Ako ‘Mosaka Ingon sa Laking Osa’

SUMALA SA GIASOY NI FRANCESCO ABBATEMARCO

“Nganong gitugotan sa Diyos nga mahitabo kini kanako? Nganong ako pa man gayod?” Daghang higayon nga gisukna nako kining mga pangutanaha! Dili ako makadawat nga maglingkod na lang ako sa wheelchair sa tibuok nakong kinabuhi, nga dili makagamit sa akong mga kamot ug mga tiil.

SA DIHANG ako natawo sa 1962, sa usa ka gamayng lungsod sa rehiyon sa Basilicata sa Italya, ako hapit mamatay sa gihimugso ako. Ang akong inahan naglisod sa pagpanganak, ug giineksiyonan siya sa doktor ug medisina nga dili maayog mga epekto. Paglabay sa tulo ka adlaw, ang akong gamayng lawas nagkurog-kurog sa kombulsiyon. Ang akong mga kamot ug mga batiis naparalisar, ug ang kuwerdas sa akong paningog nadaot.

Sa nagkadako ako, ang kaguol tungod sa kahimtang sa akong lawas dili mabangbang. Dali akong masuko ug akong pikhan dayon ang mga tawo nga magpaduol nako. Akong gibati nga daw gitalikdan ako sa kalibotan, ug ang akong kinabuhi walay kahulogan. Sa nag-edad ako ug 25, misamot ang akong kaguol. Kay wala makasabot kon nganong ako gipaantos ug maayo sa Diyos, ako nakaingon nga tingali walay Diyos.

Usa ka Lahi nga Panglantaw

Usa ka buntag sa ulahing mga bulan sa 1987, samtang ako naglingkod sa wheelchair sa gawas sa balay, duha ka desenteg pamiste nga batan-ong mga lalaki miduol nako. Abi nakog ang akong igsoong lalaki ang ilang gipangita ug ako naglisod pagsulti kanila nga wala ang akong igsoon. “Apan ikaw ang among tuyo,” sila mitubag. Ako nakurat kay ang mga tawo dili interesadong makigsulti nako.

“Motuo ka ba ug Diyos?” sila nangutana. Sila akong gitubag sa pinabundak nga tingog, “Sa akong kahimtang, ako ba makatuo nga adunay Diyos?” Dinhi nagsugod ang among panagsultihay, ug akong nahibaloan nga sila mga Saksi ni Jehova. Ila akong gitanyagan ug libro nga nag-ulohang Life—How Did It Get Here? By Evolution or by Creation? a nga gidawat nako bisag wala akoy interes. Sila nanaad nga mobalik. Apan ako nanghinaot nga dili na sila mobalik.

Ang duha ka Saksi mibalik sumala sa ilang gisaad, ug nag-estoryahay na usab kami. Akong nahinumdoman ang mga bersikulo sa Bibliya nga ilang gibasa kanako, ang Isaias 35:5, 6: “Nianang panahona ang mga mata sa mga buta mabuka, ug ang igdulungog sa mga bungol mabuksan. Nianang panahona ang bakol mosaka ingon sa laking osa, ug ang dila sa amang mosinggit sa kasadya.” Nindot kaayong pamation kadtong mga pulonga apan kini lahi kaayo sa tinuod nga kahimtang sa akong kinabuhi. Dili gani ako makatindog, di labaw na ang pagsaka ingon sa osa. Bisan pa niana, ako misugot nga ila akong tun-an sa Bibliya, apan wala ako magtuo nga ang Bibliya makatabang sa akong mga problema niadtong panahona. Ang paglaom nga mawala na sa umaabot ang akong mga depekto morag dili realistiko.

Sa ngadto-ngadto, gidapit ako sa mga Saksi sa pagtambong sa usa ka tigom sa ilang Kingdom Hall. Wala na ako makahinumdom kon bahin sa unsang pakigpulong sa Bibliya kadto, apan wala gayod ako malimot sa pagkamahigalaon ug gugma nga gipakita sa mga Saksi kanako. Imbes lumsan akog kaluoy, ila akong giabiabig maayo. Niana nga Dominggo akong nakita nga ang Kingdom Hall mao ang angayng dapit kanako, ug ako nagsige na ug tambong sa mga tigom.

 Bukid Kaayong Sakaon

Ang pagtuon sa Pulong sa Diyos dako kaayog epekto sa akong kasingkasing. Daw nagsugod na usab pag-agos ang duga sa laya na nga kahoy. Akong nasinati ang pagbati nga abi nakog dili na mapukaw. Pagkalalim nga ako nabuhi pag-usab! Buot ko nga makapadayag ngadto sa uban sa maanindot kaayong paglaom nga akong gidawat. (Mateo 24:14) Apan, unsaon ko kini paghimo? Kinasingkasing nakong giampo kini, nga naghangyo kang Jehova nga pakitaan ako ug paagi.

