Ang Pagtuo sa Usa ka Bata

SI Dustin moapil usahay sa dihang ang iyang inahan dumalahan ug pagtuon sa Bibliya sa usa ka Saksi ni Jehova. Bisag 11 anyos pa lang, siya lalom ug panghunahuna ug mga pangutana. Wala madugay mihangyo siya nga dumalahan usab siya ug pagtuon sa Bibliya sa kanhing misyonaryo nga maoy nagdumala ug pagtuon sa iyang inahan. Gipaambit usab niya ang iyang nakat-onan ngadto sa iyang mga eskolmet.

Si Dustin motambong na sa mga tigom sa Kingdom Hall, nga motubag pa gani sa mga pangutana sa dihang hangyoon ang nanambong sa pagpakigbahin. Sa dihang siya ug ang iyang mga manghod miduaw sa ilang amahan, ang amahan miinsistir nga manimba silang tanan. Gipatin-aw ni Dustin kon nganong mas gusto niyang motambong sa Kingdom Hall. Ang iyang amahan misugot ug iyang gitugotan si Dustin sa pagtambong didto.

Usa ka gabii niana human sa tigom sa Kingdom Hall, si Dustin gipangita sa iyang inahan. Walay kalibotan ang iyang inahan nga siya miduol sa tigdumala sa Teokratikanhong Tunghaan sa Ministeryo aron magpalista sa maong tunghaan. Misugot ang iyang inahan. Siya mahinamong nagpaabot sa panahong iyang mahatag ang iyang unang bahin. Apan, sa samang higayon siya nagsugod pag-antos ug grabeng sakit sa bat-ang, busa gipakonsulta siya sa lainlaing mga doktor. Sa kataposan, miabot ang gikahinamang gabii nga ihatag ni Dustin ang iyang bahin sa Kingdom Hall. Niadtong panahona, siya nagkratses na. Bisan tuod klaro nga gisakitan, siya wala magkratses paingon sa plataporma.

 Wala madugay human niana, si Dustin nadayagnos nga dunay Ewing’s sarcoma, usa ka talagsaong matang sa kanser sa bukog. Iyang gigugol ang dakong bahin sa misunod nga tuig diha sa ospital sa mga bata sa San Diego, California. Ang chemotherapy, radyasyon, ug sa ngadtongadto ang pagputol sa iyang tuo nga bitiis ug bukog sa bat-ang wala gayod makapahuyang sa iyang lig-ong pagtuo ug gugma kang Jehova. Sa dihang siya luya kaayo ug dili makabasa, basahan siya sa iyang inahan, kinsa anaa kanunay sa iyang tapad.

Bisan pag migrabe ang kahimtang ni Dustin, siya wala gayod moreklamo. Kanunay siyang puliki, sakay sa iyang wheelchair iyang duolon ug dasigon ang ubang mga pasyente ug ang ilang mga ginikanan, apil na ang usa ka pasyenteng Saksi. Nakita sa kawani sa ospital nga lahi si Dustin ug ang batan-on nga pasyenteng Saksi—nga ang ilang pagtuo maoy nagpalig-on kanila.

Gusto ni Dustin nga magpabawtismo. Busa samtang siya naghigda sa sopa, nga dili makahimo sa paglingkod kay luya kaayo, ang Kristohanong mga ansiyano naghisgot uban kaniya sa mga pangutana nga maoy isukna ngadto sa mga kandidato sa bawtismo sa mga Saksi ni Jehova. Sa Oktubre 16, 2004, sa edad nga 12 anyos ug tunga, si Dustin gibawtismohan diha sa usa ka sirkitong asembliya.

Sa hapit nang magsugod ang pakigpulong sa bawtismo, gi-wheelchair si Dustin paingon sa gilingkoran sa mga kandidato sa bawtismo. Sa dihang gihangyo sa pagtindog, si Dustin, nga nagsul-ob sa iyang kinanindotang besti, mitindog sa usa ka tiil, nga naggunit sa lingkoranan aron dili matumba. Siya mitubag sa mga pangutana sa bawtismo sa kusog ug tin-aw nga tingog. Ang tibuok pamilya ni Dustin mitambong, apil ang iyang amahan ug inaina. Ang mga kawani sa ospital ug ang mga ginikanan sa ubang mga batang may kanser gikan sa maong ospital mitambong usab.

Pagkasunod adlaw human sa bawtismo ni Dustin, siya gisulod na usab sa ospital. Ang kanser mikaylap na sa tanang bukog sa iyang lawas. Samtang siya nagkaluya ug nagtuo nga hapit nang mamatay, iyang gipangutana ang iyang inahan kon mamatay na ba siya. “Ngano mang nakapangutana ka?” ang iyang inahan mitubag, “nahadlok ka bang mamatay?”

“Dili man,” siya miingon. “Kay igo ra man kong mopiyong, unya inigbuka nako sa akong mata sa pagkabanhaw, morag bag-o ra nako kining gipiyong. Wala na koy bationg sakit.” Dayon siya mipatin-aw, “Nabalaka lang ko ninyo nga akong pamilya.”

Si Dustin namatay pagkasunod bulan. Ang serbisyo sa iyang lubong gitambongan sa mga doktor, nars, mga pamilya sa mga empleyado sa ospital, mga magtutudlo, mga silingan ug, siyempre, sa pamilya ni Dustin—kadtong mga Saksi ni Jehova ug kadtong dili. Si Dustin mihangyo nga ang tanang motambong sa serbisyo sa iyang lubong hatagag maayong pamatuod bahin sa iyang mga tinuohan. Ang instruktor sa Teokratikanhong Tunghaan sa Ministeryo, nga maoy nag-asayn kaniya sa iyang bugtong nga bahin ingong estudyante, mihatag ug maayo kaayo, makapalig-on-sa-pagtuo nga pakigpulong ngadto sa naghuot nga mga tumatambong.

Duha sa paboritong mga teksto ni Dustin giimprenta alang sa nanambong sa iyang lubong—Mateo 24:14 ug 2 Timoteo 4:7. Ang iyang lig-ong pagtuo ug integridad nakadasig sa tanang nakaila kaniya. Kami naglaom sa pag-abiabi kaniya sa pagkabanhaw.—Sumala sa giasoy sa Saksi nga nagdumala ug pagtuon kang Dustin.

[Blurb sa panid 27]

“Gibugno ko na ang maayong bugno, natapos ko na ang pagdagan sa lumba, nasunod ko na ang pagtuo.”​—2 Timoteo 4:7

[Hulagway sa panid 26]

Ibabaw: Si Dustin, sa wala pa magsakit

[Hulagway sa panid 26]

Ubos: Gibawtismohan si Dustin sa edad nga 12 1⁄2 anyos