Unsa Katas-a nga Ikaw Mahimong Mabuhi?

“Mabag-o ang iyang unod labi pa kay sa pagkabatan-on; mahibalik siya sa mga adlaw sa kabaskog sa iyang pagkabatan-on.”—JOB 33:25.

SA DIHANG ang usa ka iro mamatay human mabuhi sa 10 o 20 ka tuig, lagmit nahimo na niini ang kadaghanang butang nga kasagarang himoon sa mga iro. Tingali nakasanay na kini, nakagukod ug mga iring, nakatangag ug mga bukog, ug nakapanalipod sa amo niini. Apan kon ang usa ka tawo mamatay sa edad nga 70 o 80, ang nahimo niya gamayng bahin lang sa iyang bug-os nga kapasidad. Kon siya ganahan ug esports, tingali hawod kaayo siya sa usa o duha lang ka dula. Kon siya mahiligon ug musika, tingali batid kaayo siyang motugtog ug usa o duha lang ka instrumento. Kon siya hilig nga makig-estorya sa mga tawo sa ilang lumad nga pinulongan, tingali larino kaayo siyang mosulti ug duha o tulo lang ka pinulongan. Mas daghan pa unta ang iyang mahimo—makighimamat ug mga tawo, magkat-on ug bag-ong mga butang, ug makigsuod pag dugang sa Diyos—kon taas-taas ang iyang kinabuhi.

Tingali mangutana ka, ‘Nganong gilalang sa Diyos ang tawo nga may kapasidad sa pagkalipay sa daghan kaayong butang ug unya mahigawad ra diay kay diyutay lang ang iyang mapahimuslan tungod sa kamubo sa kinabuhi?’ Ang mubo nga kinabuhi sa tawo daw dili mohaom sa kalalangan nga klarong gidisenyo nga may katuyoan. Tingali mangutana ka usab, ‘Nganong gidisenyo man sa Diyos ang tawo nga may talagsaong mga hiyas sama sa hustisya ug pagkamabination ug sa samang higayon gilalang siya nga may hilig sa paghimog daotan?’

Kon ikaw makakita ug nindot nga kotse nga dunay dakong lumping, moingon ka ba nga disenyo kini sa kotse? Siyempre dili! Seguradong moingon ka, ‘Dili kana ang orihinal nga disenyo sa kotse. Seguradong maayo ang pagkagama niana, apan sa ulahi dunay midaot niana.’ Sa samang paagi, kon atong palandongon ang atong talagsaong panulondon, nga mao ang atong kinabuhi, kita makaingon gayod nga ang kinabuhi karon dili maoy orihinal nga pagkadisenyo niini. Ang atong mubong kinabuhi ug hilig sa pagbuhat ug daotan nahisamag dagkong mga lumping. Klaro nga dunay usa nga naghimog dakong kadaot sa panulondon sa tawo. Kinsa siya? Ang Bibliya naghatag ug lig-ong ebidensiya kon kinsa ang sad-an.

Kon ang tawo gihatagan sa sinugdanan ug kapasidad nga mabuhi sa walay kataposan, kinsa ang nagdaot sa panulondon sa tanang tawo? Walay lain kondili ang orihinal nga kagikan sa tanang tawo, ang usa nga gigikanan natong tanan. Kay kon lain nga tawo, dili niya maapektohan ang tanan kondili ang iyaha lang nga kaliwat. Nahiuyon kini sa gisulti sa Pulong sa Diyos, ang Bibliya, sa dihang kini miingon: “Ang sala misulod sa kalibotan pinaagi sa usa ka tawo [si Adan, ang unang tawo] ug ang kamatayon pinaagi sa sala, ug sa ingon ang kamatayon mikaylap sa tanang tawo.” (Roma 5:12) Busa gihukman sa Kasulatan si Adan nga sad-an sa pagdaot sa atong panulondon. Unsa ang orihinal nga pagkadisenyo sa tawhanong kinabuhi?

 Pagsabot sa Orihinal nga Disenyo

Sa pag-ingon nga ang kamatayon “misulod sa kalibotan,” gipakita sa Bibliya nga ang tawo wala gidisenyo nga mamatay. Ang pagkatigulang ug kamatayon maoy resulta sa pagrebelde sa unang tawo batok sa Diyos. Sa laing bahin, ang mga mananap wala gidisenyo nga mabuhi sa walay kataposan.—Genesis 3:21; 4:4; 9:3, 4.

