Mga Batan-on Nangutana . . .

Sa Unsang Paagi Ako Makatabang sa Nanginahanglan?

“Maayo unta ug inighuman nakog eskuyla, makatrabaho ko ingong elektrisyan. Gusto kong motabang pagtukod ug mga Kingdom Hall.”—Tristan, 14.

“Magdonar ko ug 20 dolyares para sa bag-ong imprentahan. Alawans nako ni, apan gusto nako ning ihatag ninyo.”—Abby, 9.

BISAN tuod ang uban moingon nga ang mga batan-on karon makikaugalingon, daghan kanila—apil na ang gikutlo sa ibabaw—ang mahunahunaon sa uban. Daghang batan-ong mga lalaki ug babaye nga mga Saksi ni Jehova ang naggamit sa ilang panahon, kusog, ug salapi sa pag-alagad sa uban. (Salmo 110:3) Tagda ang uban pang mga pananglitan.

Wala madugay human mamatay ang iyang lola, ang siyete-anyos nga si Jirah sa Australia nakadawat ug gasa nga $50 gikan sa iyang lolo. Giunsa ni Jirah ang kuwarta? Sa sunod nga tigom sa kongregasyon, kini iyang gihulog tanan sa kahon sa donasyon. Ngano? Daghan na kog dulaan, apan usa ra ang akong lola,” miingon si Jirah sa iyang inahan. “Seguradong gusto ni Lola nga idonar nako ang kuwarta kay gimahal man kaayo niya si Jehova.”

Ang singko-anyos nga si Hannah sa Tinipong Bansa gusto kaayog mga kabayo. Gusto niyang mopalit ug dulaang kabayo nga nagkantidad ug $75. Sa tinguha nga matudloan siya sa kahinungdanon sa pagdaginot, ang mga ginikanan ni Hannah mohatag kaniyag kuwarta matag karon ug unya aron ihulog sa iyang alkansiya. Wala madugay ang kuwarta ni Hannah igo nang ipalit ug dulaang kabayo.

Apan, nianang panahona gipayhag sa Bagyong Katrina ang Gulf Coast. Si Hannah nabalaka sa mga biktima, busa iyang gihatag ang iyang tanang tinigom—nga kapin sa $100—aron sa pagtabang kanila. Si Hannah misulat ngadto sa hedkuwarter sa mga Saksi ni Jehova: “Gusto nakong ihatag kaninyo kini nga kantidad tungod kay gihigugma nako si Jehova ug gusto nakong makatabang.” Kini ba nga pagkamahinatagon mamatikdan ni  Jehova? Ang Bibliya nag-ingon: “Ayaw kalimti ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.”—Hebreohanon 13:16.

Usa ka batang babaye nga ginganlag Tiffany, nga taga-Tinipong Bansa usab, misulat sa hedkuwarter sa mga Saksi ni Jehova human gihapak sa duha ka bagyo ang Florida niadtong 2004. “Gusto nako ug sa akong manghod nga si Timothy nga magdonar ug $100,” siya misulat. “Wala kaayo madaot ang among balay, apan nakita namo nga naguba ang ubang mga balay tungod sa bagyo. Gusto namong motabang, busa nagtigom mi ug kuwarta. Si Timothy gisuholan ug $10 kay mitabang siya sa paglangkat sa bungbong sa usa ka balay, ug nakatigom sab ko ug $100.” Si Tiffany 13 anyos, ug ang iyang manghod nga si Timothy 7 anyos pa lang! Unsay mahitabo kon atong unahon ang kaayohan sa uban inay ang atoa? Ang Proverbio 11:25 nag-ingon: “Ang dagayang nagabisibis sa uban dagaya usab nga pagabisibisan.”

Usa ka grupo sa mga batan-ong Saksi sa Tinipong Bansa, nga nag-edad ug 4 ngadto sa 15 anyos, nakadungog nga ang ilang mga isigkamagtutuo sa Aprika nagkinahanglag mga Kingdom Hall. Busa milihok sila. “Namaligya mig biskuwit ug sopas diha sa baligyaanan ug segunda-manong mga gamit, ug $106.54 ang among halin. Among giingnan ang mga tawo nga ang halin gamiton sa pagtukod ug mga tigomanan sa Aprika diin ang mga tawo makakat-on bahin sa Bibliya. Daghan ang namalit. Siyam ka oras ming namaligya, pero walay kaso kay para man to kang Jehova!”

 Makatabang Ka

Napamatud-an sa mga batan-on nga bag-o lang gihisgotan nga tinuod ang giingon ni Jesus: “Adunay labaw nga kalipay sa paghatag kay sa pagdawat.” (Buhat 20:35) Ikaw usab makakaplag ug kalipay sa paghatag. Sa unsang mga paagi?

