Mga Batan-on Nangutana . . .

Unsay Angay Nakong Himoon sa Akong Kinabuhi?

“Sa una, wala ko mabalaka sa akong kaugmaon. Apan sa hapit na akong mograduwar, akong naamgohan nga duna na diay koy angayng kabalak-an sa adlaw-adlawng kinabuhi, nga kinahanglang motrabaho ug mobayad ug mga bayranan.”—Alex, 17.

SA BATA ka pa, unsay imong giambisyon inigkadako nimo? Unsa na may imong hunahuna karon bahin niana? Naglibog ka ba kon unsaon nimo pagsuportar ang imong kaugalingon inigkahamtong na nimo? Kon mao, wala ka mag-inusara. “Ang pagpilig karera maoy usa sa gikabalak-an pag-ayo sa mga batan-on,” matod sa librong Career Coaching Your Kids.

Sa laing bahin, lagmit wala ka maghunahuna ug karera sa pagkakaron. Tingali mas gihunahuna nimo ang paglipaylipay. Dili sayop ang pagkalipay sa kinabuhi, kay ikaw giawhag sa Bibliya sa “pagpahimulos sa kinabuhi samtang batan-on ka pa!” (Ecclesiastes 11:9, Contemporary English Version) Bisan pa niana, karon na ang hustong panahon aron magsugod sa paghunahuna kon unsay imong himoon sa imong kinabuhi. “Ang usa nga maalamon magapalandong sa iyang mga lakang,” matod sa Proverbio 14:15. Sa unsang paagi ka magpalandong sa imong mga lakang?

“Hibaloa Kon Asa ka Padulong”

Handurawa nga ikaw nagplano sa pag-adto sa usa ka lugar nga layo kaayo. Tingali, ang imong unang himoon mao ang pagkonsulta ug mapa aron matino kon unsay kinamaayohang ruta nga agian. Kaamgid niana ang pagplano sa imong kaugmaon. “Daghan kaayo kag kapilian,” matod ni Michael, usa ka batan-on nga nag-alagad karon sa usa sa mga sangang buhatan sa mga Saksi ni Jehova. Unsaon man nimo pagpili gikan niini? “Magdepende kini sa imong mga tumong,” matod ni Michael.

Isipa ang usa ka tumong nga samag dapit nga adtoan. Lagmit dili ka makaabot didto kon ikaw maglibod-suroy lang. Mas maayong mokuha kag mapa ug planohon ang imong panaw, ingnon ta. Niining paagiha, imong gituman ang tambag sa Proverbio 4:26: “Pataga ang alagianan sa imong tiil.” Sumala pa sa paghubad niana sa Contemporary English Version: “Hibaloa kon asa ka padulong.”

Sa umaabot nga mga tuig, ikaw kinahanglang mohimog daghang importanteng mga desisyon maylabot sa pagsimba, panarbaho, kaminyoon, pamilya, ug uban pang hinungdanong mga butang.  Sayon lang ang paghimog maalamong mga desisyon kon una sa tanan nahibalo ka kon asa ka padulong. Ug samtang magplano ka sa direksiyon sa imong kinabuhi, adunay usa ka butang nga dili nimo puwedeng ibalewala.

“Hinumdomi ang Imong Maglalalang”

Kon buot gayod nimong magmalipayon, kinahanglang imong ipadapat ang mga pulong sa maalamon nga si Haring Solomon: “Hinumdomi ang imong Maglalalang samtang batan-on ka pa.” (Ecclesiastes 12:1, Today’s English Version) Ang dalan sa kinabuhi nga imong pilion kinahanglang gigiyahan sa imong tinguha nga pahimut-an ang Diyos.

Nganong hinungdanon kana? Ang Bibliya nag-ingon sa Pinadayag 4:11: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” Oo, ang tanang linalang sa langit ug yuta adunay katarongan nga magmapasalamaton sa Maglalalang. Ikaw ba mapasalamaton sa iyang paghatag kanimog “kinabuhi ug gininhawa ug tanang butang”? (Buhat 17:25) Wala ka ba matandog sa pagbalos kang Jehova nga Diyos agig pasalamat sa tanang gihatag niya kanimo?

Agig paghinumdom sa ilang Maglalalang, daghang batan-ong mga Saksi ni Jehova ang midesisyon sa pagsulod sa bug-os-panahong ministeryo. Sa tinuod lang, ang bug-os-panahong ministeryo maoy usa ka dalayegong tumong, ug kini mopahinabog daghang panalangin. (Malaquias 3:10) Apan kini nagkinahanglan ug abanteng pagplano. Pananglitan, pangutan-a ang imong kaugalingon, ‘Unsay akong mga abilidad ug katakos nga akong magamit sa pagsuportar sa akong kaugalingon diha sa bug-os-panahong ministeryo?’

Si Kelly, nga 27 anyos na karon, may plano na niadtong bata pa siya. Klaro ang iyang tumong sa pagsulod sa bug-os-panahong  ministeryo. Sa hapit na siyang mag-20 anyos, si Kelly nagsugod sa pagplano bahin sa iyang panarbaho. “Kinahanglang mopili ko ug trabaho nga makasuportar kanako sa akong ministeryo,” siya miingon.

Si Kelly nabansay ingong katabang sa dentista pinaagi sa usa ka bokasyonal nga programa sa hayskul. Nakadaog pa gani siya sa usa ka kompetisyon sa tibuok estado. Apan, bisan pa sa iyang kalamposan, siya wala malimot sa iyang pangunang tumong. “Ang bug-os-panahong ministeryo mao gayod ang akong gusto,” miingon si Kelly. “Ang uban segundaryo na lang.” Si Kelly nagpadayon hangtod karon diha sa iyang bug-os-panahong ministeryo. “Para nako husto gayod ang akong gihimong desisyon,” siya miingon.

