Pagpaniid sa Kalibotan

◼ “Ang kalambigitan sa kapintasan nga makita diha sa media ug sa pagkaagresibo [sa mga batan-on] sa tinuod nga kinabuhi susama ra kaayo sa kalambigitan sa pagpanigarilyo ug sa kanser sa baga.”​—THE MEDICAL JOURNAL OF AUSTRALIA.

◼ Nakaplagan ang ebidensiya nga nagpakita nga ang mga kabog nga tigkaog prutas, nga ginakaon sa pipila ka bahin sa Aprika, “mahimo nga maoy kinaiyanhong puy-anan sa virus nga Ebola.”​—MACLEANS, CANADA.

◼ Gipadayag sa impormasyon gikan sa buhatan sa pangulong abogado sa Mexico nga sulod sa miaging walo ka tuig, halos 130,000 ka bata nianang nasora ang gikidnap aron ibaligya, pugson sa pagpakigsekso o pagpanarbaho, o aron kuhaag mga organo nga ibaligya.​—MILENIO, MEXICO.

Gipriso Sulod sa 12 ka Tuig—Ngano?

Tulo ka Saksi ni Jehova ang gipriso sa Sawa, Eritrea, Sidlakang Aprika, 12 ka tuig na kanhi. Walay gipasaka nga sumbong batok kanila, ug wala pa sila husaya. Dili sila mahimong duawon, bisan sa mga membro sa ilang pamilya. Ang hinungdan? Midumili sila sa pagpakigbahin sa militaryong pag-alagad. Wala ilha sa balaod sa Eritrea ang pagsupak gumikan sa tanlag. Sa dihang gidakop ang mga batan-on, sila gipriso sa kampo sa militar, diin kanunay silang gibunalan pag-ayo ug gisakit sa daghang paagi.

Hulga ba ang Internet sa Ihalas nga mga Mananap?

“Ang Internet ba makapadali sa pagkapuo sa mga elepante sa Aprika?” misukna ang The New York Times. Ang pipila ka tigpaluyo sa kaayohan sa mga mananap miuyon niini ug miingong nameligro usab ang daghang uban pang espisye. Ang ilegal nga negosyo diha sa Web site gikaingong mikaylap samtang miuswag mismo ang Internet. Ang mga pagsusi sa Ingles nga mga Web site sulod sa tulo ka bulan nakakaplag ug “kapig 6,000 ka ilegal nga mga produktong gama sa ihalas nga mga mananap nga ginabaligya,” nga naglakip sa mga sisik, mga eskultura nga gama sa bukog sa elepante, ug aduna pa ganiy itom nga mga buhing leopardo.

Kinaiyanhong Sentral nga Sistema sa Pagpainit

“Ang sentral nga sistema sa pagpainit nga gisugnoran ug samag-bato nga mga liso sa olibo mabatonan na karon,” nagtaho ang mantalaang Kinatsila nga El País. Kining maong tinubdan sa enerhiya nagtaganag kainit ug init nga tubig sa labing menos 300 ka balay sa Madrid. Ingong sugnod, ang liso sa olibo barato nga mas ubos ug 60 porsiyento kay sa aseite ug 20 porsiyento sa karbon. Kini dili makadaot sa kalikopan tungod kay ang gidaghanon sa carbon dioxide nga mogawas panahon sa pagsunog niini parehas ra sa dihang kini kinaiyanhong madugta. Ang dugang pang kaayohan mao nga dali ra kining mabatonan. Ang samag-bato nga mga liso mao ang mahibilin human mapuga ang lana gikan sa mga olibo, ug giila ang Espanya ingong nanguna sa produksiyon sa lana sa olibo sa tibuok kalibotan.

Upat ka Libo ka Tuig nga Pansit

Ang mga siyentipiko miingon nga ilang nakalotan ang “kinakaraanan nga nahibaloang pansit sa kalibotan,” nagtaho ang The New York Times. Kining nigpis, dalag nga pansit adunay 20 ka pulgada ang gitas-on ug hinimo gikan sa dawa, usa ka tanom nga lumad sa Tsina. Nakaplagan kini sulod sa kulonong panaksan nga selyado nga nalubong sa napulo-ka-piye ka baga nga binanlas duol sa Suba sa Huang sa amihanan-kasadpang Tsina. Ang dapit posibleng gidaot sa linog ug sa “malaglagong baha” mga 4,000 ka tuig kanhi, sumala sa mantalaang Nature. Maylabot sa gilantugian kon kaha ang pansit naggikan ba sa Italya, sa Tungang Sidlakan, o kaha sa Oriente, sumala sa magasing Times, ang usa sa nakadiskobre nga si Houyuan Lu sa Chinese Academy of Sciences miangkon: “Kini nga pagtuon nagpamatuod nga ang kinaunahang produksiyon sa pansit nagsugod sa Tsina.”