Ang Hunahuna sa Bibliya

Ang mga Tawo ba Mahimong mga Manulonda Inigkamatay Nila?

ANG batang babaye nga si Argyro namatay sa dihang siya siyete anyos lang. Naguol pag-ayo ang iyang mga ginikanan nga nagtan-aw kaniya diha sa lungon nga nagsul-ob ug puting sinina. Sa paningkamot nga hupayon sila, ang ministro nag-ingon kanila: “Ang Diyos nagkinahanglan ug manulonda, ug Iyang gikuha ang batang si Argyro aron iyang makauban. Karon ang iyang kalag naglupad-lupad na libot sa trono sa Labing Gamhanan.”

Daghang tawo ang sinserong nagtuo nga ang mga manulonda mao ang mga kalag sa mga nangamatay, bisag pipila ka relihiyon lang ang opisyal nga nagduso sa maong ideya. Gipabantog sa media kini nga panglantaw pinaagi sa mga pelikula ug mga serye sa telebisyon bahin sa mga patay nga nahimong mga manulonda tungod sa pagtabang ug pagpanalipod sa mga buhi.

Sa tinuoray lang, nagtuo ka ba nga ang imong mga minahal mahimong mga manulonda inigkamatay nila? Unsay gitudlo sa Bibliya bahin niini? Aron matubag ang maong pangutana, susihon una nato kon unsa gayoy giingon sa Balaang Kasulatan bahin sa kinaiyahan sa mga manulonda ug ang tinuod nga kahimtang sa mga patay.

Mga Manulonda—Talagsaong mga Linalang

Ang mga manulonda dili makita, gamhanan nga mga alagad sa Diyos nga nagpuyo sa espirituhanong dapit. Ang ilang paglungtad wala mag-agad sa mga tawo. Ang mga manulonda maoy espiritung mga persona nga gilalang sa Diyos. Ang Bibliya nag-ingon: “Ipadayeg [sa mga manulonda] ang ngalan ni Jehova; kay siya nagsugo, ug nalalang sila.”—Salmo 148:2, 5.

Gibutyag sa Bibliya nga milyonmilyong matinumanong manulonda, lakip na ang mga serapin ug kerubin, masinugtanong nag-alagad diha sa ilang tagsatagsa ka dapit sumala sa ilang ranggo ug mga asaynment. (Salmo 103:20, 21; Isaias 6:1-7; Daniel 7:9, 10) Kinahanglan pa bang mamatay ang mga tawo aron makapatungha ang Diyos ug mga manulonda? Sa pagkatinuod, imposible kana. Ngano man?

Gipakita sa Bibliya nga ang mga manulonda dugay na kaayong gilalang sa wala pa malalang ang tawo. Sa dihang gilalang ni Jehova ang planeta nga sa ulahi puy-an sa mga tawo, ang mga manulonda—nga gihisgotan sa balaknong paagi ingong mga bituon sa kabuntagon—‘nagdungan paghugyaw sa kalipay ug misinggit sa pagdayeg.’ (Job 38:4-7) Busa sila naglungtad na sa di maihap nga katuigan una pa gilalang ang tawo.

Dugang pa, ang mga manulonda ug ang tawo magkalahi kaayo sa ilang kinaiyahan ug dapit diha sa katuyoan ni Jehova. a Gilalang sa Diyos ang tawo nga “ubos ug diyutay kay sa mga manulonda,” busa ang espirituhanong mga linalang haom nga tawgong labaw-tawhanon, nga mas labaw ug katakos sa panghunahuna ug gahom. (Hebreohanon 2:7) Ang “nahiangay nga puloy-anang dapit” sa mga manulonda mao ang mga langit.  (Judas 6) Mahitungod sa mga tawo, ang orihinal nga katuyoan sa Diyos mao nga sila mabuhi sa walay kataposan dinhi sa yuta. (Genesis 1:28; 2:17; Salmo 37:29) Kon ang unang tawhanong magtiayon nagmasinugtanon pa sa Diyos, dili gayod unta sila mamatay. Busa, sukad pa sa sinugdanan ang mga tawo ug mga manulonda aduna nay magkalahi nga dapit diha sa katuyoan sa Diyos.

