Nganong Gitugotan sa Diyos ang Pag-antos?

USAHAY ang usa ka tawo nga mosuknag “Ngano?” nangitag kahupayan ug mga tubag, kay sa dihang isukna ang maong pangutana gumikan sa grabeng pag-antos, gikinahanglan gayod ang kahupayan. Nagtanyag ba ang Bibliya ug ingon niana nga kahupayan? Tagda ang tulo ka hinungdanong mga kamatuoran sa Bibliya nga nalangkit niini.

Una, dili sayop nga mangutana kon nganong gitugotan sa Diyos ang pag-antos. Ang ubang mga tawo nabalaka nga ang pagsukna nianang pangutanaha nagpasabot ug kakulang sa pagtuo sa Diyos o kawalay-pagtahod kaniya. Sa kasukwahi, kon sinsero nimong gisukna kining pangutanaha, wala ka mag-inusara. Ang matinumanong manalagna nga si Habakuk nangutana sa Diyos: “Nganong gipakita mo kanako ang grabeng inhustisya? Nganong gitugotan man nimo ang kapintasan, pagkamalinapason, krimen, ug kabangis nga mokaylap bisan asa?” (Habakuk 1:3, Contemporary English Version) Wala badlonga ni Jehova nga Diyos si Habakuk. Hinunoa, gipasulat niya ang mga pangutana nianang matinumanong tawo aron mabasa natong tanan.—Roma 15:4.

Ikaduha, hinungdanong masabtan nga ang Diyos may simpatiya sa imong kalisod. Siya dili halayo ug misteryoso; siya “mahigugmaon sa hustisya,” ug iyang gidumtan ang pagkadaotan ug ang pag-antos nga gipahinabo niana. (Salmo 37:28; Proverbio 6:16-19) Sa mga adlaw ni Noe, ang Diyos “nasakitan diha sa iyang kasingkasing” tungod sa kapintasan nga mikaylap sa yuta. (Genesis 6:5, 6) Ang Diyos wala mausab; mao gihapon kana ang iyang gibati sa nagakahitabo karon.—Malaquias 3:6.

Ikatulo, ang Diyos dili gayod mao ang tuboran sa pagkadaotan. Giklaro kini pag-ayo sa Bibliya. Kadtong nag-ingon nga ang mga butang sama sa pagbuno ug terorismo gipahinabo sa Diyos, nagapasipala kaniya. Matikdi kon unsay giingon sa Job 34:10: “Halayo ra sa matuod nga Diyos nga mobuhat sa pagkadaotan, ug sa Labing Gamhanan nga mobuhat sa kawalay-hustisya!” Sa samang paagi, ang Santiago 1:13 nag-ingon: “Sa dihang pagasulayon, dili siya angay moingon: ‘Ako gisulayan sa Diyos.’ Kay ang Diyos dili masulayan sa daotang mga butang ni siya mosulay kang bisan kinsa.” Busa kon ikaw nag-antos sa pagkadaotan, makaseguro ka nga ang Diyos dili mao ang nagpahinabo niana.

Kinsay Nagmando sa Kalibotan?

Bisan sa nahisgotan na, nagpabilin gihapon ang pangutana, Kon ang Diyos mahigugmaon, matul-id, ug gamhanan, nganong gilibotan man kita sa pagkadaotan? Kinahanglang mahusay una ang usa ka komon nga sayop nga hunahuna. Daghang tawo ang naghunahuna nga ang Labing Gamhanan mao ang magmamando niining kalibotana, ang usa nga direktang nagkontrolar sa tanang butang. “Walay bisan usa ka atomo o molekula sa uniberso nga  wala niya kontrolaha,” miingon ang presidente sa usa ka teolohikal nga seminaryo. Gitudlo ba gayod kana sa Bibliya?

Wala gayod. Daghan ang matingala sa pagkahibalo kon unsa gayoy giingon sa Bibliya bahin sa kon kinsay nagmando sa kalibotan. Pananglitan, ang 1 Juan 5:19 nag-ingon: “Ang tibuok kalibotan nailalom sa gahom sa usa nga daotan.” Kinsa kining usa nga daotan? Si Jesu-Kristo nagpaila kaniya ingong si Satanas nga Yawa, nga iyang gitawag ug “magmamando niining kalibotana.” (Juan 14:30) Karon, dili ba gipakita niana kon nganong kaylap ang pagkadaotan sa kalibotan? Si Satanas mabangis, malimbongon, ug madumtanon—mga batasan nga maoy hinungdan sa daghang pag-antos nga nasinati sa mga tawo. Apan, nganong gitugotan man sa Diyos si Satanas nga magmando?

