Gikan sa Among mga Magbabasa

Pagtinabangay—Mahinungdanon sa Kinabuhi (Septiyembre 8, 2005) Angkonon ko nga sa pagkakita nako sa hapin niining gulaa, wala ako mainteres sa ulohan. Apan akong gibasa ang tibuok serye, ug nagustohan nako kini! Samtang nagbasa, daghang higayon nga mihunong ako aron pasalamatan si Jehova tungod sa kahibulongang paagi sa iyang paglalang sa buhing mga linalang. Talagsaon kaayo ang paagi sa pagtinabangay sa mga mananap.

B. K., Tinipong Bansa

Mga Batan-on Nangutana . . . Sa Unsang Paagi Ako Makalikay sa Pagpakigsuod sa Kuwestiyonableng mga Tawo? (Agosto 22, 2005) Ako nakigsuod sa usa ka “kuwestiyonableng” tawo nga huyang ug pundasyon sa kamatuoran sa Bibliya. Ang impormasyon nakatabang kanako sa pagsabot nga peligroso ang pagpakigsuod sa tawong maluya sa espirituwal. Makapalipay ang pagkasayod nga si Jehova may pagtagad kanato. Salamat sa tukma-sa-panahong tabang.

A.B.K., Zambia

Kini nga artikulo nakatabang kanako sa pagkaamgo nga kinahanglang mangita akog laing mga kauban. Bisan tuod lisod kana, ang artikulo—nga kanunay nakong gidaladala—padayong nagpalig-on kanako. Salamat sa inyong tabang ug pagdasig kanamong mga batan-on.

L. R., Tinipong Bansa

Ang Hunahuna sa Bibliya—Angay Ka Bang Moampo Kang Birhen Maria? (Septiyembre 8, 2005) Ako nakadayeg sa mga Saksi ni Jehova tungod kay ang inyong panggawi dili salawayon ug ang inyong mga magasin nakahatag kanakog kaayohan. Apan, nganong nakaingon man mo nga kita dili angayng moampo kang Maria? Siyay mangaliya sa Amahan alang kanato aron kita makabaton ug kalinaw.

E. R., Espanya

Ang “Pagmata!” nagtubag: Sumala sa gipatin-aw sa artikulo, wala kitay mabasa sa Bibliya nga nagtugot kanato sa pag-ampo ngadto sa laing persona gawas sa Diyos. Sumala sa Katolikong pari ug magsusulat nga si Andrew Greeley, “ang simbolo ni Maria direktang naglangkit sa Kristiyanidad ngadto sa karaang mga relihiyon nga nagsimba ug inahang mga diyosa.” Busa, ang pagsimba kang Maria mas nalangkit sa paganismo kay sa Kristiyanidad. Tingali bag-ong ideya kini alang sa daghan namong magbabasa, ug among gidasig sila sa pagsusi sa Bibliya aron mahibaloan kon unsa gayoy ginatudlo niini. Daghang Saksi ni Jehova maoy mga Katoliko niadto, apan, sa pagtuon sa Pulong sa Diyos, ilang nakat-onan nga dili buot sa Diyos nga kita moampo pinaagi ni bisan kinsa gawas kang Jesu-Kristo, ang atong bugtong tigpataliwala. (Hebreohanon 7:25) Alang sa dugang impormasyon, tan-awa ang librong “Unsay Tinuod nga Gitudlo sa Bibliya?” a Ang kapitulo 15, nga nag-ulohang “Pagsimba nga Giuyonan sa Diyos,” naghisgot sa kahinungdanon sa pagpahiuyon sa atong mga tinuohan ngadto sa Balaang Kasulatan.

Pagsagubang sa Sakit Uban sa Katakos nga Mangomedya (Abril 22, 2005) Ang akong asawa namatay tungod sa sakit sa atay niadtong Disyembre 2002. Siya nag-antos sa mga walo ka bulan. Bisan pa niana, lunlon makapadasig nga mga butang ang iyang hisgotan ug moasoy siyag mga kasinatian nga makapakatawa kanamo. Hangtod sa iyang kamatayon, kanunay siyang malipayon. Human mabasa kini nga artikulo, nakasabot na ko. Sama namo, siya nagkinahanglan ug positibong tinamdan. Tingali nakatabang kadto kaniya nga moarang-arang ang iyang gibati, sa samang paagi nga nakatabang kini kang Conchi. Salamat sa pagtabang kanako nga masabtan kon nganong ingon niadto ang kinaiya sa akong asawa.

D. H., Tinipong Bansa

Gikan sa Among mga Magbabasa Kanunay akong naghinamhinam sa artikulo nga “Gikan sa Among mga Magbabasa.” Usahay basahon nako ang sulat sa uban ug makaingon nga ‘Ingon usab niana ang akong gibati!’ Dihay mga higayon usab nga makaingon ko sa akong kaugalingon, ‘Morag wala man ko makabasa niining puntoha sa artikulo!’ Dayon akong basahon pag-usab ang artikulo, ug subsob akong matandog ug madasig human kini mabasa.

M. T., Japan

[Footnote]