Gikan sa Among mga Magbabasa

Kon Unsaon Pagkaplag ug Trabaho ug Paghupot Niana (Hulyo 8, 2005) Nalipay ako sa inyong sugyot sa pagsusi sa matag tanyag sa trabaho, bisan pag kini daw ubos nga trabaho. Di pa dugay, nangita akog dili-bug-os-panahon nga trabaho aron mas daghang panahon ang akong magugol sa Kristohanong ministeryo. Apan pilian kaayo ako sa matang sa trabaho nga akong dawaton. Dayon gitanyagan akog laing trabaho, nga akong gidawat. Kini ubos nga trabaho, apan naningkamot ako nga magmatagbawon ra niini. Maayo kini kay dili maluya ang akong hunahuna inigpauli nako sa amoa, ug akong masentro ang akong hunahuna sa akong personal nga pagtuon sa Bibliya.

M. I., Japan

May Day—Unsay Kahulogan Niini Alang Kanimo? (Abril 22, 2005) Ako hapit nang mograduwar sa hayskul, ug ang selebrasyon sa May Day ginasaulog sa among eskuylahan kada tuig. Adunay ensayo nga ginahimo nga magsul-ob ug mga kostiyum, ug ang tanang estudyante sa hayskul ug elementarya patan-awon niana. Nakatambong ako niini kaniadto, apan nahasol ang konsensiya sa akong magulang nga babaye. Kining artikuloha nakatabang kanako sa pagkaamgo nga husto siya! Daghan kaayong salamat. Kining artikuloha miabot gayod sa hustong panahon!

C. C., Tinipong Bansa

Pagsagubang sa Sakit Uban sa Katakos nga Mangomedya (Abril 22, 2005) Ako nakigbisog sa kanser sa obaryo sulod sa unom na ka tuig, ug kadaghan na akong naoperahan ug na-chemotherapy. Sama kang Conchi, naningkamot ako sa pagsuportar sa among kongregasyon ug pagtambong sa tanang tigom ug mga kombensiyon kutob sa akong maarangan. Lisod sagubangon ang kanser, busa ako mapasalamaton sa giingon ni Conchi kon unsaon pagsagubang ang makapaguol nga balita nga subsob madawat namong may kanser gikan sa among mga doktor. Ang kasinatian ni Conchi nakapadasig gayod kanako!

B. F., Tinipong Bansa

Ako nag-antos sa lupus, ug usa ka higayon niana ako naamnesya sulod sa usa ka panahon. Samtang nagpaayo, akong gipaningkamotan nga kanunayng mangomedya. Di pa dugay, sa dihang naospital ako tungod sa paghubag sa akong tungol, gipaningkamotan nako nga kanunayng mangomedya. Mouyon ako sa giingon ni Conchi, “Dili komedya ang pagkadunay sakit, apan kinahanglang maningkamot ka nga kanunayng mangomedya.”

M. A., Venezuela

Pagpaniid sa Kalibotan (Hulyo 8, 2005) Mahitungod sa artikulo nga nag-ulohang “Tabletas nga mga Bitamina ug Kanser,” buot lang nakong isulti nga ang mga panghunahuna ni Dr. Sullivan nga inyong gikutlo wala uyoni sa daghang nutrisyonista. Gipakita sa mga taho diha sa daghang siyentipikanhong mga publikasyon ug sa daghang pagtuon nga ang mga substansiya nga inyong gilista mapuslanon sa pagsanta—ug pagtambal—sa pipila ka matang sa kanser. Sa akong pagtuo, ang pagpatik ug mapihigong impormasyon niining bahina magpameligro sa neyutral nga baroganan sa Pagmata!

A. B., Netherlands

Ang “Pagmata!” nagtubag: Sumala sa gihisgotan niini nga magbabasa, dayag nga gipakita sa mga pagtuon nga ang mga substansiya nga gihisgotan sa among artikulo sa pipila ka kahimtang adunay mapuslanong epekto sa mga pasyenteng may kanser. Gikasubo namo ang bisan unsang sayop nga pagsabot tungod sa pagpatik niining artikuloha. Ang “Pagmata!” adunay neyutral nga baroganan kon bahin sa pagpanambal. Kon kami adunay ipresentar nga impormasyon bahin sa panglawas ngadto sa among mga magbabasa, wala kana magpasabot nga among girekomendar kana. Lain pa, kon among kutloon ang usa ka publikasyon o usa ka eksperto sa usa ka natad sa pagtuon, kami nakasabot nga—sama sa kasagarang mahitabo—ang ubang mga publikasyon ug ubang mga eksperto mahimong lahi ug panglantaw. Ang among mga magbabasa mao na lay mag-igo sa paghimog mga desisyon pinasukad sa ilang nahibaloan kon bahin sa ilang panglawas.