iyang mga pagtulon-an ug sa iyang paagi sa pagkinabuhi, sila makigsuod kaniya. (Juan 15:14) Pananglitan, human makadungog sa gisulti ni Jesus, upat ka lalaki ang natandog pag-ayo mao nga ilang “gibiyaan ang tanan ug misunod kaniya.” Kini nga mga lalaki—si Pedro, Andres, Santiago, ug Juan—nahimong suod nga mga higala ni Jesus.—Lucas 5:1-11; Mateo 4:18-22.

Ang sinultihan ug binuhatan ni Jesus klarong nagpakita nga importante kaniya ang iyang tinuohan ug nga lig-on ang iyang baroganan. Kadtong dili modawat kaniya ug sa iyang mga pagtulon-an mitalikod kaniya, ug sila wala pugngi ni Jesus.—Juan 6:60-66.

Pananglitan, natandog kaayo si Jesus sa pagkasinsero sa usa ka batan-ong lalaki. Ang Bibliya nag-ingon: “Si Jesus mitan-aw kaniya ug mibatig gugma alang kaniya.” Apan sa dihang nahibaloan sa maong lalaki kon unsay gidahom ni Jesus sa iyang mga higala, siya “milakaw.” Siya daw maayohon nga tawo—gani, si Jesus “mibatig gugma alang kaniya.” Apan, labaw pa ang gikinahanglan ni Jesus sa iyang mga higala. (Marcos 10:17-22; Mateo 19:16-22) Komosta sa imong bahin?

Tingali magkasinabot gayod kamo sa usa nimo ka eskolmet. Apan, pangutan-a ang imong kaugalingon: ‘Siya ba andam mobuhat sa gisugo ni Jesus? Siya ba gustong mokat-on bahin ni Jehova, ang usa nga gitudlo ni Jesus kanato nga simbahon?’ (Mateo 4:10) Pinaagi sa imong pagpakig-estorya sa imong mga klasmet ug sa imong pagkinabuhi subay sa mga sukdanan sa Bibliya, imo ra unyang masayran ang tubag niining mga pangutanaha.

Angayan lang nga magmahigalaon ka sa imong mga klasmet, maingon nga si Jesus usab mahigalaon sa tanang matang sa tawo. Apan giseguro ni Jesus nga ang iyang suod nga mga higala nahigugma sa iyang langitnong Amahan, si Jehova. Mahimo usab nimo kini. ‘Hupti ang maayong panggawi’ diha sa eskuylahan, ug pakigsulti nga mataktikanhon ngadto sa uban bahin sa imong tinuohan. Labaw sa tanan, paneguroa nga ang imong pilion mao ang labing maayong matang sa mga higala.—1 Pedro 2:12.

[Footnote]

ANGAYNG HINUKTOKAN

◼ Unsay mga kapeligrohan sa paglingaw-lingaw human sa klase uban sa dili-magtutuo nga klasmet? Kini ba maalamon?

◼ Human mabasa kini nga artikulo, imo bang naamgohan nga ikaw suod ra kaayo sa usa nimo ka klasmet? Kon mao, unsay imong buhaton?

[Kahon/Mga hulagway sa panid 18]

HOW CAN I MAKE REAL FRIENDS?

Kini nga video, nga gihimo sa mga Saksi ni Jehova, nagpasundayag ug prangkang mga interbiyo sa mga batan-on gikan sa Tinipong Bansa, Italya, Pransiya, ug Espanya. Kini mabatonan diha sa 36 ka pinulongan.

[Hulagway sa panid 18]

Ang imong ubang mga klasmet basin interesadong mahibalo bahin sa imong mga tinuohan