Kon Nganong Dili Ako Magsaulog ug Kalagkalag

SA MIAGING TUIG, samtang puliki ang iyang mga silingan sa pagpangandam alang sa Kalagkalag—diha sa pipila ka kayutaan, kini maoy usa ka popular nga tinuig nga saulog nga nalangkit pag-ayo sa espiritismo—ang 14-anyos nga si Michael sa Canada naghunahuna ug laing butang. Diha sa mubong sinulat nga iyang gihimo alang sa eskuylahan, si Michael nag-ingon:

‘Unyang gabii mao ang bisperas sa Kalagkalag. Samtang nanambo ako sa bentana, akong nakita nga napunog dekorasyon sa mga lapida ug mga kalabera ang tugkaran sa akong mga silingan ug ang hayag nga mga lampara nagdan-ag sa kordiso sa ilang mga bentana. a Ang mga ginikanan nag-areglar sa mga costume sa ilang mga anak; ang mga bata nangandoy nga makakuhag daghang kendi ugma.

‘Ang akong pamilya lahi. Ang among tugkaran walay dekorasyon, ug walay hayag nga lampara sa among mga bentana. Ang mga tawo mangutana kon nganong dili ko magsaulog ug Kalagkalag. Sa panguna, ang mga Saksi ni Jehova wala magsaulog niini tungod sa gigikanan niini. b

‘Sa katingalahan, ganahan ko panahon sa Kalagkalag. “Ngano?” tingali mangutana ka. Tungod kay kini mopalihok kanako nga mamalandong. Kini makapahunahuna kanako sa hinungdan sa akong pagdumili sa pagbuhat sa pipila ka mga butang. Angayng tubagon sa matag usa kon hinungdanon ba ang gigikanan sa usa ka kostumbre. Alang kanako hinungdanon kini. Pananglitan, ang kadaghanan tingali maglagot kon ang ilang mga silingan magsapot ug sama sa uniporme sa Nazi. Ngano? Tungod sa gigikanan sa mga uniporme sa Nazi ug sa gihawasan niini—mga prinsipyo nga gidumtan sa daghang tawo. Akong gidumtan ang mga prinsipyo nga naghawas sa yawa, daotang mga espiritu, ug mga ungo, ug dili ko buot nga makig-uban nila. Maayo kon pamalandongon nato ang atong himoong mga pagpili ug ang mga hinungdan sa paghimo niini ug mohimog mga pagpili nga gipasukad sa prinsipyo dili sa kon unsay popular. Kanay hinungdan nganong nagustohan nako kining maong panahon sa tuig. Gipasigarbo ko ang pagkahimong lahi ug ang pagpabilin sa akong gituohan.’

[Mga footnote]