Pagpaniid sa Kalibotan

◼ Ang klima sa miaging tuig mao “ang kinainitan nga natala sa Amihanang Hemispera” ug “ikaduha sa kinainitang klima sa tibuok kalibotan.” “Walo sa 10 ka kinainitang mga tuig [nga natala] nahitabo sulod sa milabayng napulo ka tuig.”—BBC NEWS, BRITANYA.

◼ Ang 2005 nga tingbagyo sa Atlantiko mao ang “kinadaghanag bagyo” nga tuig ug “kinagrabehan ang kadaot.” Pito sa 14 ka bagyo nga natala dunay gikusgon sa hangin nga kapin sa 177 kilometros kada oras.—U.S. NATIONAL OCEANIC AND ATMOSPHERIC ADMINISTRATION.

◼ “Niadtong 1850, dihay kapin sa 150 ka mga bukid sa yelo sa Glacier National Park sa Montana [U.S.A.]. Karon 27 na lang.”—THE WALL STREET JOURNAL, U.S.A.

◼ “Ang masakit nga kamatuoran bahin sa lainlaing mga polisa sa gobyerno may kalabotan sa pag-init sa klima mao nga ang mga nasod dili gustong mohimog kausaban sa pagsulbad niining problemaha kon ang maong mga kausaban makapahuyang sa ilang ekonomiya.”—TONY BLAIR, PRIMER MINISTRO SA BRITANYA.

Mga Katoliko ‘Mamalaybalay’?

Sumala kang Cláudio Hummes, arsobispo sa São Paulo, ang gidaghanon sa mga Katoliko sa Brazil mius-os gikan sa 83 porsiyento ngadto sa 67 porsiyento sa milabayng 14 ka tuig. Gibasol sa arsobispo ang simbahan “tungod kay, sa lainlaing katarongan, wala niini isangyaw sa bug-os ang ebanghelyo ngadto sa nabunyagang mga membro niini.” Si Hummes miingon: “Kinahanglang atong sangyawan ang mga membro sa simbahan, pinaagi sa pagpamalaybalay, diha sa mga eskuylahan, mga institusyon, ug dili lang sa parokya.” Ang Folha Online nag-ingon nga kining buluhatona angayng himoon sa mga membro nga gibansay ingong mga misyonaryo. Ang kakulang ug mga pari maoy usa sa dagkong mga problema nga giatubang sa Iglesya Katolika sa Brazil ug sa tanang nasod sa Latin Amerika sa katibuk-an.

Legal nga Pag-ila Didto sa Alemanya

Sa usa ka desisyon nga gipatik sa Pebrero 10, 2006, ang Pederal nga Administratibong Korte sa Leipzig, Alemanya, mihukom nga kinahanglang ilhon sa Estado sa Berlin ang Relihiyosong Asosasyon sa mga Saksi ni Jehova sa Alemanya ingong dili-negosyo nga korporasyon. Dinhi natapos ang 15 ka tuig nga legal nga kombate, diin sulod nianang panahona ang kaso girepaso sa daghang lainlaing mga korte sa Alemanya, apil na sa Pederal nga Konstitusyonal nga Korte. Ingong usa ka dili-negosyo nga korporasyon, ang Relihiyosong Asosasyon sa mga Saksi ni Jehova sa Alemanya may katungod nga makabaton ug mga eksemsiyon sa buhis ug ubang mga pribilehiyo nga nabatonan sa dagkong mga relihiyon sa maong nasod.

Mga Batan-ong Insek Naadik sa mga Dula sa Internet

“Nagkadaghan ang mga batan-on sa Tsina nga naadik sa mga dula sa Internet,” miingon ang South China Morning Post sa Hong Kong. Kaylap usab kini sa mga batan-on sa ubang mga nasod sa Sidlakan, sama sa Hong Kong, Japan, ug Republika sa Korea. Ang mantalaan miingon: “Ang pagkagustong magdula sa Internet nga dili manumbaling sa mga tawo sa palibot mao ang negatibong reaksiyon sa mga batan-on tungod sa pagpig-ot kanila sa katilingban gumikan sa taas kaayong pagdahom sa mga ginikanan ug sa sobrang kompetisyon nga mahimong kuwalipikado sa pag-eskuyla sa unibersidad.” Gibanabana nga mga unom ka milyong kabataan nga Insek nagkinahanglag tabang aron masumpo kini nga pagkaadik.