Niadtong Septiyembre 1991, usa ka payunir (bug-os-panahong magsasangyaw) giasayn diha sa kongregasyon. Usa ka adlaw niana diha sa iyang balay, akong gisulti kaniya nga buot ko nga mosangyaw. Dili ako makasulti ug maayo, busa among nahisgotan nga mogamit ako ug makenilya aron makahimog mga sulat. Dili ako makahimo niini kay paralisado ang akong mga kamot. Pinaagi sa tabang sa payunir, gisulayan nako ang daghang paagi. Misulay ako sa paghawid ug lapis pinaagi sa akong ngipon ug gamiton kini sa pagtapoy sa makenilya. Dayon, misulay ako sa paggamit ug helmet nga gitaoran ug mubong lipak ug akong idungo-idungo ang akong ulo sa pagtapoy sa makenilya. Kining mga paagiha wala mosaler.

Dayon, samtang naghisgot kami bahin sa problema, kini nga payunir kinomedyang miingon: “Taas kaayo kag ilong.” Dihadiha misulay ako sa pagtapoy sa makenilya pinaagi sa akong ilong ug kini misaler. Sa kataposan, ako makasulat na. Hunahunaa lang ang kalisod sa pagpapas sa sayop nga espeling pinaagi sa akong ilong! Dayon nahunahunaan namo nga mas sayon ang paggamit ug kompiyuter. Apan asa man akog kuwarta nga ipalit niini? Naghulat ako sa hustong panahon ug unya nakigsulti ako sa akong mga ginikanan. Wala magdugay human niana, kompiyuter na ang akong gigamit sa paghimog mga sulat.

Ang Akong Tinguha Natuman

Una nakong gisulatan ang akong mga higala ug mga paryente, unya ang akong mga katagilungsod ug ang mga tawo sa kanait nga mga lungsod. Sa ngadto-ngadto nakigsinulatay ako sa mga tawo sa tibuok Italya. Lisod mahubit ang kalipay nga akong gibati matag higayong makadawat ako ug tubag sa usa ka sulat. Sa Disyembre 1991, ako giaprobahan ingong dili-bawtismadong magmamantala sa maayong balita. Nagpalista usab ako sa Teokratikanhong Tunghaan sa Ministeryo, usa ka tunghaan nga himoon matag semana diha sa mga kongregasyon sa mga Saksi ni Jehova. Kon ako makadawat ug asaynment sa paghatag ug pakigpulong, mangandam gayod akog maayo sa balay ginamit ang akong kompiyuter. Diha sa tigom, usa ka higala ang moadto sa plataporma ug basahon ang impormasyon nga akong giandam.

Kay mapasalamaton kaayo sa gugma nga gipakita ni Jehova kanako, ako nahibalo nga ang akong sunod nga mga lakang aron mouswag sa espirituwal mao ang pagpahinungod sa akong kinabuhi ngadto sa Diyos ug magpabawtismo. Nangusog ako sa pagpakigsulti sa akong mga ginikanan bahin sa akong desisyon. Sila wala malipay, apan ang akong tinguha nga magpabawtismo mas kusganon kay sa akong kahadlok. Pinaagi sa tabang ni Jehova ug sa akong kaubang mga Saksi, ako nagpabawtismo sa Agosto 1992. Ako nalipay kaayo nga mitambong sa akong bawtismo ang akong magulang nga lalaki ug ang akong bayaw nga babaye!

Nausab ang Akong Panghunahuna

Sa mas nasabtan pa nako ang mga prinsipyo sa Pulong sa Diyos, akong nakita nga kinahanglang usbon nako ang akong dili maayong mga kinaiya. Akong naamgohan nga tungod sa akong kondisyon sa lawas, ako igihan ug hakog. Nakigbisog ako sa pagbuntog niini nga mga kahuyangan. Kinahanglang magmapainubsanon ako ug maningkamot sa pagbuntog sa kahigawad nga akong bation kanunay tungod sa pagdepende sa uban.

Ako naningkamot usab sa pagbuntog sa pagbatig kaluoy sa akong kaugalingon ug sa pag-isip  nga wala akoy silbi. Ako makakatawa na sa kataw-anang mga kahimtang. Usa ka adlaw niana samtang ako nagsangyaw sa balay ug balay, usa ka batang babaye ang mibukas sa pultahan. Ang usa sa mga Saksi nga kauban nako nangutana kon anaa ba ang iyang mga ginikanan. Ang bata misinggit, “Ma, diay duha ka lalaki ug usa ka lalaking masakiton nga nangita nimo.” Sa dihang nakakita nako, ang inahan naulaw nga wala siya mahibalo kon unsay isulti. Usa sa akong mga higala miingon: “Sa pagkatinuod, duha ang masakiton ug usa ang himsog.” Kaming tanan nangatawa, ug bibo ang among panagsultihay.