Usa ka Isyu nga Gipatungha Didto sa Eden

Unsay bation sa usa ka mahigugmaon ug takos nga ginikanan kon akusahan siya atubangan sa mga tawo nga siya namakak sa iyang mga anak, nag-abuso sa iyang awtoridad ibabaw kanila, ug naghikaw sa maayong mga butang gikan kanila? Ipanghimakak ba niya kanang mapasipalahong mga akusasyon pinaagi sa pagdagmal sa nag-akusar kaniya? Siyempre dili! Gani, pinaagi sa paglihok nga sama niana, basin motuo na hinuon ang mga tawo sa mga akusasyon.

Kining ilustrasyona motabang sa pagpatin-aw sa paagi ni Jehova nga Diyos sa pagdumala sa usa ka hagit nga gipatungha batok kaniya sa sinugdanan sa kasaysayan sa tawo didto sa lugar nga gitawag ug Eden. Didto gipahibalo sa Diyos ngadto sa unang magtiayon, si Adan ug Eva, ang maanindot nga proyekto alang sa iyang yutan-ong mga anak. Ilang pun-on ang yuta, gamhan kini, ug himoon kini nga usa ka tibuok-globong paraiso. (Genesis 1:28) Dugang pa, gatosan ka milyong espiritung mga anak sa Diyos ang interesado kaayo niining makapahinam nga proyekto.—Job 38:4, 7; Daniel 7:10.

Tungod kay siya usa ka manggihatagon nga Diyos, si Jehova naghatag kang Adan ug Eva ug usa ka matahom nga tanamang puy-anan uban ang tanang lamiang mga prutas. Usa lamang ka kahoy ang gidili kanila—ang “kahoy sa kahibalo sa maayo ug sa daotan.” Pinaagi sa dili pagkaon gikan niining maong kahoy, ikapasundayag ni Adan ug Eva ang ilang bug-os nga pagsalig sa ilang Amahan, nga nag-ila nga siya may katungod sa paghukom kon unsay maayo ug daotan alang sa iyang mga anak.—Genesis 2:16, 17.

Apan, ikasubo nga usa sa espiritung mga anak sa Diyos, nga gitukmod sa tinguha nga simbahon usab, miingon kang Eva nga kon mokaon siya sa gidiling bunga, siya dili mamatay. (Genesis 2:17; 3:1-5) Busa, kining daotang manulonda, si Satanas, dayag nga misupak sa Diyos, nga sa pagkatinuod nagtawag kaniyang bakakon! Giakusar pa ni Satanas ang Diyos nga naghikaw ug hinungdanong kahibalo gikan kang Adan ug Eva. Gipasumbingay ni Satanas nga ang mga tawo kinahanglang makahimo sa paghukom mismo kon unsay maayo ug daotan. Sa yanong pagkasulti, giakusar ni Satanas ang Diyos ingong dili angayang Magmamando ug Amahan ug nagpasumbingay nga siya, si Satanas, mas takos pa niana.

Pinaagi nianang malipatlipaton ug mapanamastamasong mga bakak, ang manulonda naghimo sa iyang kaugalingon nga Satanas nga Yawa. Kining mga ngalana nagkahulogang “Magsusupak” ug “Tigpasipala.” Unsay gibuhat ni Adan ug Eva? Sila midapig kang Satanas ug mitalikod sa Diyos.—Genesis 3:6.

Mahimo untang laglagon dayon ni Jehova ang mga rebelde. Apan, sumala sa gihisgotan sa among ilustrasyon, ang maong mga isyu dili mahusay pinaagi sa mapintas nga pagpanimalos. Hinumdomi usab nga sa dihang gihagit ni Satanas ang Diyos, milyonmilyong manulonda ang namati. Gani, ubay-ubay, apan wala isulti kon pila, ang miduyog sa ulahi kang Satanas sa iyang pagrebelde, nga naghimo sa ilang kaugalingon nga mga demonyo.—Marcos 1:34; 2 Pedro 2:4; Judas 6.