Ang mga tawo gidisenyo nga lahi sa mga mananap. Kita mas taas nga matang sa kinabuhi kay sa mga mananap, maingon nga ang mga manulonda mas taas nga matang sa kinabuhi kay sa mga tawo. (Hebreohanon 2:7) Dili sama sa mga mananap, ang tawo gilalang sumala “sa larawan sa Diyos.” (Genesis 1:27) Dugang pa, sukwahi sa mga mananap, si Adan gitawag ug “anak sa Diyos” diha sa Bibliya. (Lucas 3:38) Busa kita dunay lig-ong katarongan sa pagtuo nga ang tawo wala gidisenyo nga matigulang ug mamatay. Ang Diyos dili mamatay, ug wala usab niya lalanga ang iyang mga anak aron mamatay.—Habacuc 1:12; Roma 8:20, 21.

Ang rekord sa kasaysayan sa unang mga kaliwatan sa tawo naghatag ug dugang katin-awan bahin sa pagkadisenyo sa Diyos sa kinabuhi sa tawo. Ang mga tawo kaniadto nabuhi ug gatosan ka tuig una pa natigulang. Si Adan nabuhi ug 930 ka tuig. Human sa pipila ka kaliwatan, ang anak ni Noe nga si Sem nabuhi lang ug 600 ka tuig, ug ang apo nga lalaki ni Noe nga si Arpaksad nabuhi ug 438 ka tuig. a (Genesis 5:5; 11:10-13) Sa ulahi, si Abraham nabuhi ug 175 ka tuig. (Genesis 25:7) Mopatim-aw nga misamot ang epekto sa sala diha sa gitas-on sa kinabuhi, kay samtang nagkalayo ang tawo sa hingpit nga orihinal nga disenyo niini, ang gitas-on sa kinabuhi nagkamubo. Apan sa sinugdanan ang tawo gilalang aron mabuhi sa walay kataposan. Busa natural lang nga mangutana, ‘Buot ba gihapon sa Diyos nga matagamtam sa mga tawo ang kinabuhing walay kataposan sa yuta?’

Kagawasan Gikan sa Pagkatigulang

Sanglit si Jehova nga Diyos miingon nga si bisan kinsa nga mosupak kaniya mobayad sa iyang sala pinaagig kamatayon, ang kahimtang sa mga kaliwat ni Adan daw wala nay paglaom. (Genesis 2:17) Bisan pa niana, ang inspirado nga Kasulatan naghatag ug paglaom nga aduna unyay mobayad ug lukat aron mabatonan ang kagawasan gikan sa pagkatigulang. Atong mabasa: “Luwasa siya gikan sa pagkahulog sa gahong! Ako nakakaplag ug usa ka lukat! Mabag-o ang iyang unod labi pa kay sa pagkabatan-on; mahibalik siya sa mga adlaw sa kabaskog sa iyang pagkabatan-on.” (Job 33:24, 25; Isaias 53:4, 12) Ang Bibliya nagtanyag dinhi ug usa ka nindot nga palaaboton—nga dunay usa nga mobayad ug lukat aron kita makabaton ug kagawasan gikan sa pagkatigulang!

Kinsay makabayad niini nga lukat? Ang bili sa lukat dili matumbasan ug salapi. Naghisgot bahin sa dili-hingpit nga mga tawo, ang Bibliya nag-ingon: “Walay usa kanila sa bisan unsang paagi ang makatubos bisan sa usa ka igsoon, ni makahatag sa Diyos ug usa ka lukat alang kaniya . . . aron mabuhi pa siya gihapon hangtod sa kahangtoran.” (Salmo 49:7-9) Hinunoa, si Jesu-Kristo nagbaton ug usa ka butang nga labaw pag bili kay sa salapi. Sa dinhi pa sa yuta, siya hingpit ug kinabuhi tungod kay ingong Anak sa Diyos, siya gipanalipdan aron dili makapanunod sa sala ni Adan. Si Jesus miingon nga siya mianhi “sa paghatag sa iyang kalag nga usa ka lukat baylo sa daghan.” Sa laing higayon siya miingon: “Ako mianhi aron sila makabaton ug kinabuhi ug makabaton niini nga dagaya.”—Mateo 20:28; Juan 10:10.

