Kon Unsaon Pagtukod ug Usa ka Malipayong Kaminyoon

“Ang lalaki . . . kinahanglang moipon sa iyang asawa ug sila mahimong usa ka unod.”—GENESIS 2:24.

ANG atong Magbubuhat, si Jehova nga Diyos, nagmugna sa kaminyoon ingong permanenteng panaghiusa sa lalaki ug babaye. Ang Genesis 2:18, 22-24 nagkanayon: “Si Jehova nga Diyos miingon: ‘Dili maayo alang sa tawo nga magpadayon nga mag-inusara. Buhatan ko siyag katabang, ingon nga iyang katimbang.’ Ug gihimo ni Jehova nga Diyos nga usa ka babaye ang gusok nga iyang gikuha gikan sa lalaki ug gidala siya ngadto sa lalaki. Unya ang lalaki miingon: ‘Kini sa kataposan bukog sa akong mga bukog ug unod sa akong unod. Kini siya pagatawgon nga Babaye, tungod kay gikan sa lalaki kini siya gikuha.’ Mao  nga ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.”

Tinuod, ang pagtukod ug usa ka dumalayon ug malipayong kaminyoon dili sayon, apan kini posible. Daghang magtiayon ang malipayong nag-ubanay sulod sa 50, 60, o kapin pang katuigan. Giunsa nila paghimo kana? Sila determinadong naningkamot sa pagpatunhay sa ilang kaminyoon sa mapinadayonon ug dili-mahakogon nga paagi aron ‘mabatonan ang pag-uyon’ sa ilang kapikas. (1 Corinto 7:33, 34) Kana nagkinahanglag dakong paningkamot. Kon ikaw andam sa paggugol sa imong panahon ug kusog, ikaw usab makatukod ug usa ka malipayon ug malungtaron nga kaminyoon.

Sunda Pag-ayo ang mga Instruksiyon

Ang usa ka kasaligang kontratista dili gayod mangahas sa pagsugod ug tukod nga dili una susihon ang plano. Sa susama, kita dili molampos sa pagtukod ug usa ka malipayong kaminyoon kon dili una nato susihon pag-ayo ang mga instruksiyon sa Diyos bahin sa kaminyoon. Kini makaplagan diha sa mga panid sa Pulong sa Diyos. “Ang tibuok Kasulatan inspirado sa Diyos ug mapuslanon . . . sa pagpanul-id sa mga butang,” misulat si apostol Pablo.—2 Timoteo 3:16.

Ang mga bana ug asawa dakog makat-onan bahin sa kaminyoon pinaagi sa pagpamalandong sa pamaagi ni Jesus sa pagpakiglabot sa iyang mga tinun-an. Nganong makaingon kita niana? Sa Bibliya, ang relasyon ni Jesus ug niadtong magmando uban kaniya sa langit gipakasama nianang sa magtiayon. (2 Corinto 11:2) Si Jesus nagmaunongon kanunay sa iyang mga higala, bisan sa labing malisod nga mga panahon. ‘Iyang gihigugma sila hangtod sa kataposan.’ (Juan 13:1) Ingong mabinationg lider, kanunayng gitagad ni Jesus ang mga limitasyon ug kahuyangan sa iyang mga sumusunod. Siya wala gayod mangayo kanila ug labaw kay sa arang nilang mahimo o mahatag.—Juan 16:12.

Bisan pag siya gipakyas sa iyang labing suod nga mga higala, si Jesus malumo gihapon. Siya wala mangasaba kanila, kondili, uban sa diyosnong pagkamapainubsanon ug kalulot, siya naningkamot hinuon sa pagpasibo kanila. (Mateo 11:28-30; Marcos 14:34-38; Juan 13:5-17) Busa, kon imong susihon pag-ayo ang malumong pagtratar ni Jesus sa iyang mga sumusunod ug ang ilang pagpakitag gugma kaniya ingong balos, ikaw makakat-on ug mapuslanong mga leksiyon sa pagtukod ug usa ka malipayong kaminyoon.—1 Pedro 2:21.

