Gikan sa Among mga Magbabasa

Bag-ong Kahan-ayan sa Pagmata! Akong natapos kagabii ang pagbasa sa Enero 2006 nga gula sa Pagmata! Nagustohan ko gayod ang bag-ong kahan-ayan niini! Ang Pagmata! karon angayng hatagan ug mas maampingong pagtagad, nga may disenyo nga makapahunahuna sa magbabasa. Diha sa tibuok magasin, akong nakita ang paggiya ni Jehova sa pagpalambo sa atong espirituwal nga pagtubo.

B. N., Canada

Ako nag-edad ug 16 anyos. Ang bag-ong mga bahin sa Pagmata! dakog ikatabang kanato sa pagtuon sa Bibliya. Ang pipila ka artikulo adunay sunodsunod nga mga pangutana aron tabangan ang magbabasa sa pagpamalandong sa iyang gibasa. Malingaw ako nga gamiton ang Pagmata! sa akong mga asaynment sa tunghaan. Naglaom ako nga magpadayon kamo sa pagpatik niining nindot ug mapuslanong impormasyon alang kanamo.

S. N., Namibia

Napalig-on sa Akong Pagtuo—Nagkinabuhing May ALS (Enero 2006) Human nako basaha ang kasinatian ni Jason Stuart, ang tanan nakong problema daw dili na kaayo malisod. Akong nasabtan nga si Jehova nagapabili sa pag-alagad nga atong gihatag kaniya sumala sa atong mga kahimtang. Nakadayeg ako sa asawa ni Jason tungod sa iyang pagsakripisyo ug pagsalig kang Jehova. Kini nga kasinatian magpabilin kanunay sa akong kasingkasing ug motabang kanako aron sagubangon ang mga suliran nga motungha sa umaabot.

C.R.S., Peru

Nakahilak ako human mabasa ang kasinatian ni Jason, dili lang tungod kay natandog ako sa iyang mapait nga kasinatian kondili tungod usab kay, ingong usa sa mga Saksi ni Jehova, mapasigarbohon kaayo ako nga ako adunay espirituwal nga igsoon nga sama kaniya. Gikan sa artikulo, akong nakita ang kahinungdanon sa abanteng pagpangandam alang sa mga pagsulay, tungod kay “ang panahon ug ang wala damhang panghitabo” mahimong modangat kang bisan kinsa kanato.—Ecclesiastes 9:11.

T. A., Hungaria

Namatay ang akong inahan tungod sa ALS. Busa natandog gayod ako sa kasinatian ni Jason. Ang iyang panig-ingnan nagdasig kanako nga padayong himoon ang akong maarangan diha sa akong ministeryo. Ako nag-ampo nga si Jehova padayong maglig-on niining igsoona ug sa iyang asawa.

L.Z.G., Paraguay

Ang paggugol ni Jason ug panahon sa personal nga pagtuon sa dihang himsog pa siya, ug busa aduna siyay espirituwal nga pondo nga iyang naggamit sa dihang iya kining gikinahanglan, nakapahunahuna kanako. Kini nakapalig-on sa akong determinasyon nga magmasiboton pa sa akong personal nga pagtuon sa Bibliya.

Y. M., Japan

Mga Batan-on Nangutana—Nganong Ako Mang Pasakitan ang Akong Kaugalingon? (Enero 2006) Ingong batan-on nakigbisog ako sa dili paggamit ug droga ug alkohol, apan ang kinalisorang problema nga akong gisagubang mao ang pagpasakit sa akong kaugalingon. Kini nahimong kanunayng pagpakigbisog, apan ang mga artikulo nga sama niini naghatag kanakog kalig-on sa paglahutay. Mapasalamaton gayod ako kaayo.

E. C., Tinipong Bansa

Ang pagpasakit sa kaugalingon nahimo nang bahin sa akong kinabuhi sukad pa sa akong pagkatin-edyer. Ako 56 anyos na karon. Giundangan nako ang batasan sa pagpasakit sa kaugalingon upat ka tuig kanhi, apan usahay bug-at kaayo ang akong mga problema nga ako matental sa pagbuhat niini pag-usab. Kining artikuloha midulot gayod sa kahiladman sa akong kasingkasing. Kini motabang sa mga tawong sama nako nga makabaton pag-usab ug kaisog sa pag-atubang sa adlaw-adlaw nga kinabuhi.

Ngalan wala ibutyag, Netherlands

 Ako nag-edad ug 17 anyos ug buot nakong magpasalamat kaninyo niining artikuloha. Ang pagpasakit sa kaugalingon mao ang akong problema. Di pa dugay, akong gisamaran pag-usab ang akong kaugalingon. Human niana, akong giduol ang akong inahan ug gihangyo nga siya moampo uban nako. Bisan pa niining problemaha, akong nasayran nga si Jehova aduna gayoy kahingawa kanako. Dako kaayong tabang ang inyong artikulo, ug ako mapasalamaton sa Diyos tungod niini!