Ikaw ba nakabalita nga dunay mga isigkamagtutuo nga nanginahanglan? Pananglitan, duna bay nahitabo nga kinaiyanhong katalagman? Handurawa kono kon ikaw ang mawad-ag balay, kabtangan, o mamatyan ug minahal. Si apostol Pablo misulat nga ang mga Kristohanon kinahanglang “magatan-aw, dili lamang sa personal nga interes sa mga butang labot sa [ilang] kaugalingon, kondili sa personal nga interes usab sa uban.” (Filipos 2:4) Bisag ang imong gipuy-an layo ra sa nahitaboan sa kinaiyanhong katalagman, tingali makahatag kag donasyon agig tabang sa ginahimo sa mga Saksi ni Jehova nga pagpanghatag ug hinabang. a

Adunay ubang mga paagi nga ikaw makatabang sa nanginahanglan. Pananglitan, kon ikaw Saksi ni Jehova, hunahunaa ang mga tumatambong sa imong Kingdom Hall? Aduna bay mga edaran o uban pa nga nanginahanglag tabang? Makatabang ka ba kanila sa ilang mga buluhaton sa balay? Si apostol Pablo misulat sa mga taga-Roma: “Sa inigsoong gugma batoni ang malumong pagmahal alang sa usag usa. Manguna sa pagpakitag pasidungog sa usag usa.” (Roma 12:10) Kon imong makita nga dunay nanginahanglan, ayaw na hulata nga sugoon ka pa. Buhata bisan ang ubos nga mga trabaho. Ug hinumdomi nga ang pag-alagad sa uban dunay dakong kalabotan sa pag-alagad sa Diyos. Ang Bibliya nag-ingon: “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.”—Proverbio 19:17.

Siyempre, ang kinamaayohang paagi sa pagtabang sa uban mao ang pagpaambit kanila sa imong nahibaloan bahin sa Pulong sa Diyos, ang Bibliya. Si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Ilabina karon, ang mga tawo kinahanglang makadungog sa nagaluwas-ug-kinabuhi nga mensahe sa kamatuoran gikan sa Bibliya. Busa padayona ang regular ug makugihong pagpakigbahin sa buluhatong pagsangyaw, nga masaligong ang imong paghago “dili makawang.”—1 Corinto 15:58.

Ang ubang mga artikulo sa seryeng “Mga Batan-on Nangutana . . .” sa Iningles makita sa Web site nga www.watchtower.org/ype

[Footnote]

ANGAYNG PALANDONGON

◼ Kinsay imong mahunahunaan nga nagkinahanglan ug tabang?

◼ Unsay imong ikatabang?

[Blurb sa panid 24, 25]

“Ayaw kalimti ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.”​—Hebreohanon 13:16

[Kahon/​Mga hulagway sa panid 24, 25]

NGANONG MOKAT-ON SA PAGHATAG?

“Kay nakita man nako ang akong mga ginikanan nga naggamit sa ilang panahon ug kusog sa pag-alagad kang Jehova ug sa ilang mga isigkatawo, gusto usab nako nga magkinabuhi sa samang paagi. Giingnan ko sa akong amahan: ‘Bisag unsa ka gamay ang imong nahimo alang kang Jehova, kini magpabilin hangtod sa hangtod. Si Jehova mabuhi hangtod sa hangtod, ug hinumdoman niya kini hangtod sa hangtod. Apan ang pagkinabuhi para sa imong kaugalingon walay pulos. Kon mamatay ka, ang imong gihimo mamatay usab uban nimo.’”—Kentaro, 24, Japan.

“Sa tinuod lang, dili ko ganahang motabang ug mga edaran sa ilang mga buluhaton sa balay ma-Sabado sa hapon. Gusto kong maglipaylipay uban sa akong mga higala. Apan, sa dihang migahin gayod akog panahon uban sa mga edaran, nalipay kaayo ko. Akong nasayran nga gibati pod diay nila ang akong gibati sa dihang batan-on pa sila. Nakapalihok ni nako sa pagtabang kanila.”—John, 27, Inglaterra.

“Sa batabata pa ko, moapil ko pagpanghinlo sa Kingdom Hall ug sa daghang uban pang kalihokan. Gusto sab kong moserbisyo sa uban diha sa kongregasyon. Sa dihang motabang ka sa uban, imong makita nga malipay sila. Pananglitan, dihay higayon nga ako ug akong mga kauban nangadto sa apartment sa usa ka edarang sister aron taoran ug wallpaper ang iyang bungbong. Nalipay kaayo siya! Sa dihang ikaw dunay himoong makapalipay sa usa ka tawo, ikaw malipay usab.”​—Hermann, 23, Pransiya.

[Hulagway sa panid 24]

Daghang batan-on modonar ug salapi sa pagtabang sa mga biktima sa kalamidad