Pagtukod Diha sa Usa ka Lig-ong Pundasyon

Dili kalikayan nga ang samag-bagyo nga mga pagsulay mohampak sa pundasyon sa imong kaminyoon. Kini magsulay sa pundasyon sa imong relasyon uban sa imong kapikas. Hinunoa, ang kinalig-onang pundasyon nga angayng tukoran ug usa ka malipayong kaminyoon mao ang pagkamaunongon nga gipasukad sa gugma. Gipasiugda ni Jesus ang kahinungdanon sa pagkamaunongon sa dihang siya miingon: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mateo 19:6) Ang ekspresyong ‘bisan kinsa’ naglakip sa bana ug sa iyang asawa, nga nanumpa nga magmaunongon sa usag usa.

Ang uban tingali naghunahuna nga lisod ang pagpabiling maunongon, nga kini nagkinahanglag dakong panahon, kahinguhaan, ug paningkamot. Karon, ang kaharuhay maoy kasagarang modaog imbes ang sakripisyo nga nalangkit sa pagkamaunongon ngadto sa laing tawo.

Unsay makapalig-on sa pagkamaunongon diha sa kaminyoon? Si apostol Pablo misulat: “Ang mga bana angay nga maghigugma  sa ilang mga asawa sama sa ilang kaugalingong mga lawas.” (Efeso 5:28, 29) Busa, sa usa ka bahin, ang ‘pagkanahiusa’ nagkahulogan nga ikaw angayng mahingawa sa kaayohan sa imong kapikas maingon nga ikaw nahingawa sa imong kaayohan. Kinahanglang usbon sa mga minyo ang ilang panghunahuna gikan sa “akoa” ngadto sa “atoa,” gikan sa “ako” ngadto sa “kita.”

Ang malamposong pagsagubang sa samag-bagyo nga mga suliran sa inyong kaminyoon maghimo kaninyong maalamon. Ang maong kaalam nga nabatonan moresulta ug kalipay. “Malipayon ang tawo nga nakakaplag ug kaalam,” nag-ingon ang Proverbio 3:13.

Gamita ang mga Materyales nga Dili Masunog

Aron ang usa ka balay modurar ug luwas nga puy-an, kini kinahanglang maayong pagkatukod. Busa, magmadeterminado sa pagtukod sa inyong kaminyoon uban ang tumong nga kini mahimong dumalayon. Gamita ang lig-ong mga materyales, kanang makasugakod sa samag-kalayo nga mga pagsulay sa inyong pagkamaunongon. Mahala gayod ang bililhong mga hiyas sama sa diyosnong kaalam, pagkamahinatagon, hait nga pagsabot, kahadlok sa Diyos, pagkamainiton, mahigugmaong pagpabili sa mga balaod sa Diyos, ug tinuod nga pagtuo.

Ang kalipay ug katagbawan diha sa kaminyoon wala maggikan sa materyal nga mga kabtangan o sekular nga kalamposan. Kini naggikan sa kasingkasing ug hunahuna, ug kining mga hiyasa mapalig-on pinaagi sa mga kamatuoran gikan sa Pulong sa Diyos. Ang tambag nga “Hinaot nga padayong magbantay ang matag usa kon sa unsang paagi siya nagatukod” mahimong mapadapat usab sa kaminyoon.—1 Corinto 3:10.

Kon Motungha ang mga Suliran

Aron ang usa ka tinukod modurar sa taas nga panahon, gikinahanglan ang maayong programa sa pagmentinar. Kon ang bana ug asawa regular nga magpaluyo sa usag usa sa ilang mga tumong ug kon sila magpasidungog ug magtahod sa usag usa, ang ilang kaminyoon magpabiling lig-on. Ang kahakog dili makagamot, ug ang kasuko makontrolar.

Ang grabe ug wala-mahusay nga kasuko ug kahiubos makapatay sa gugma ug pagmahal sa magtiayon. Si apostol Pablo nagtambag sa mga lalaki: “Kamong mga bana, magpadayon sa paghigugma sa inyong mga asawa ug ayaw pagkasuko nga hilabihan kanila.” (Colosas 3:19) Ang maong prinsipyo mapadapat usab sa mga asawa. Kon ang bana o asawa maningkamot nga magmahunahunaon, magmaluloton, ug magmasinabtanon, ilang matagamtam ang kalipay ug katagbawan. Ang pagkadili-masuk-anon ug pagkadili-agresibo makatabang aron malikayan ang panaglalis sa dihang motungha ang mga problema. “Magmaluloton sa usag usa,” miawhag si Pablo, “magmalumo uban ang pagkamabination, kinabubut-on nga magpasaylo sa usag usa.”—Efeso 4:32.