Nganong Wala Mangilabot ang Diyos?

Pinaagi sa paghaylo kang Adan ug Eva nga magmaindependente sa ilang Maglalalang, sa pagkatinuod, si Satanas nagtukod ug pamilya nga dili tinuorayng independente kondili nailalom sa iyang awtoridad. Nahibaloan man nila o wala nga sila naimpluwensiyahan sa ilang “amahan,” ang Yawa, kining pamilyaha mipili sa kaugalingong mga tumong  ug mga sukdanan sa panggawi. (Juan 8:44) Apan ang mao bang paagi sa pagkinabuhi maghatag kanila ug tinuod nga kagawasan ug malungtarong kalipay? Nahibalo gayod si Jehova nga dili kana maghatag kanilag tinuod nga kagawasan ug malungtarong kalipay. Bisan pa niana, iyang gitugotan ang mga rebelde nga mopadayon sa ilang independenteng dalan, kay niining paagiha lamang nga ang mga isyu nga gipatungha sa Eden bug-os nga mahusay.

Sulod sa kapin sa 6,000 ka tuig na karon, ang katawhan nagtukod ug tibuok-kalibotang sistema sa mga butang, nga misulay sa tanang matang sa mga pagmando ug mga lagda sa panggawi. Nalipay ka ba sa resulta? Ang tawhanong pamilya tinuod ba nga malipayon, malinawon, ug nahiusa? Klaro nga ang tubag maoy dili! Hinunoa, ang mga gubat, gutom, kinaiyanhong mga katalagman, sakit, ug kamatayon mihampak sa katawhan, nga nagpahinabog “pagkawalay-pulos,” “kasakitan,” ug “pag-agulo,” ingon sa gisulti sa Bibliya.—Roma 8:19-22; Ecclesiastes 8:9.

Apan, ang uban mangutana tingali, ‘Nganong wala man pugngi sa Diyos kining maong mga trahedya?’ Sa pagkatinuod, kana maoy pagpakitag inhustisya, ug kini makapalubog sa isyu, nga daw walay anihong daotan ang pagrebelde batok sa Diyos. Busa, si Jehova wala magkontrolar sa mga panghitabo sa tago aron pugngan ang tanang krimen ug mga trahedya nga moresulta, sa direkta o dili-direkta nga paagi, sa pagsupak kaniya. a Si Jehova dili gayod mopaluyo sa makadaot nga bakak nga mahimong molampos ang sistema ni Satanas, nga nakaplagan niini ang yawi sa kalipay! Bisan pa niana, dili kay wala magtagad si Jehova sa mga panghitabo. Sa pagkatinuod, siya aktibo kaayo, nga ato unyang masabtan.

“Ang Akong Amahan Nagpadayon sa Pagbuhat”

Kanang mga pulonga ni Jesus nagpakita nga ang Diyos dili kay naghinan-aw na lang sa mga  panghitabo. (Juan 5:17) Hinunoa, sukad sa rebelyon didto sa Eden, siya puliki kaayo. Pananglitan, iyang giinspirar ang mga magsusulat sa Bibliya sa pagsulat sa iyang saad nga ang umaabot nga “binhi” magdugmok kang Satanas ug sa tanan nga magmaunongon kaniya. (Genesis 3:15) Dugang pa, pinaagi nianang maong Binhi, ang Diyos magtukod ug usa ka kagamhanan, usa ka langitnong Gingharian, nga magpanalangin sa masinugtanong mga tawo ug magtapos sa tanang hinungdan sa pag-antos, bisan sa kamatayon mismo.—Genesis 22:18; Salmo 46:9; 72:16; Isaias 25:8; 33:24; Daniel 7:13, 14.