Pangutan-a ang Uban

Kon dili ka suheto sa dapit nga imong agian, lagmit may panahon nga kinahanglang mangutana ka gayod sa uban—bisag may dala ka pang mapa. Buhata usab kini kon magplano ka bahin sa imong kaugmaon. Magpakitambag sa uban. Ang Proverbio 20:18 nag-ingon: “Pinaagi sa tambag ang mga plano lig-on nga matukod.” Siyempre, ang imong mga ginikanan makagiya kanimo. Magpakitambag ka usab sa hamtong nga mga Kristohanon kansang kinabuhi nagpabanaag ug diyosnong kaalam. “Duola ang mga hamtong nga maayong panig-ingnan diha sa imong kongregasyon o sa ubang mga dapit,” misugyot si Roberto. “Sila dunay mga butang nga ikasulti kanimo nga basig wala nimo mahunahunai.”

Labaw sa tanan, si Jehova nga Diyos buot nga motabang kanimo sa paghimog mga pagpili sa kinabuhi nga maoy maghatag kanimog dakong kalipay. Busa hangyoa siya sa pagtabang kanimo ‘nga padayong masabtan kon unsa ang iyang kabubut-on’ bahin sa imong kaugmaon. (Efeso 5:17) Kon ikaw mosalig kang Jehova sa imong bug-os nga kasingkasing, “siya magatul-id sa imong mga alagianan.”—Proverbio 3:5, 6.

Ang ubang mga artikulo sa seryeng “Mga Batan-on Nangutana . . .” makita diha sa Web site nga www.watchtower.org/ypa

ANGAYNG PALANDONGON

◼ Unsay imong mga abilidad ug katakos?

◼ Makahunahuna ka ba ug mga paagi nga imong magamit kining mga abilidara sa pagdayeg kang Jehova?

◼ Unsang partikular nga matang sa bug-os-panahong pag-alagad nga gihisgotan niining artikuloha ang nakapaikag kanimo?

[Kahon sa panid 23]

DAOTAN NGA DULNGANAN

Ang Bibliya nag-ingon: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan.” Ang dalan padulong sa pagkaadunahan punog libaong! Sa ngadto-ngadto, kini mosangko sa mga utang, kabalaka, ug espirituwal nga pagkahugno.—1 Timoteo 6:9, 10.

[Kahon/​Mga hulagway sa panid 24]

PAGPAYUNIR

Ang payunir maoy usa ka sulondan, bawtismadong Kristohanon nga mogugol ug labing menos 70 ka oras kada bulan sa pagsangyaw sa maayong balita sa Gingharian sa Diyos. Ang mga payunir nagpauswag sa ilang mga katakos ingong mga magtutudlo sa Bibliya pinaagig pagbansay ug eksperyensiya.

PAG-ALAGAD SA BETHEL

Ang mga membro sa pamilyang Bethel nag-alagad diha sa mga sangang buhatan sa mga Saksi ni Jehova, diin sila nagtabang sa pag-andam, paggama, ug pagpadalag literatura sa Bibliya. Ang matag buluhaton sa Bethel maoy usa ka sagradong pribilehiyo sa pag-alagad.

PAG-ALAGAD SA DAPIT NGA DAKOG PANGINAHANGLAN

Ang pipila ka payunir namalhin sa mga dapit diin dako ang panginahanglan ug mga magmamantala sa Gingharian. Ang uban nagtuon ug laing pinulongan ug nag-alagad sa laing nasod o sa kongregasyon nga nagsulti niana nga pinulongan.

INTERNASYONAL NGA PAG-ALAGAD

Ang internasyonal nga mga alagad moadto sa ubang nasod sa pagtabang sa pagpanukod ug mga Kingdom Hall ug mga pasilidad sa sanga. Kini maoy usa ka matang sa sagradong pag-alagad nga kaamgid sa buluhaton niadtong nagtukod sa templo ni Solomon.—1 Hari 8:13-18.

MINISTERIAL TRAINING SCHOOL

Ang walo ka semanang kurso nagbansay sa kuwalipikado nga ulitawong mga ansiyano ug ministeryal nga mga alagad sa organisasyonal nga mga butang ug sa pagpakigpulong sa publiko. Ang pipila nga migraduwar giasayn sa pag-alagad sa ilang yutang natawhan; ang uban gipadala sa pag-alagad sa ubang nasod.

MISYONARYONG PAG-ALAGAD

Ang kuwalipikadong mga payunir nga himsog ug may resistensiya gibansay aron sa pag-alagad sa ubang nasod. Makapadasig ug makapatagbaw ang kinabuhi sa mga misyonaryo.

[Kahon/​Hulagway sa panid 24]

WHAT WILL I DO WITH MY LIFE?

Kini nga video, nga gihimo sa mga Saksi ni Jehova, nagpasundayag ug prangkang mga interbiyo sa mga batan-on gikan sa Alemanya, Brazil, Britanya, ug Tinipong Bansa. Sa dili madugay kini mabatonan na diha sa ubay-ubayng mga pinulongan.

[Hulagway sa panid 23]

“Magdepende kini sa imong mga tumong.”—Michael, membro sa pamilyang Bethel

[Hulagway sa panid 24]

“Para nako husto gayod ang akong gihimong desisyon.”—Kelly, unom ka tuig na nga payunir

[Hulagway sa panid 25]

“Duola ang mga hamtong nga maayong panig-ingnan.”—Roberto, membro sa pamilyang Bethel