Ang Tinguha nga Makaalagad pa sa Bug-os

Human sa akong bawtismo nag-alagad ako ingong oksilyare payunir sa siyam ka bulan, nga nakagugol ug 60 ka oras matag bulan sa buluhatong pagsangyaw. Apan, gusto kong makahimo pag dugang. Wala magdugay nag-alagad ako ingong regular payunir, nga naggugol ug mas daghang oras sa buluhatong pagsangyaw. Gilisdan ako sa unang pipila ka bulan sa pag-alagad ingong payunir. Abi sa mga tawo ug nagpakilimos ako dihang moduaw ako kanila, ug tungod niini naulaw ako ug ang mga Saksi nga mouban nako.

Dugang pa, daghan diha sa kongregasyon ang naglisod sa pagsabot sa akong sinultihan ug naglibog kon unsaon nila pagtabang kanako. Apan pinaagi sa tabang ni Jehova ug sa kaayo sa akong espirituwal nga mga igsoon, sa ngadto-ngadto ang kahimtang miuswag. Gilantaw na ako sa mga tawo karon dili ingong usa lamang ka bakol nga naglingkod sa wheelchair kondili ingong Saksi ni Jehova nga naningkamot sa pagtabang sa uban sa pagkakat-on sa mga katuyoan sa Diyos.

Sa Hulyo 1994, nakatambong ako sa linaing duha ka semana nga tunghaan sa pagbansay sa payunir nga mga ministro. Didto, among gitun-an ang mga prinsipyo sa Kasulatan nga naggiya sa buluhatong pagsangyaw ug paghimog tinun-an. Kami nakadawat usab ug mapuslanong pagbansay diha sa ministeryo. Kinahanglang sagubangon nako ang mga kakulian aron makatambong, kay duolan sa 60 kilometros pa man ang distansiya sa tunghaan gikan sa akong gipuy-an. Lisod alang kanako ang pagkatulog nga layo sa balay, busa ang mga Saksi nagpuli-puli sa paghatod kanako sa tunghaan sa buntag ug sa pagkuha kanako pagkagabii. Sa paniudto usa kanila mosakwat nako paingon sa taas, diin didto kaming tanan magdungan ug pangaon.

Usa ka Dakong Responsibilidad

Sa Marso 2003, natudlo ako ingong ansiyano sa kongregasyon. Ang maong asaynment nagsangon ug daghang trabaho kanako alang sa uban. Karon mas nasabtan na nako kon unsay gipasabot ni Jesus sa dihang siya miingon: “Adunay labaw nga kalipay sa paghatag kay sa pagdawat.” (Buhat 20:35) Ako nag-alagad uban sa buotang lawas sa mga ansiyano, ug ako ilang gitabangan aron makapaangay sa akong kaakohan ingong ansiyano. Gibati nakong mapasalamaton kanako ang tibuok kongregasyon—ilabina ang mga batan-on—ug ako ilang iuban sa ilang mga kalihokan. Ilang nakita kon sa unsang paagi nabuntog nako ang mga kababagan aron makaalagad kang Jehova, ug daghan ang mangayo nako ug tabang sa pag-atubang sa ilang kaugalingong mga problema.

Akong naamgohan nga ang kahimtang sa lawas dili importante aron magmalipayon. Hinunoa, ang importante mao ang pag-uyon ni Jehova ug ang pagtuman sa iyang kabubut-on. Ako mapasalamaton gayod kaniya sa maanindot nga paglaom nga sa dili madugay dili na unya ako magkinahanglan ug wheelchair. Oo, ako nagpaabot sa panahon nga ‘makasaka ingon sa laking osa’ ug makaalagad sa matuod nga Diyos hangtod sa kahangtoran.—Isaias 35:5, 6.

[Footnote]

[Blurb sa panid 22]

Gilantaw na ako sa mga tawo karon dili ingong usa lamang ka bakol nga naglingkod sa wheelchair kondili ingong Saksi ni Jehova nga naningkamot sa pagtabang sa uban sa pagkakat-on sa mga katuyoan sa Diyos

[Hulagway sa panid 21]

Nangandam alang sa usa ka tigom sa kongregasyon pinaagi sa paggamit sa akong ilong sa pagtapoy sa tapoyanan sa kompiyuter