Aron matuman kanang maanindot nga mga saad, gipadala ni Jehova dinhi sa yuta ang Usa nga mahimong pangunang Magmamando nianang maong Gingharian. Kini siya walay lain kondili si Jesu-Kristo, ang Anak sa Diyos. (Galacia 3:16) Nahiuyon sa katuyoan sa Diyos alang kaniya, gisentro ni Jesus ang iyang pagpanudlo sa Gingharian sa Diyos. (Lucas 4:43) Sa pagkatinuod, pinaagi sa iyang gibuhat dinhi sa yuta, si Kristo nagpakita kon unsa unyay iyang buhaton ingong Hari nianang maong Gingharian. Iyang gipakaon ang libolibong gigutom, giayo ang mga masakiton, gibanhaw ang mga patay, ug gipakita pa gani ang iyang gahom ibabaw sa puwersa sa kinaiyahan pinaagi sa pagpahunong sa makusog nga bagyo. (Mateo 14:14-21; Marcos 4:37-39; Juan 11:43, 44) Mahitungod kang Jesus, ang Bibliya nag-ingon: “Bisag unsa pa ka daghan ang mga saad sa Diyos, sila nahimong Oo pinaagi kaniya.”—2 Corinto 1:20.

Kadtong mamati kang Jesus ug mogula “gikan sa kalibotan”—ang sistema sa mga butang nga nahimulag sa Diyos ug gimandoan ni Satanas—abiabihon ngadto sa pamilya ni Jehova. (Juan 15:19) Kining tibuok-globong pamilya sa matuod nga mga Kristohanon gimandoan sa gugma, determinadong magmakigdaiton, ug wagtangon ang bisan unsang timailhan sa pagkamapihigon ug pagpinig sa rasa diha sa ilang taliwala.—Malaquias 3:17, 18; Juan 13:34, 35.

Inay paluyohan kining presenteng kalibotan, ang matuod nga mga Kristohanon nagpaluyo ug nagmantala sa Gingharian sa Diyos agig pagsunod sa sugo ni Jesus nga nasulat sa Mateo 24:14. Hunahunaa lang kini: Kinsay nagwali sa “maayong balita sa gingharian” sa tibuok kalibotan? Kinsay midumili ingong tibuok-kalibotang espirituwal nga pamilya, sa pag-apil sa gubat ug sa makapabahin nga nasodnon ug tribonhong mga panagbangi? Ug kinsay nagtugot sa Pulong sa Diyos nga mogiya sa ilang panggawi, popular man o dili ang maong hataas nga mga sukdanan? (1 Juan 5:3) Daghan ang nakamatikod nianang maong mga kinaiya diha sa mga Saksi ni Jehova. Palihog susiha mismo ang pamatuod.

Pilia ang Pagmando sa Diyos!

Ang katawhan nga nahimulag sa Diyos ug napahisalaag ni Satanas, nagtukod ug usa ka sistema sa kalibotan nga nagpatungha ug nagkadaghang kagul-anan ug kawalay-paglaom. Bisan ang yuta mismo ginadaot! Si Jehova, sa laing bahin, nagtukod ug usa ka langitnong kagamhanan  nga nagpauswag sa kinabuhi sa milyonmilyon ug naghatag sa matag usa ug seguradong paglaom. (1 Timoteo 4:10) Hain man niana ang imong pilion?

Panahon na karon nga mopili, kay dili tugotan sa Diyos si Satanas ug ang iyang daotang kalibotan nga magpadayon hangtod sa hangtod. Ang orihinal nga katuyoan sa Diyos nga himoon kining yutaa nga usa ka paraiso wala gayod mausab. Aron makab-ot kana, ang iyang Gingharian ug ang mga tigpaluyo niini mag-anam ka lig-on, samtang ang kalibotan nga nailalom sa pagmando ni Satanas makasinati ug nagkadaghang “mga kaul-ol sa kasakit” hangtod nga taposon kana sa Diyos. (Mateo 24:3, 7, 8) Busa kon ikaw sinserong mituaw ug “Ngano?” sa Diyos, pamati kaniya pinaagi sa pagsalig sa mensahe sa Bibliya bahin sa kahupayan ug paglaom. Bisan karon, ang imong mga luha sa kaguol mahimong mga luha sa kalipay.—Mateo 5:4; Pinadayag 21:3, 4.

[Footnote]

[Mga hulagway sa panid 7]

Nalipay ka ba sa mga resulta sa pagmando sa tawo?

[Credit Lines]

Baby: © J. B. Russell/Panos Pictures; crying woman: © Paul Lowe/Panos Pictures

[Hulagway sa panid 8, 9]

Ipasig-uli ni Jesus ang Paraiso—ug magbanhaw pa gani sa mga patay