Ang Hunahuna sa Bibliya

Husto ba ang Pagpakigsekso Bisag Wala pa Maminyo Basta Nagkahigugmaay Lang?

SA USA ka surbi halos 90 porsiyento sa mga tin-edyer nga giinterbiyo ang nagtuo nga dili sayop ang pagpakigsekso bisag wala pa maminyo basta nagkahigugmaay lang sila sa usag usa. Kini nga panghunahuna gibanaag gayod ug subsob nga gikonsentir sa media. Ang telebisyon ug mga pelikula kanunayng maghulagway sa pagpakigsekso ingong normal tungod sa romantikong pagminahalay.

Siyempre, kadtong gustong pahimut-an ang Diyos dili gayod magpagiya sa kalibotan, kay sila nahibalo nga kini nagbanaag sa panghunahuna sa magmamando niini, ang Yawa. (1 Juan 5:19) Sila mabinantayon usab nga dili magamhan lamang sa ilang mga pagbati, kay sila nahibalo nga “ang kasingkasing labaw nga malimbongon kay sa bisan unsa pa ug desperado.” (Jeremias 17:9) Hinunoa, kadtong tinuod nga maalamon magpagiya sa Maglalalang ug sa iyang inspiradong Pulong.—Proverbio 3:5, 6; 2 Timoteo 3:16.

Ang Pagpakigsekso Maoy Gasa sa Diyos

“Ang matag maayong gasa ug matag hingpit nga regalo naggikan sa itaas, kay kini gikan sa Amahan sa langitnong mga kahayag,” nag-ingon ang Santiago 1:17. Ang seksuwal nga relasyon sulod sa kaminyoon maoy usa sa maong bililhong mga gasa. (Ruth 1:9; 1 Corinto 7:2, 7) Kini magpaarang sa mga tawo sa pagsanay, ug kini makapasuod sa bana ug asawa sa pisikal ug emosyonal diha sa usa ka malumo ug makapatagbaw kaayo nga paagi. “Pagmaya uban sa asawa sa imong pagkabatan-on,” misulat ang karaang Haring Solomon. “Tugoting ang iyang mga dughan magtagbaw kanimo sa kalipay sa tanang panahon.”—Proverbio 5:18, 19.

Dayag nga buot ni Jehova nga kita makabaton ug kaayohan ug malipay sa iyang mga gasa. Tungod niana, iya usab kitang gihatagan ug maayo kaayong mga balaod ug mga prinsipyo nga pagasundon. (Salmo 19:7, 8) Si Jehova mao “ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isaias 48:17) Hikawan ba kita sa atong langitnong Amahan—ang personipikasyon mismo sa gugma—sa usa ka butang nga tinuod nga mapuslanon?—Salmo 34:10; 37:4; 84:11; 1 John 4:8.

Ang Pagpakigsekso nga Wala pa Maminyo Dili Mahigugmaon

Sa dihang ang lalaki ug babaye mahiusa sa kaminyoon, sila mahimong “usa ka unod,” ingnon ta. Kon magsekso ang duha ka dili-minyong mga tawo, nga gitawag usab ug pakighilawas, sila usab mahimong “usa ka lawas”—apan dili hinlo sa mga mata sa Diyos. a Dugang pa, ang maong panag-uban dili mahigugmaon. Sa unsang paagi?—Marcos 10:7-9; 1 Corinto 6:9, 10, 16.

Una, ang pakighilawas maoy pagpakigsekso nga walay tinuod nga pag-inunongay. Ug gawas nga mawad-an  kag pagtahod sa kaugalingon, kini mahimong mosangpot sa sakit, wala-kagustohing pagsabak, ug kagul-anan. Labaw sa tanan, kini naglapas sa matarong nga mga sukdanan sa Diyos. Busa, ang pakighilawas nagpakita lamang ug diyutayng pagtagad o wala gayoy pagtagad sa presente ug umaabot nga kaayohan ug kalipay sa laing tawo.

Alang sa usa ka Kristohanon, ang pakighilawas maoy paglapas usab sa katungod sa iyang espirituwal nga igsoon. (1 Tesalonica 4:3-6) Pananglitan, ang nag-angkong mga alagad sa Diyos nga makigsekso sa gawas sa kaminyoon magdalag kahugawan sa Kristohanong kongregasyon. (Hebreohanon 12:15, 16) Dugang pa, ilang gihikawan ang usa nga ilang gipakighilawasan ug hinlong moral nga baroganan ug, kon siya tagsaanon, sa kahigayonan nga maminyo sa umaabot nga hinlo sa moral. Ilang gihugawan usab ang maayong reputasyon sa ilang mga pamilya, ug nakasala sa pamilya sa ilang gikarelasyon. Sa kataposan, sila wala magtahod sa Diyos, nga ilang gipasakitan tungod sa ilang paglapas sa iyang matarong nga mga balaod ug mga prinsipyo. (Salmo 78:40, 41) Tungod niana, ‘silotan’ ni Jehova ang dili-mahinulsolong mga tawo tungod sa tanang daotang mga buhat nga ilang nahimo. (1 Tesalonica 4:6) Nan, ikatingala ba nga ang Bibliya nagsulti kanato sa ‘pagkalagiw gikan sa pakighilawas’?—1 Corinto 6:18.