Komosta man kon ikaw maglagot tungod kay imong gibati nga ikaw walay mahimo, napikal, o wala pabilhi? Sa kalmadong paagi, isulti sa tin-aw ngadto sa imong kapikas ang katarongan sa imong kabalaka. Apan labing maayo kon tabonan na lang sa gugma ang ginagmayng mga kasungian.—1 Pedro 4:8.

 Usa ka bana, kinsa nakasinati nag daghang pagsulay sulod sa 35 ka tuig nga kaminyoon, nag-ingon nga bisag unsa ka pa ka suko sa imong asawa, “ayaw gayod mo pagbinungolay.” Siya maalamong midugang, “Ayaw gayod wad-a ang imong gugma sa imong asawa.”

Ikaw Makatukod ug Usa ka Malipayong Kaminyoon!

Tinuod, ang pagtukod ug usa ka malipayong kaminyoon dili sayon. Apan, kon ang mga magtiayon determinadong maningkamot sa paglakip sa Diyos diha sa ilang kaminyoon, kini mohatag ug kalipay ug kasegurohan. Busa, bantayi pag-ayo ang espirituwalidad sa inyong pamilya; pagbaton ug samag-bato ka lig-on nga pagkamaunongon diha sa kaminyoon. Ug hinumdomi nga sumala sa giingon ni Jesus, dili ang bana ni ang asawa maoy angayng pasidunggan sa usa ka malipayong kaminyoon. Kondili, ang kadayeganan angayng ihatag ngadto sa Tagmugna sa kaminyoon, si Jehova nga Diyos. “Kon unsay gihiusa pagyugo sa Diyos ayaw ipabulag ni bisan kinsang tawo.”—Mateo 19:6.

BASAHA USAB KINI

Ang librong Ang Sekreto sa Kalipay sa Pamilya, nga gipatik sa mga Saksi ni Jehova, naghatag ug mapuslanong mga sugyot sa pagtukod ug usa ka malipayon ug malamposong kaminyoon. Daghan kaayong magtiayon sa tibuok kalibotan ang nakapamatuod nga ang mapuslanong tambag nga gipasukad sa Bibliya nakatabang kanila sa pagpauswag sa kalidad sa ilang relasyon.—Tan-awa ang panid 32 niining magasina.

[Kahon sa panid 9]

Unsay Makatabang Kanimo sa Pagtukod ug Usa ka Malipayong Kaminyoon?

◼ Regular nga tun-i ang Pulong sa Diyos uban sa imong kapikas, ug pag-ampo sa Diyos alang sa tabang ug giya sa pagsulbad sa mga problema.—Proverbio 3:5, 6; Filipos 4:6, 7; 2 Timoteo 3:16, 17.

◼ Ihatag ang seksuwal nga interes ngadto lamang sa imong kapikas.—Proverbio 5:15-21; Hebreohanon 13:4.

◼ Pakigkomunikar sa prangka, matinud-anon, ug mahigugmaong paagi bahin sa inyong mga problema ug kasungian.—Proverbio 15:22; 20:5; 25:11.

◼ Pakigsulti sa imong kapikas sa maluloton, may-konsiderasyon nga paagi; ayaw pagsinta sa kasuko, pagyawyaw, ug pagpanaway.—Proverbio 15:1; 20:3; 21:9; 31:26, 28; Efeso 4:31, 32.

◼ Mapainubsanong ipadapat ang tambag sa Bibliya bisan pag nagtuo ka nga ang imong kapikas wala magbuhat sa tanan nga angay unta niyang buhaton.—Roma 14:12; 1 Pedro 3:1, 2.

◼ Paningkamoti gayod ang pag-ugmad sa espirituwal nga mga hiyas nga gihisgotan diha sa Bibliya.—Galacia 5:22, 23; Colosas 3:12-14; 1 Pedro 3:3-6.

[Mga hulagway sa panid 7]

Sunda ang mga instruksiyon sa Diyos alang sa kaminyoon nga makaplagan diha sa Bibliya

[Hulagway sa panid 7]

Himoa ang dili-mahakogong gugma ug pagkamaunongon nga inyong lig-ong pundasyon

[Mga hulagway sa panid 8]

Ugmara ang espirituwal nga mga hiyas nga makasugakod sa samag-kalayong mga pagsulay

[Mga hulagway sa panid 8]

Ang usa ka maayong kaminyoon kinahanglan mentinahon