Usa ka Tabang sa Pagpanalipod sa Atong mga Anak

Sa miaging tuig, usa ka babaye sa Virginia, U.S.A., misulat aron sa pagpasalamat alang sa librong Pagkat-on Gikan sa Dakong Magtutudlo, nga miingon: “Sa dili pa matulog ang akong mga apo nga lalaki, sila moingon: ‘Lola, basahi mig estorya sa libro ni Jesus.’ Ang ilang pangedaron maoy 4, 6, ug 7, ug sila ganahan kaayo sa mga estorya.”

Ang apohang babaye misaysay: “Akong gibasa ang kapitulo 32 nga nag-ulohang ‘Kon sa Unsang Paagi Gipanalipdan si Jesus.’ Ako nakadayeg gayod tungod kay human hisgoti sa leksiyon kon sa unsang paagi gipanalipdan ni Jehova si Jesus, kini nagtabang sa mga batan-on sa pagpanalipod sa ilang kaugalingon pinaagi sa paghatag kanila ug praktikal nga tambag. Kini nag-ingon: ‘Kon may mosulay sa paghimo niini, sulti sa kusog nga tingog: “Ihunong kana! Isumbong tika!”’”

Sa Mexico, ang inahan sa singko-anyos nga batang babaye nga si Betsaida nag-ingon nga ikaduhang pagbasa na niya karon sa librong Magtutudlo ngadto sa iyang anak. Ang inahan nag-ingon: “Ang kalibotan nag-anam ka daotan, ug nagkadaghan ang pagpit-os nga giatubang sa atong mga anak. Ang akong anak nag-ingon nga siya nakaapresyar sa instruksiyon bahin sa kon unsaon niya pagpanalipod sa iyang kaugalingon gikan sa dili-maayong mga impluwensiya, sama niadtong gihisgotan sa kapitulo 32.”

Kining nindot ug mga hulagway nga 256-panid nga libro, nga samag gidak-on niini nga magasin, nakatabang gayod sa mga ginikanan sa pagtuman sa sugo sa Bibliya sa pagbansay sa ilang mga anak. (Proverbio 22:6) Ang mga leksiyon, nga gipasukad diha sa mga pagtulon-an ni Jesu-Kristo, giasoy sa yanong pinulongan; apan, ang ulohan sa materyal maoy alang sa tanang pangedaron. Makahangyo kag kopya pinaagi sa pagpil-ap sa nagauban nga kupon ug sa pagpadala niana ngadto sa adres nga gipakita diha sa kupon o sa nahiangay nga adres nga nalista sa panid 5 niini nga magasin.

□ Interesado akong makadawat ug kopya sa librong Pagkat-on Gikan sa Dakong Magtutudlo.

□ Palihog kontaka ako bahin sa usa ka libreng pagtuon sa Bibliya sa balay.