Aduna ka na bay trato ug nagplano nang magminyo? Nan nganong dili ninyo gamiton ang inyong panagtratohay aron malig-on ang inyong pagsalig ug pagtahod sa usag usa? Hunahunaa kini: Sa unsang paagi bug-os nga makasalig ang babaye sa usa ka lalaki nga wala magpakitag pagpugong sa kaugalingon? Ug sa unsang paagi mahalon ug pasidunggan sa usa ka lalaki ang usa ka babaye nga wala manumbaling sa balaod sa Diyos aron lang tagbawon ang iyang romantikong mga pagbati o aron lang pahimut-an ang lalaki?

Hinumdomi usab nga anihon niadtong nagsalikway sa mahigugmaong mga sukdanan sa Diyos ang ilang gipugas. (Galacia 6:7) “Siya nga nagapakighilawas nagapakasala batok sa iyang kaugalingong lawas,” nag-ingon ang Bibliya. (1 Corinto 6:18; Proverbio 7:5-27) Tinuod, kon ang magtiayon nga nakahimog pakighilawas sa wala pa maminyo maghinulsol ug maningkamot gayod nga mapasig-uli ang ilang relasyon uban sa Diyos, ug magpalig-on sa ilang pagsalig sa usag usa, ang negatibong mga pagbati mahimong mahanaw ra sa kadugayan. Bisan pa niana, ang ilang nangaging mga panggawi kasagarang makahasol sa tanlag. Usa ka batan-ong magtiayon nagbasol gayod sa ilang gihimong pakighilawas kanhi. ‘Ang amo kahang mga panaglalis isip magtiayon maoy resulta sa dili-hinlong sinugdanan sa among relasyon?’ maoy isukna usahay sa bana sa iyang kaugalingon.

Ang Matuod nga Gugma Dili Hakog

Bisan tuod kini mahimong giduyogan ug romantikong mga pagbati, ang tinuod nga gugma “dili bastos” o “mangita sa kaugalingong kaayohan niini.” (1 Corinto 13:4, 5) Hinunoa, kini magpalambo sa kaayohan ug dumalayong kalipay sa laing tawo. Kanang gugmaha magtukmod sa lalaki ug babaye sa pagpasidungog sa usag usa ug sa paghimo sa seksuwal nga mga relasyon diha sa husto, hinatag-sa-Diyos nga luna niini—ang higdaanan sa kaminyoon.—Hebreohanon 13:4.

Ang mga pagbati sa pagsalig ug kasegurohan nga moresulta ug malipayon gayod nga kaminyoon maoy ilabinang hinungdanon sa dihang makabaton na silag mga anak, tungod kay katuyoan sa Diyos nga ang mga bata motubo diha sa usa ka mahigugmaon, lig-on, ug luwas nga palibot. (Efeso 6:1-4) Diha lamang sa kaminyoon nga ang duha ka tawo tinuod nga mag-inunongay sa usag usa. Sa ilang kasingkasing, ug subsob sa mga pulong usab, sila manaad sa pag-atiman ug pagpaluyo sa usag usa sa kalipay ug kasakit sa tibuok nilang kinabuhi.—Roma 7:2, 3.

Ang seksuwal nga mga relasyon tali sa bana ug asawa makapalig-on sa ilang panagtiayon. Sa usa ka malipayong kaminyoon, makaplagan usab sa mga magtiayon nga ang seksuwal nga relasyon mas makapalipay ug makahuloganon—ug dili makapahuyang sa kaminyoon, makahasol sa tanlag, o makasupak sa Maglalalang.

[Footnote]

NAHIBULONG KA BA?

◼ Unsay panghunahuna sa Diyos bahin sa pagpakigsekso bisag wala pa maminyo?—1 Corinto 6:9, 10.

◼ Nganong makadaot ang pagpakighilawas?—1 Corinto 6:18.

◼ Sa unsang paagi ikapakita sa duha ka tawo nga nagkahigugmaay ang ilang tinuod nga gugma alang sa usag usa?—1 Corinto 13:4, 5.