N. M., Czech Republic

“Dili kini katuohan!” Mao kanay akong reaksiyon sa pagkakita niining artikuloha. Ako nag-edad ug 18 anyos. Tigsakit ako sa kaugalingon. Ang kasakit mitabang kanako sa pagbuntog sa akong mga emosyon. Sagad buot nakong pasakitan ang akong kaugalingon, ug wala ako masayod kon unsaon pagsanta kining mga pagbatia. Dili ako makatuo sa pagkakita niining artikuloha. Mitulo ang akong mga luha, ug ako nagpasalamat kang Jehova diha sa pag-ampo. Sa organisasyon ni Jehova lamang posibleng makaplagan ang maong kahupayan!

A. P., Rusya

Sa edad nga 14, akong gisugdan ang pagpasakit sa kaugalingon aron makunhoran ang akong emosyonal nga kasakit. Naospital pa gani ako makausa tungod niini. Ang pagbaton ug talaadlawan dakog gikatabang kanako aron makontrolar ang kiling sa pagbuhat niini. Dugang pa, kon matental ako sa pagpasakit-sa-kaugalingon, motawag ako sa usa ka masinabotong higala. Ang pag-ampo ilabinang nakatabang. Ug kon mobati akong dili takos nga moampo, ubanan ako sa akong mga higala ug sa Kristohanong mga ansiyano sa pag-ampo. Kini malisod nga pakigbisog, apan nakakat-on ako kon unsaon sa pagsagubang niini ug sa pagdawat sa tanang tabang nga mabatonan aron dili na nako pasakitan ang akong kaugalingon.

N. W., Alemanya

Ang larawan diha sa unang panid niining artikuloha naghulagway sa usa ka babaye nga naglarot sa iyang buhok, ug ang artikulo naghisgot kang “Sara,” nga naglarot sa iyang buhok aron silotan ang iyang kaugalingon. Ang akong anak nga babaye adunay sakit nga nailhang trichotillomania, usa ka kahimtang diin ang usa maglarot sa iyang buhok. Kining sakita naglangkit sa obsessive-compulsive disorder. Kini resulta sa dili-makontrolar nga aghat sa pagpasakit, dili tungod kay gitinguha kini sa usa. Walay koneksiyon ang paglarot sa buhok sa paglaslas.

M. H., Tinipong Bansa

Ang “Pagmata!” nagtubag: Ang terminong trichotillomania, nga unang nadungog niadtong ika-19ng siglo, nagtumong sa dili-mapugngang kiling sa paglarot sa buhok. Ingon sa maayong pagkahulagway diha sa magasin, ang paglarot sa buhok maoy paagi sa pipila sa pagpasakit sa kaugalingon. Apan, wala kini nagpasabot nga ang tanang tiglarot sa buhok mao ang matang sa tigsakit-sa-kaugalingon nga gihubit sa among artikulo. Ingon sa gihubit sa magbabasa nga gihisgotan sa ibabaw, usahay kining batasana nalangkit pag-ayo sa obsessive-compulsive disorder.

Sa bisan unsang kaso, ang pipila ka eksperto miingon nga angayng mahibaloan ang hinungdan sa trichotillomania aron ang pamaagi sa pagtambal ikapasibo sa mga panginahanglan sa matag indibiduwal. Busa, makaayo tingali nga kadtong aduna niining sakita mokonsulta sa mga doktor aron nga madayagnos ug matambalan.

Unsay Imong Tubag? (Enero 2006) Nalipay kaayo ako niining bag-ong artikulo! Kami nagatudlo sa among mga apo, ug dako kinig ikatabang sa ilang pagbasa sa Bibliya adlaw-adlaw ug sa mga artikulo sa Pagmata! nga ilang ginabasa ingon nga bahin sa ilang mga asaynment sa eskuylahan. Salamat sa inyong dakong kahingawa sa mga batan-on.

B. E., Tinipong Bansa

Kining bahina sa artikulo dili sayon, apan malipay gayod ako sa dihang makaplagan nako ang tubag! Kagabii akong gigugol ang tibuok gabii sa pagbasa niining maong panid; kini makaiikag kaayo! Inigdako nako, gusto nakong motabang sa paghimo niining magasina aron ang uban makakat-on bahin kang Jehova!

D. H., Tinipong Bansa

Ako nag-edad ug otso anyos. Gigamit namo kining maong panid sa among pamilyahanong pagtuon. Malingaw gayod kami sa among pagpanukiduki. Malisod ang bahin nga “Kinsa Ako?,” apan nagustohan namo kini. Padayona ang pagpatik niining nindot nga mga artikulo.

C. W., Tinipong Bansa