Ang Hunahuna sa Bibliya

Unsa ang Orihinal nga Sala?

ANG tubag niining pangutanaha hinungdanon kanato. Ngano? Tungod kay ang pagsupak ni Adan ug Eva sa Diyos nakaapektar sa tanang tawo hangtod karon. Ang Bibliya nag-ingon: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Apan nganong makaguol man ang resulta sa yanong pagkuha ug pagkaon sa bunga sa usa ka kahoy?

Sa dihang gilalang sa Diyos si Adan ug Eva, iyang gipahiluna sila sa usa ka matahom nga tanaman nga puno sa mga utanon ug mga kahoyng mamunga. Usa ka kahoy lang ang gidili—ang “kahoy sa kahibalo sa maayo ug sa daotan.” Sanglit may kagawasan sa pagpili, si Adan ug Eva makapili kon sila motuman ba sa Diyos o mosupak kaniya. Apan, si Adan gipasidan-an nga “sa adlaw nga mokaon ka gikan [sa kahoy sa kahibalo] mamatay ka gayod.”—Genesis 1:29; 2:17.

Makataronganong Pagdili

Kining pagdili sa usa ka butang dili malisod; si Adan ug Eva makakaon gikan sa tanang ubang mga kahoy sa tanaman. (Genesis 2:16) Dugang pa, ang pagdili wala magpasabot nga dunay sayop nga mga kiling ang magtiayon, ug wala usab mawala ang ilang dignidad tungod niini. Kon ang gidili sa Diyos ngil-ad nga mga butang sama sa pagpakigsekso sa mananap o pagpatay, makaingon gayod ang uban nga ang hingpit nga mga tawo dunay daotang mga kiling nga angayng santaon. Apan ang pagkaon maoy normal ug husto nga buhat.

Ang gidili ba nga bunga nagsimbolo sa seksuwal nga relasyon, sama sa gituohan sa uban? Kini nga panglantaw walay basehanan sa Kasulatan. Una sa tanan, sa dihang gidili kini sa Diyos, si Adan nag-inusara ug dayag nga walay kauban sa taas-taas nga panahon. (Genesis 2:23) Ikaduha, gisultihan sa Diyos si Adan ug Eva nga “magmabungahon ug magdaghan kamo ug pun-a ang yuta.” (Genesis 1:28) Siyempre, sila dili niya sugoon sa paglapas sa iyang balaod ug dayon silotan silag kamatayon tungod sa ilang paglapas niini! (1 Juan 4:8) Ikatulo, si Eva ang unang mikaon sa bunga ug iyang gihatagan si Adan sa ulahi. (Genesis 3:6) Busa, klaro nga ang bunga wala magsimbolo ug seksuwal nga relasyon.

Misulay sa Pagbaton ug Moral nga Independensiya

Ang kahoy sa kahibalo maoy literal nga kahoy. Apan, kini naghawas sa katungod sa Diyos ingong Magmamando nga maoy maghukom kon unsay maayo ug daotan alang sa iyang linalang nga tawo. Busa, ang pagkaon ug bunga niini nga kahoy dili lamang pagpangawat—pagkuha sa butang nga gipanag-iya sa Diyos—kondili mapangahasong pagsulay sa pagbaton ug moral nga independensiya, o pagkinaugalingon. Matikdi nga human mamakak kang Eva nga kon siya ug ang iyang bana mokaon sa bunga sila ‘dili gayod  mamatay,’ si Satanas miingon: “Kay nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.”—Genesis 3:4, 5.

Apan, sa dihang sila mikaon sa bunga, si Adan ug Eva wala makabaton ug diyosnong kalamdagan sa kon unsay maayo ug daotan. Gani, si Eva miingon sa Diyos: “Ang halas—kini naglimbong kanako.” (Genesis 3:13) Bisan pa niana, siya nahibalo sa sugo sa Diyos, kay gisulti pa gani niya kini ngadto sa halas, ang tigpamaba ni Satanas. (Pinadayag 12:9) Busa, ang iyang gihimo maoy tinuyo nga pagsupak. (Genesis 3:1-3) Apan, si Adan wala malimbongi. (1 Timoteo 2:14) Imbes maunongong motuman sa iyang Maglalalang, siya namati sa iyang asawa ug misundog sa iyang pagkinaugalingon.—Genesis 3:6, 17.

Pinaagi sa pagdeklarar sa ilang independensiya, gidaot sa bug-os ni Adan ug Eva ang ilang relasyon kang Jehova ug gipahinabo ang dumalayong epekto sa sala diha sa ilang lawas, nga nadaot bisan ang ilang gene mismo. Tinuod, nabuhi sila ug gatosan ka tuig, apan sila nagsugod sa pagkamatay “sa adlaw” nga sila nakasala, samag sanga nga giputol gikan sa punoan. (Genesis 5:5) Dugang pa, sa unang higayon, sila nawad-ag kalinaw sa hunahuna. Sila mibati nga hubo ug mitago gikan sa Diyos. (Genesis 3:7, 8) Sila mibati usab ug pagkasad-an, kawalay-kasegurohan, ug kaulaw. Ang ilang galamhan gihasol tungod sa ilang sala, kay ang ilang tanlag nagtulisok kanila nga sila sad-an.

Agig pagtuman sa iyang gisulti ug sa pagtuboy sa iyang balaang mga sukdanan, makataronganong gisentensiyahan sa Diyos ug kamatayon si Adan ug Eva ug gipapahawa sila sa tanaman sa Eden. (Genesis 3:19, 23, 24) Busa, nawala ang Paraiso, kalipay, ug kinabuhing walay kataposan, ug kini gipulihan sa sala, pag-antos, ug kamatayon. Pagkamakapaguol nga kahimtang alang sa mga tawo! Apan, dihadiha human sentensiyahi ang magtiayon, ang Diyos nagsaad sa pagwagtang sa tanang kadaot nga gipahinabo sa ilang sala nga sa samang higayon dili ikompromiso ang iyang matarong nga mga sukdanan.

Katuyoan ni Jehova nga hatagag kagawasan ang mga anak ni Adan ug Eva gikan sa sala ug kamatayon. Kini iyang gihimo pinaagi kang Jesu-Kristo. (Genesis 3:15; Mateo 20:28; Galacia 3:16) Pinaagi kaniya, wagtangon sa Diyos ang sala ug ang tanang epekto niini ug himoon ang tibuok yuta nga usa ka paraiso, sama sa iyang katuyoan niini sa sinugdanan.—Lucas 23:43; Juan 3:16.

NAHIBULONG KA BA?

◼ Sa unsang paagi kita nahibalo nga ang gidili nga bunga wala magsimbolo ug seksuwal nga relasyon?—Genesis 1:28.

◼ Unsay gipasabot sa pagkaon sa gidili nga bunga?—Genesis 3:4, 5.

◼ Unsay gihimo sa Diyos aron wagtangon ang mga epekto sa sala?—Mateo 20:28.

[Blurb sa panid 29]

Ang gidili nga bunga wala magsimbolo ug seksuwal nga relasyon

[Hulagway sa panid 28, 29]

Si Eva gusto nga mahisama sa Diyos, nga magbuot alang sa iyang kaugalingon kon unsay maayo ug daotan