Masaheon ang Masuso?

TINAMPO SA MAGSUSULAT SA PAGMATA! SA ESPANYA

SI Anita maoy usa ka batan-ong inahan nga taga-Nigeria. Ang iyang masuso iyang gidigo ug dayon maampingong gimasahe. Ang inahan ug masuso nalingaw pag-ayo. “Kini ang naandang ginahimo sa mga inahan sa Nigeria sa pag-atiman sa ilang mga masuso,” matod ni Anita. “Ako ug ang akong mga manghod nga lalaki gimasahe kaniadto ni Mama. Ang pagmasahe maoy ekselenteng paagi sa pagpalig-on sa kaunoran sa masuso ug pagparelaks niini. Samtang nagmasahe sa akong masuso, kantahan ug estoryahan nako siya, unya siya magsulti-sulti ug mopahiyom. Nindot kaayo kini nga eksperyensiya!”

Ang pagmasahe sa mga masuso naandan na diha sa daghang nasod, ug nagkapopular kini diha sa ubang mga nasod sa Kasadpan. Sumala sa Asosasyon sa Espanya Alang sa Pagmasahe sa Masuso, ang pagmasahe maoy hinay, malumo, ug makaparelaks nga paghapyod nga makatabang sa ginikanan sa pagpakigkomunikar sa iyang masuso sa pisikal ug emosyonal nga paagi. Kini maoy malumo apan medyo kusog nga mga paghapyod sa mga tiil ug bitiis maingon man sa bukobuko, dughan, tiyan, mga bukton, ug nawong sa masuso.

Unsang kaayohan ang mabatonan sa masuso sa pagmasahe kaniya? Una sa tanan, iyang bation nga siya gihigugma ug gipakitaag kalumo. Ang bag-ong nahimugso nga bata dili lamang nagkinahanglag pagkaon kondili nagkinahanglan usab ug gugma sa ginikanan. Sanglit ang masuso mosanong na sa paghikap kaniya, pinaagi sa malumo nga pagmasahe sa inahan o amahan ilang mapabati kaniya kini nga gugma. Daghang impormasyon—pisikal ug emosyonal—ang ikapasa ngadto sa usa ka masuso. Busa ang pagmasahe makatabang sa pagpalig-on sa bugkos sa gugma tali sa mga ginikanan ug sa ilang masuso sukad mismo sa pagkahimugso niini.

Gawas nga mapasundayag ang gugma pinaagig pagmasahe, makatudlo kini sa masuso sa pagrelaks, aron mas dugay ug hinanok ang iyang katulog ug siya dili kaayo mahigwaos. Ang pagmasahe lagmit makatabang usab sa pagpalig-on sa kaunoran maingon man sa pagkontrolar sa mga sistema sa kaugatan, paghilis, ug pagginhawa. Ang ubang tawo nag-ingon nga makahatag usab kinig kaayohan sa sistema sa imyunidad sa masuso. Ug tungod kay ang sentido sa paghikap, panan-aw, ug pandungog sa masuso napukaw na, ang pagmasahe lagmit makatabang usab sa memorya ug pagkat-on sa bata.

Ang ubang mga ospital nagsusi usab sa mga kapuslanan sa pagmasahe sa masuso. Pananglitan, gipakita sa usa ka pagtuon nga ang naahat pagkatawong mga masuso nga ginamasahe puwede nang iuli sa balay pito ka adlaw nga mas sayo kay niadtong wala gimasahe, ug mibug-at ang ilang timbang ug 47 porsiyento kon itandi sa mga masuso nga wala gimasahe.

Tin-aw nga dili lang mga hamtong ang makabenepisyo tungod sa maayong pagmasahe! Siyempre, para sa mga masuso ang pagmasahe dili lang kay makaparelaks sa kaunoran. Kini maoy pagpakitag gugma pinaagig mainitong mga kamot ug malumo nga mga tudlo, nga dinuyogan ug usa ka dakong pahiyom.