Ang paglaom nga kinabuhing dayon maoy usa ka hinungdanong tema sa pagsangyaw ni Jesus. Ang iyang matinumanong sumusunod nga si Pedro miingon kaniya kaniadto: “Ikaw mao ang may mga pulong mahitungod sa kinabuhing walay kataposan.” (Juan 6:68) Unsay ipasabot sa Bibliya sa dihang kini maghisgot ug kinabuhing walay kataposan?

Kinabuhing Walay Kataposan

Ang mga apostoles ni Jesus naglaom nga makatagamtam ug kinabuhing walay kataposan sa langit ingong bahin sa Ginghariang gobyerno ni Jesus. (Lucas 22:29; Juan 14:3) Bisan pa niana, si Jesus kanunayng naghisgot bahin sa katuyoan sa Diyos alang sa yuta. (Mateo 5:5; 6:10; Lucas 23:43)  Busa, ang mga milagro ni Jesus ug ang iyang mga pagtulon-an bahin sa kinabuhing walay kataposan nagpalig-on sa mga saad sa Diyos nga dugay na kaayo niyang gisaad pinaagi kang manalagnang Isaias, kinsa misulat: “Iyang lamyon gayod ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.” (Isaias 25:8) Ang tawo dili na unya magkinabuhi sa pipila lang ka mga tuig ingong batan-on ug dayon anam-anam nga matigulang ug maluya.

Sa bag-ong kalibotan sa Diyos, sa dihang makab-ot na sa matinumanong mga tawo ang kahingpitan, sila mahigawas na unya gikan sa pagkatigulang. Ang Bibliya nag-ingon: “Ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:21) Handurawa! Ang mga tawo magapadayon unya sa pagbaton ug kaalam ug kasinatian. Apan ang ilang kalagsik sa pagkabatan-on dili mahanaw sa paglabay sa daghang siglo. Buot mo bang mabuhi aron makita kanang panahona?

Unsa Katas-a nga Ikaw Mabuhi?

Sumala kang Jesus, kalit unya nga mogamay ang populasyon sa yuta ingong resulta sa adlaw sa paghukom sa Diyos. (Mateo 24:21, 22) Si Jesus miingon: “Halapad ug haluag ang dalan padulong sa kalaglagan, ug daghan ang mga nagasulod agi niini; samtang sigpit ang ganghaan ug hagip-ot ang dalan padulong sa kinabuhi, ug diyutay ra ang mga nakakaplag niini.”—Mateo 7:13, 14.

Aron maapil niadtong makatagamtam ug kinabuhing dayon, ikaw kinahanglang maningkamot nga makabaton sa pag-uyon sa Diyos. Ang unang lakang mao ang pagpaningkamot nga mailhan ang Diyos. Si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos.” (Juan 17:3) Tinuod, nagkinahanglan ug paningkamot aron mailhan pag-ayo ang Diyos; apan, ang maong paningkamot mapuslanon gayod. Sa susamang paagi, gikinahanglan ang pagpaningkamot aron mokita ug salapi nga ikapalit ug pagkaon sa matag adlaw. Nagtandi sa kahibalo bahin sa Diyos ngadto sa pagkaon, si Jesus miawhag: “Hagoi ninyo, dili ang pagkaon nga mahanaw, kondili ang pagkaon nga magpabilin alang sa kinabuhing walay kataposan.” (Juan 6:27) Dili ba mapuslanon gayod ang bisan unsang paningkamot nga imong himoon aron mabatonan ang kinabuhing walay kataposan?—Mateo 16:26.

Si Jesus miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Busa kon unsa katas-a ikaw mabuhi, kini magdepende kon sa unsang paagi ikaw mosanong sa gugma sa Diyos.

[Footnote]

[Blurb sa panid 7]

Human sa 80 ka tuig nga pagkinabuhi, ang nahimo sa tawo gamayng bahin lang sa iyang bug-os nga kapasidad

[Blurb sa panid 8]

Kita gidisenyo nga mas taas nga matang sa kinabuhi kay sa mga mananap

[Hulagway sa panid 7]

Kini ba nga kotse gidisenyo nga dunay lumping?

[Hulagway sa panid 8, 9]

Ang Pulong sa Diyos nag-ingon nga ang mga tawo mahibalik ‘sa mga adlaw sa kabaskog sa ilang pagkabatan-on’