May Kahingawa Gayod ang Diyos!

ANG paagi sa Diyos sa pagdumala sa rebelyon nga nagsugod sa Eden nagpakita sa iyang dakong gugma alang sa matag usa kanato ug sa iyang kahingawa alang sa atong kaugmaon. Palihog tagda ang mosunod nga pamatuod nga ang Diyos tinuod nga nahingawa kanato, ug basaha ang gisitar nga mga teksto diha sa imong Bibliya.

● Iyang gitagana ang yuta, nga puno sa kinaiyanhong katahom, makaiikag nga mga mananap, ug mabungahong yuta.—Buhat 14:17; Roma 1:20.

● Iyang gihatag kanato ang usa ka kahibulongang lawas nga makapaarang kanato sa pagkalipay sa adlaw-adlaw nga mga kasinatian, sama sa pagtilaw ug lamiang pagkaon, pagtan-aw sa pagsalop sa adlaw, pagkadungog sa katawa sa usa ka bata, ug pagkabatyag sa malumong paghikap sa usa ka minahal.—Salmo 139:14.

● Iyang gitagana kanato ang maalamong giya nga makatabang kanato sa pagsagubang sa mga problema ug mga kapit-os.—Salmo 19:7, 8; 119:105; Isaias 48:17, 18.

● Siya naghatag kanato ug kahibulongang paglaom, lakip na ang paglaom nga mabuhi sa usa ka paraisong yuta ug pagkakita sa pagkabanhaw sa atong mga minahal nga nangamatay na.—Lucas 23:43; Juan 5:28, 29.

● Iyang gipadala ang iyang bugtong Anak aron mamatay alang kanato aron nga atong mabatonan ang paglaom nga mabuhi sa walay kataposan.—Juan 3:16.

● Iyang gitukod ang Mesiyanikong Gingharian sa langit ug gihatag kanato ang daghang pamatuod nga ang maong Gingharian sa dili madugay bug-os na nga magmando sa yuta.—Isaias 9:6, 7; Mateo 24:3, 4, 7; Pinadayag 11:15; 12:10.

● Gidapit niya kita sa pagduol kaniya pinaagi sa pag-ampo, sa pagbubo sa atong kasingkasing kaniya, ug kon buhaton nato kana siya mamati gayod.—Salmo 62:8; 1 Juan 5:14, 15.

● Sublisubli niyang gipasaligan ang mga tawo sa iyang halalom nga gugma ug kahingawa.—1 Juan 4:9, 10, 19.