Unsay Mahitabo Inigkamatay?

Ang ubang hinungdanong mga pangutana nga kinahanglang tubagon mao: Unsay mahitabo sa mga tawong nangamatay? Sila ba padayong maglungtad apan sa laing dagway, tingali ingong mga manulonda diha sa espirituhanong dapit? Ang Bibliya adunay yano ug tin-aw nga tubag: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” (Ecclesiastes 9:5) Busa ang tawo dili na maglungtad inigkamatay. Ang patay bug-os nga walay nahibaloan, pagbati, ug kasinatian.

Aduna bay paglaom ang mga patay? Oo! Gipakita sa Bibliya nga ang paglaom sa kadaghanang nangamatay mao nga sila pagabanhawon. Ang kadaghanan sa mga patay pagabanhawon ingong mga tawo sa usa ka paraisong yuta.—Lucas 23:43; Juan 5:28.

Ang pipila ka tawo adunay paglaom nga banhawon ngadto sa kinabuhi sa langit. Diyutay ra ang ilang gidaghanon—144,000. Apan, kining 144,000 lahi sa mga manulonda. Pananglitan, ang 144,000 magmando ingong imortal nga mga hari ug saserdote uban kang Kristo. Sila adunay awtoridad ingong mga maghuhukom. (1 Corinto 6:3; Pinadayag 20:6) Sila ba mga masuso nga nangamatay? Dili. Sila mga sumusunod ni Kristo nga nasulayan na sa bug-os!—Lucas 22:28, 29.

Tagda usab ang kalainan tali sa patay nga mga tawo ug buhi nga mga manulonda. Ang patay nga mga tawo “walay nahibaloan nga bisan unsa,” apan ang mga manulonda dunay kasayoran, pagbati, ug kaugalingong desisyon. Sila adunay kagawasan sa pagpili. (Genesis 6:2, 4; Salmo 146:4; 2 Pedro 2:4) Ang mga patay gihubit nga “walay gahom,” samtang ang mga manulonda “gamhanan sa kusog.” (Isaias 26:14; Salmo 103:20) Ug ang tawhanong mga kaliwat ni Adan mamatay ingong resulta sa sala ug pagkadili-hingpit, apan ang mahinadlokon-sa-Diyos nga mga manulonda hingpit, nga adunay inuyonang baroganan atubangan kang Jehova.—Mateo 18:10.

Tingali ang tema sa mga programa sa TV o pelikula nagpasiugda sa ideya nga ang mga manulonda maoy kalag sa mga nangamatay, apan ang maong pagtuo wala paluyohi sa Kasulatan. Ang mga kamatuoran sa Bibliya nga gipakita niini nga artikulo motabang kanato sa paglikay sa bisan unsang sayop nga pagtuo bahin sa dulnganan sa atong mga minahal nga nangamatay. Ug ang Bibliya nagpasalig kanato nga ang matinumanong mga manulonda—gilalang ingong mga indibiduwal, gamhanang mga alagad sa Diyos—maoy labaw sa mga tawo ug kanunayng andam sa pagtuman sa kabubut-on ni Jehova. Makalilipay nga kabubut-on sa Diyos nga ang mga manulonda magbantay ug motabang niadtong kinasingkasing nga nagtahod kang Jehova ug nagtinguha sa pag-alagad kaniya.—Salmo 34:7.

[Footnote]

NAHIBULONG KA BA?

◼ Ang imo bang nangamatay nga mga minahal mga manulonda na karon nga nag-alagad sa Diyos sa langit?​—Ecclesiastes 9:5, 10.

◼ Ang mga bata ba mamatay tungod kay gusto sa Diyos nga dugangan ang mga manulonda?​—Job 34:10.

◼ Makabalik ba ang mga patay aron sa pagpanalipod sa mga buhi?​—Isaias 26:14.

[Blurb sa panid 29]

“Ipadayeg [sa mga manulonda] ang ngalan ni Jehova; kay siya nagsugo, ug nalalang sila.”​—Salmo 148:2, 5